2009年4月30日 星期四

0430的晚餐 ~ 芝士火腿飛碟蛋多士併火腿炒麪


本來今日老公有朋友約左我地食飯,不過最後要延期...而我又無去買餸,屋企包方飽又到期,所以就整左呢個麪包餐 ~ 芝士火腿飛碟蛋多士併火腿炒麪


雖然就奇怪左d,不過味道其實唔錯仲食得好飽添~


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳家食品唔會受影響(即係無add你都可以睇既)....不過如果想睇埋我其他網誌就留言俾我add你啦~


2009年4月29日 星期三

0429的晚餐 ~ 芝士白汁焗雞球意粉


老公話聽日唔使帶飯盒,於是我都無特別去買餸勒...就用之前買落既食材煮晚餐啦,所以就整左芝士白汁焗雞球意粉~~


因為我用白酒炒d意粉先,老公見到就醒起佢之前買落個枝白酒仲未飲完...於是就倒番杯黎配意粉食~


只係配左杯白酒,個feel即時唔同左....我一向唔飲酒既,不過白酒我反而會飲少少,因為比較清,我就接受到,仲覺得老公買既呢枝幾好飲添~~


一杯酒就令我覺得今晚餐飯好有氣氛呢~


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳家食品唔會受影響(即係無add你都可以睇既)....不過如果想睇埋我其他網誌就留言俾我add你啦~


菜心沙孟魚粥


其實囡囡已經食左呢款菜心沙孟魚粥幾日架啦,不過今日先影低佢紀錄番~


我都係鐘意煮魚粥俾囡囡食多d,感覺上比菜粥豐富d,又比肉粥健康d,味道亦非常好...而且我覺得囡囡都好似特別鐘意食魚粥....雖然其實暫時我煮咩粥俾佢食,佢都食得晒~~


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳B飲食唔會受影響(即係無add你都可以睇既)....不過如果想睇埋我其他網誌就留言俾我add你啦~


2009年4月28日 星期二

吳爸爸送給女兒的小禮物


呢篇其實唔應該歸入吳媽親子既,應該係吳爸親子先岩~~


囡囡既衣服鞋襪基本上都係由我負責採購既,不過我會要求吳爸爸提供意見,特別係預算不多下而我又睇中太多衫既時間,吳爸爸就起左重要既作用,只買佢覺得靚個d衫,通常咁樣我就唔會超支,哈哈~~


不過其實吳爸爸都好鐘意買野俾囡囡,特別係d小玩意~好似今晚咁佢就買左把Hello Kitty小傘子俾abby,話用黎俾囡囡擋太陽,影相時又可以用黎擺下post咁喎~


而小傘子前面既麫包超人同飛天豬小公仔呢,其實內有乾坤既...實在佢地係一隻錄音公仔,按住紅色星星就係錄音,按住藍色星星就係播音~~因為呢期囡囡實在太多古靈精怪既BB話,於是吳爸爸見到咁可愛既錄音公仔就買左兩隻返黎勒~~不過囡囡好醒架,明明佢不停嘴咁講緊BB話,點知我地一拎起隻公仔想錄佢音,佢就即刻收聲...我地有試過唔俾佢睇到隻公仔,不過因為一按錄音星星就有"必"一聲,囡囡聽到聲就唔出聲架啦,真係俾佢激死呀~~


當然我地最後都錄到一兩句,播番出黎真係好得意架....俾番囡囡自己聽,佢都好似覺得好奇怪,唔知佢認唔認得自己把聲同聽唔聽得明佢自己講既BB話呢?


0428的晚餐 ~ 魚蛋雲吞撈麪(湯麫)併燒賣


因為今日放工特登去左金巴利道間百佳買尿片,好在仲有最後2包妮飄中碼,拎住番屋企都幾攰架,所以無買餸lor~(吳爸爸負責換片工作既,佢指定要妮飄,上次用coupon買左包huggies,佢成日都話唔好用喎~~屋企最近個間百佳又無妮飄賣,唯有試下去尖沙咀個邊,好在俾我買到咋)


於是今晚煮麪食,本來諗住上湯雲吞麪就算數,點知老公見到又話唔想要湯要撈喎~


咁我咪將佢個份整左個XO瑤柱絲撈麪俾佢食,而我就食番湯麪勒~不過個撈麪又真係好食d架喎,哈哈~


是但配d餸(魚蛋/雲吞/燒賣),咁又食到飽一飽勒~


今餐成本價唔使廿蚊


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳家食品唔會受影響(即係無add你都可以睇既)....不過如果想睇埋我其他網誌就留言俾我add你啦~


 


2009年4月27日 星期一

0427的晚餐 ~ 臘腸蒸雞飯伴菜心


今日懶呀,所以一煲過整臘腸蒸雞飯...放晒入電飯煲就搞掂~不過唔知點解d飯煲完比平時濕d,但係都無損老公既食慾....佢又添左飯啦,食到一件不留,所以無得留飯盒lu~


唔好話無菜,碟雞下面全部都係菜心黎架,只係d雞遮住大家睇唔到咋~而屋企既臘腸終於都食晒勒,半斤臘腸大大話話都食左成年有多,哈哈~


之後老公仲出左去松記買糖水番黎一齊食添,好飽呀~


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳家食品唔會受影響(即係無add你都可以睇既)....不過如果想睇埋我其他網誌就留言俾我add你啦~


2009年4月25日 星期六

外出食具


囡囡以前只食媽媽奶,我帶佢出街只要準備一條餵奶圍巾就可以,唔使好似其他媽媽咁又奶粉又奶樽又熱水壺咁...所以好多時大家都話我個媽媽袋好輕便~~


後來轉左食糊仔,我都只係帶包米糊粉,碗仔同匙羹就可以,尚算輕便....不過宜家囡囡轉左食2餐粥仔,我好想帶埋粥仔出街俾佢食,於是就想買番個保溫飯壺/水壺用黎裝住d粥仔出街....不過睇過都知唔平,cheap cheap地都要百幾二百蚊~


今日去開黃埔我就睇下吉豬島有無好野,結果俾我見到Buffalo保溫水壺(0.3L)大特價$50(原價$259),又見到吉豬島既日本自家品牌出既保溫飯壺連保溫手挽袋只係賣$79.9....真係好抵買,於是就買左勒,當係囡囡7個月大既禮物啦,哈哈~


最正係個buffalo水壺可以同飯壺一齊放入個保溫袋添,真係好似一set咁fit呀,而且都依然算係輕便架啦~~雖然我對佢既保溫效果唔大期望,不過應該都可以keep到幾個鐘卦,哈哈~


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳B飲食唔會受影響(即係無add你都可以睇既)....不過如果想睇埋我其他網誌就留言俾我add你啦~


2009年4月24日 星期五

囡囡的口味

雖然我自己就仲未有時間整d水果蓉或者湯水俾囡囡試...不過其實囡囡係嬰園,唔止有奶食,有粥食,仲每日都有水果同湯水架,好豐富呢~


今日由我接放學,去到見到負責照顧囡囡既Ivy姐姐,佢認得我架,一見到我就同我講囡囡食粥好叻,不過唔多鐘意食水果蓉同湯水....我當然把握機會問多d野啦(平時吳爸爸都好少會問)....Ivy姐姐話囡囡一食蘋果蓉呀,橙蓉呀個樣就會"拿"埋一齊,好似覺得好酸咁,唔多想食落去...Ivy姐姐話囡囡個樣好得意架喎~而湯水都係一般,最鐘意就係飲奶食粥,非常叻呢~


而我亦問下囡囡用隻鴨咀杯既飲水情況,Ivy姐姐都話幾好,亦識用鴨咀飲,只係因為流得快,要小心d驚會濁親....睇黎囡囡係嬰園既進食情況同係屋企差唔多(因為有d bb係學校肯食,係屋企唔肯食架),唔知囡囡係咪唔太鐘意甜同酸既味道呢~


不過最開心就係聽到姑娘讚囡囡乖同叻呢~


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳B飲食唔會受影響(即係無add你都可以睇既)....不過如果想睇埋我其他網誌就留言俾我add你啦~


Sofina Perfect UV SPF50+ PA+++ ~ LUCENT


炎夏將至,我已經同囡囡準備左CHU CHU既BB防晒液....不過我自己呢就仲未入貨~


試黎試去都係sofina既防晒最好,所以今次都係打算買佢架啦,只係等緊佢做promote~其實之前都有見佢出防晒set特價$200,我已經想去買,只係最後都係無行動~


點知今日俾我知道係德福廣場用八達通日日賞25分再加$25(或者直接用50分)就可以係德福間Sofina換一枝25ml既防晒(雖然呢枝係旅行裝25ml,不過其實貨裝都係得60ml架咋)


之前我通常用d分去換麥當當$10現金卷既,不過已經好耐無見佢有得換,d分儲住都無咩機會用,所以見到呢個offer我覺得幾抵....不過我張八達通只係有30分咋,所以就要用加錢個換法,不過我覺得應該抵過用50分既,因為要儲咁多分要消費好多錢先有架~


去到sofina,個sales姐姐俾左LUCENT(透明)個隻防晒我,我見包裝後面貼住$160架~宜家我補$25就有,好開心,唔知呢枝夠唔夠我呢個夏天用呢?


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳太悅己(當然有樣既另計)唔會受影響(即係無add你都可以睇既)....不過如果想睇埋我其他網誌就留言俾我add你啦~


0424的晚餐 ~芝士白汁雞翼焗金菇咸牛肉意粉


原來前幾天肚子不適除了是腸胃問題之外,也是因為神經痛的緣故~~~邊個話我知生完BB之後就會無神經痛架????呃人既,完全同未生之前一樣,我條腰痛到個人唔想郁呀~


也因神經痛的關係,本打算今日星期五晚出街食慶祝囡囡7個月大既,不過實在痛到唔多想郁,接左囡囡放學就去超市買左盒雞翼同金菇(共$13)返屋企勒~


我煮意粉一向都不按章法既,今次既配料有雞翼,咸牛肉同金菇,好似真係唔多夾咁喎...不過煮好左又異常地好味,老公仲話有D金菇係意粉入面好有咬口,食食下淋既意粉又食到D爽既金菇,好得喎....有時就係咁無厘頭而得出創意~


雖然吳爸爸對意粉一向麻麻(不過我好鐘意食意粉架),但係今晚佢都讚不絕口...今晚除左雞翼同金菇,其他都係廚房物資呢,抵~


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳家食品唔會受影響(即係無add你都可以睇既)....不過如果想睇埋我其他網誌就留言俾我add你啦~


2009年4月22日 星期三

薯蓉菜心粥


大家睇到今日吳家晚餐(富良野咖哩薯仔雞及菜心炒牛肉)或者都會估到abby應該有新口味既粥仔食啦....無錯勒,今日囡囡食既就係薯蓉菜心粥~~~


不過唔知係咪精神狀態麻麻,我煮煮下粥唔知點解俾d蒸氣淥親隻手指呀...唉,好鬼痛呢...仲要頂住煮埋餐飯呀~(囡囡,如果你識噯番媽媽就好lor....媽媽為左煮野俾你食整親呀~~~)


其實薯蓉同菜心都唔係第一次食架啦,不過囡囡之前係就咁試食薯蓉,因為好似唔多鐘意食,所以食左兩啖就已經無再食,所以我都無寫低....相隔應該都有幾個星期,今日又黎試下啦,將薯蓉加入粥仔再放少少菜心一齊食,今次囡囡食得好好喎....咁大碗都食得晒呀~~


吳爸爸餵囡囡食之前仲問我做咩愈整愈大碗(佢最唔鐘意我逼個女食野同飲水架啦),其實我唔係特登整咁大碗既,只係因為好似質地太杰,咁我咪加水整番稀d,咁份量就變多左lor....而且我都無話一定要囡囡食晒,如果囡囡食食下唔肯再食我都唔會逼佢食架~


不過最後囡囡竟然食晒,可能太耐無轉口味,所以今日咁好胃口啦~~


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳B飲食唔會受影響(即係無add你都可以睇既)....不過如果想睇埋我其他網誌就留言俾我add你啦~


0422的晚餐 ~ 富良野咖哩薯仔雞 菜心炒牛肉


今日起身個肚唔多舒服,精神又麻麻,於是請左病假休息下...一瞓就瞓到成點先醒,有時真係要請下病假俾自己回復狀態~


晏畫出去睇完醫生就去買餸,不過因為老公聽日有公司有野整唔方便帶飯盒,因為唔使準備佢份午餐,所以今晚只打算煮兩味餸~


富良野咖哩薯仔雞只不過係因為屋企有盒日式既咖哩,呢盒咖哩真係係北海道既富良野帶番黎既,盒面大大隻字寫住富良野架...哈哈,就係呢個理由所以就叫呢個名lor~今次用左老公最喜愛既雞胸部位黎煮....其實我都係鐘意食雞腿肉多d,始終都係嫩滑d,真係唔明點解老公會鐘意食雞胸?


菜心炒牛肉:另一碟咪炒菜lor,健康d麻....不過我又加埋牛肉一齊炒,始終齋菜好悶既,原諒我啦,哈哈~


呢餐成本價三十,食得好飽好飽~~~


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳家食品唔會受影響(即係無add你都可以睇既)....不過如果想睇埋我其他網誌就留言俾我add你啦~


2009年4月20日 星期一

0420的晚餐 ~ 芝士焗肉醬意粉


本來今日無打算煮意粉既,不過唔知點解今日對鞋整到右腳背好痛(對鞋著左好耐架啦),所以放工之後都唔想行去買餸,直接就返左屋企鬆一鬆隻腳~


正諗緊係咪要叫外賣食之際,俾我醒起雪櫃有半盒免治豬肉,腦海就係到諗得唯一既半盒免治豬肉可以煮到咩晚餐夠飽呢?


最後我決定煮肉醬意粉,新鮮蕃茄都無,只有用茄汁同茄膏充牚場面啦....加多少少粟米粒同埋大量芝士補救,煮左半包意粉,就完成今晚既晚餐勒~


因為得半盒肉,所以我無留到飯盒啦....不過老公好滿意是日既晚餐,佢話好入味喎~~不過我就覺得意粉煮得淋左d,唔夠彈牙...因為煮緊意粉時去左同囡囡沖涼,沖完番去睇d意粉已經煮過左龍lu~~雖然就未係最好,不過都食得好開心,起碼唔使叫外賣啦~~


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳家食品唔會受影響(即係無add你都可以睇既)....不過如果想睇埋我其他網誌就留言俾我add你啦~


2009年4月19日 星期日

Strawberry Forever @ Harbour City


今日晚飯又係海港城解決啦,唔想諗又唔想排隊,於是走入唔使等位既Strawberry Forever...其實我都係第一次食架咋~


我地叫左佢既5 course晚餐(每位$98),有南瓜忌廉湯,草莓醬雞翼,草菇pizza,青蘋果咖哩雞焗飯,海鮮焗飯,焦糖燉蛋,草莓雪糕同埋什果梳打~~


食物一般啦,無咩特別...因為佢以甜品做賣點,點知我覺得佢既甜品水準比食物更差~


焦糖燉蛋唔係應該熱食架咩?點解係凍既?仲要入面好水,點解呢樣甜品可以做得咁差~~而個雪糕當然唔會差得去邊,而但係雪糕之上既忌廉竟然係硬既,好似肚臍餅上面個d糖咁硬,根本就食唔到....唉,真係好嚇人呢...所以以後都唔會去食啦~


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳家吃喝(當然有樣既另計)唔會受影響(即係無add你都可以睇既)....不過如果想睇埋我其他網誌就留言俾我add你啦~


2009年4月18日 星期六

痴媽B

之前唔記得係邊位blog媽媽睇到呢個題目,覺得非常傳神,就借黎一用啦~


其實我覺得囡囡係認得我同吳爸爸既,不過就無話一定要我同吳爸爸抱,其他人抱佢都ok既,唔會喊架~~


經過4日長假,囡囡好似痴身左....宜家得佢一個係地墊玩,佢玩得一陣就會扭你陪佢,可能唔須要同佢一齊玩,只係旁邊睇住佢玩就已經無事...但係一行開佢就扭計~


星期五去99度食飯,因為想去買牛仔褲,所以留低佢俾麻麻睇住....我同吳爸爸就落去買牛仔褲,我已經好快咁完成試身同俾錢,應該只係去左15分鐘左右~


我地出門口時囡囡都無野既,點知我地返到去,一出電梯就已經聽到囡囡喊到拆天咁滯....一開門,99就將囡囡交俾我,話佢喊到好淒涼搞唔掂,仲問佢係嬰園係咪都係喊成咁...我就話無lor,囡囡係嬰園不知幾開心,見到姑娘已經笑啦...不過6299就話佢有喊都唔會話你知啦....算數,你覺得點就點啦,況且宜家15分鐘你都湊唔掂啦~


當囡囡一轉到我手就無再喊勒,只係因為之前喊得太勁,係我懷中就不斷氣促促咁~~呢一刻,我先覺得原來囡囡係咁需要我(當然我諗吳爸爸抱都一樣可以止喊既)....不過佢就唔一定要我抱,其他人都可以抱,只係囡囡既視線範圍要見到我先得(好在返嬰園就無問題,可能2個月就返已經適應左)~


之後再俾番99抱就ok番啦,因為囡囡見到我係度呢~~


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....不過如果想睇埋我其他網誌就留言俾我add你啦~


家長學堂 ~ 幼兒情緒管理

今日星期六嬰園又舉辦家長學堂啦,今次既題目係幼兒情緒管理~~


呢個題目非常吸引,園長話今次有成六十幾個家長報名參加呢...不過最後好似黎左四十個左右...我當然捉埋吳爸爸一齊去啦,但係好似之前一樣,佢都係釣魚既時間多~~


今次無片睇,因為園長話搵左成個星期都搵唔岩,通常都係講年齡大d既小朋友,好似讀嬰園既幼兒就無合適既....所以唯有齋talk...園長用佢三十年既教育幼兒經驗同我地分享,佢話當幼兒開始識講野時,表達能力強左,家長掌握幼兒既情緒就容易好多...但係當係嬰兒時期未能通過語言表達,我地做家長既都只能靠估,所以真係要細心觀察呀~


今堂既內容真係好難好有系統咁寫出黎,所以都係列點形式將重點同大家分享下:


- 1歲前係BB建立對人信任既重要階段,所以唔好任由BB喊到死都唔理,太長時間由得BB喊會令佢覺得無人關心,建立唔到信任影響日後長大既心理


- 1歲至2歲係BB自主人格既形成階段,家長教養方法直接影響BB性格形成~由於已經懂得步行等等,所以BB好有主見,變得唔聽人講野....園長話係安全情況下,家長應該俾BB自行體驗,唔好咩都唔俾佢做....園長話有個case,媽媽對女女管教好嚴,成日就話佢做錯,令個女無晒自信,搞到個女唔敢出街,一出街就喊到拆天,唔鐘意陌生人,總之係媽媽眼中就係成日喊,好扭計,覺得個女好有問題....不過園長話其實係個媽媽教養有問題先真,最後要花好長時間先可以幫佢女女建立番自信~


- 情緒係因外界既刺激而引起既心理反應


- 情緒沒有對與錯之分,唔應該抑壓,係要俾佢發洩出黎...但係行為表現就要糾正,例如唔可以傷害他人,所以發脾氣唔可以打人~


- 父母要先處理好自己既情緒,以身作則,要建立良好既家庭環境...如果屋企成日吵吵鬧鬧,小朋友情緒自己唔會好~


- 要了解情緒出現既背後原因,如能說出幼兒的心理感受,他們會覺得你能了解他,有人明白自己,情緒自然得到解脫~


總之,唔好見到幼兒喊,發脾氣就鬧佢唔乖,扭計....要接納佢既情緒發洩,不過要因應其表達方式加以教導,要用健康既方法去紓發出黎~~~


之後當然又係家長發問環節啦,今日真係好勇躍...連我都有問園長,因為我覺得Abby好似太cool(無咩情緒好似又唔係太好咁)....不過園長話abby仲細,唔使太擔心,再俾多d時間觀察喎~


最後我想提下其中一個case study,有個爸爸話佢會俾恐佈片小朋友睇,只要唔話佢知係驚既就唔會令佢覺得驚(因為幼兒係無驚呢個概念),教佢呢d係假既唔使驚就得...而佢老婆就反對,話唔應該俾小朋友睇...於是園長就問大家支持邊個...我就支持媽媽勒,不過原來大部份家長都支持爸爸....而園長既立場就支持媽媽既(當然佢無話爸爸既方法係錯),但係佢覺得恐怖片始終會營做出驚嚇效果,適宜當小朋友較大時懂得分辨現實與虛假既時候先俾小朋友睇~~


我都覺得自己寫得好似好混亂咁,不過唔緊要,大家可以睇下面呢d關於幼兒情緒既文章,詳細而有系統好多,大家有時間不妨參考下~


參考資料:


學步期幼兒情緒發展


http://www.hkedcity.net/article/parentart_child1/031112-042/index.phtml?print=1


學前期的幼兒情緒教育


https://www.hkedcity.net/article/parent_infant_edu/080408-001/index.phtml


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳媽育兒(當然有樣既另計)唔會受影響(即係無add你都可以睇既)....不過如果想睇埋我其他網誌就留言俾我add你啦~


2009年4月17日 星期五

Philips Mini Blender (型號:HR2870)


其實吳家係有個沙冰攪拌機既,只係因為比較大部,所以好少用(用過既次數10隻手指數得晒)...因為一用就要特登拎出黎,好多功夫呢~~


不過因為宜家開始要煮多d食物俾囡囡試,但係沙冰攪拌機唔能夠攪太少份量既野,所以都係用唔著~雖然已經買左研磨器(我覺得幾好用)...不過都有心思思想要個迷你攪拌機方便整更多baby food,可以更省時又多元化麻~不過我都無去買,因為其實我覺得研磨器已經好夠用,只係整得慢d lor~


之前係99度食飯,講開煮粥仔,咁岩我記得以前見過99有手提攪拌器,不過已經好耐無見佢用,咁我就多口問99係咪唔用啦,如果唔用不如俾我拎番屋企用啦~~99就話唔知收埋左係邊,話搵番出黎下次上黎食飯俾我喎~


今晚上去食飯,原來99買左個新既迷你攪拌器,不過就唔係佢以前個隻手提款,而係Philips既Mini Blender(型號HR2870)...為左個孫有好野食,99果然不惜工本喎,買個全新既俾我...咁我就慳番幾百蚊又多個好幫手勒~


為左方便用呢位新助手,我就係廚房執左個小位置用黎做囡囡飲食工作間...原先係放調味品既,宜家唯有徵用埋廚房個窗台位放呢D調味品啦~


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吾居家品(當然有樣既另計)唔會受影響(即係無add你都可以睇既)....不過如果想睇埋我其他網誌就留言俾我add你啦~


第一條Levi's牛仔褲


繼買鞋之後,我終於都出手買衫啦,不過今次係買下身既牛仔褲~~


唔知大家仲記唔記得我幾個月前話著得番大肚前既牛仔褲好開心呢....著係著得落,不過畢竟身型已經今非昔比,經過短短既幾個月,我呢條牛仔褲抵受唔住我大腿既壓迫,終於爛左....名符其實著到褲穿窿~~本來個窿好細既,著左就睇唔到,咁我咪由得佢,不過繼續著既結果當然係個窿愈黎愈大啦....於是我都考慮緊去買番一條新既牛仔褲,不過仲未有動力去睇~


其實我一向都係買d cheap cheap牛仔褲既,大學時和同學係沙田某時裝小店買左一條價值一百大元既牛仔褲,一著就著左7年有多,唔係嫌高腰太out都無諗住換....於是3年前係某時裝連鎖店買左一條價值一百二十元既低腰牛仔褲就著到大肚勒,大肚時又係沙田買左條價值一百元既大肚牛仔褲....直至最近我先著番之前個條低腰~


本來今次我都係諗住買cheap cheap牛仔褲架啦,阿爸仲同我講話"卜死你"牛仔褲大減價唔使一百蚊添,不過我又無衝動去睇喎~~點知今日俾我係生果日報見到Levi's專門店罕有咁大減價,低至二六折就令我好有意慾去買番條勒~


其實我都非常鐘意名牌架,只係我既性格令我唔捨得買,雖然我知名牌既用料好,手工好,又可以滿足自己小小既虛榮心,不過我就係唔捨得買....前年同屋企人去曼谷,兩個細妹好興奮咁去買Levi's時我都忍住無買到,無他既,因為就算比香港買平都要大約六百蚊左右一條,係我既尺度黎講依然係貴左少少lor~


由於Levi's減價只係得3日,所以今晚就走去睇勒...我去左美麗華個間,去到門口都無sales既字樣,好似平時正價咁既格局都有d疾步....不過都入去睇下,好在都俾我搵到特價個褲架~


最後我買左條Levi's lady style既Diamand系列,因為減得最勁,我呢條由原價$1399減到$800,再係今次大減價減到$399....即係平左一千蚊呀)))))))))而且$399一條牛仔褲我覺得都可以接受,加上呢個Diamand系列係用Swarovski水晶點綴後褲袋,好靚架...所以就買左我第一條既Levi's牛仔褲勒~~


好在我唔使買最大個碼,28腰都ok勒....不過褲頭之上係一堆豬腩肉,絕對唔可以俾人睇到,所以我一定要著d大件既上衫黎襯呢條褲(其實宜家都係架啦~)


Levi's質感果然唔同d,雖然好貼身,不過著得好舒服,完全係feel到d布既彈性呢~


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳太悅己(當然有樣既另計)唔會受影響(即係無add你都可以睇既)....不過如果想睇埋我其他網誌就留言俾我add你啦~


2009年4月16日 星期四

0416的晚餐 ~ 芝士粟米咸牛肉飛碟併芝士腸印尼撈麫


琴日同今日放工之時都落雨,無遮係手既我就直接番屋企,無去買餸勒~


於是琴日終於叫左外賣食,而今日我好唔想食外賣,最後我整左個簡餐 -


芝士粟米咸牛肉飛碟併芝士腸印尼撈麫


其實吳爸爸除左喜愛麪類之外,仲好鐘意食包類既....所以佢聽到話今日整飛碟不知幾高興...不過我驚得飛碟唔夠飽,所以併埋撈麪一齊食,咁就實夠啦....點知其實我食完呢3塊飛碟之後已經好飽,我諗係因為涵料豐富啦,有芝士,咸牛肉同粟米喎~~~


老公就勁啦,食晒d飛碟仲可以KO兩包撈麪,佩服佩服....咁好胃口,睇黎佢已經好番晒啦喎~~


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳家食品唔會受影響(即係無add你都可以睇既)....不過如果想睇埋我其他網誌就留言俾我add你啦~


2009年4月14日 星期二

第一次食蛋黃豆腐粥


囡囡又食左幾日菠菜粥,係時間同佢轉下新口味~~


今日我留起左少少豆腐(我同吳爸爸既晚餐食材),就整左呢碗蛋黃豆腐粥勒~


囡囡都好鐘意食,不過可能今日係放假後第一日返學,好早就攰啦....食到中途就開始扭眼瞓,係度扭食媽媽奶....結果食左半碗我就俾佢食媽媽奶,一路食一路瞓....就係咁瞓著左啦~


*******************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳B飲食唔會受影響(即係無add你都可以睇既)....不過如果想睇埋我其他網誌就留言俾我add你啦~


0414的晚餐 ~ 蒸水蛋 家常豆腐 芝士腸什菜粉絲


經過4日假期,又係時間回歸平淡....而吳爸爸今日仲要求煮得清淡d,因為佢話喉嚨痛,好似想作病咁喎,加上佢又話之前既飯盒份量唔夠,所以今日就煮多少少啦~


嫩滑蒸水蛋:好耐無煮啦,要清淡最岩就係蒸野啦...用黎送飯簡直一流,又平又正呀~


家常豆腐:豆腐亦係一樣好有益而清淡既食物,雖則要清淡都唔可以一d肉都無既,唔係吳爸爸都會無胃口,所以都係連肉碎一齊煮...平時通常都係煮麻婆豆腐,因為夠惹味,今日要清淡就轉做家常豆腐啦,一樣好好食~


芝士腸什菜粉絲:要清淡唔少得就係菜啦,唔想咁悶就加下d粉絲加d腸仔,多d份量可以留飯盒麻~


今日成本價大約廿五蚊啦~


*************************************************************


溫馨提示:


吳家吾居正進行私有化工程,不過只限有樣貌或私人資料既網誌....基本上吳家食品唔會受影響(即係無add你都可以睇既)....不過如果想睇埋我其他網誌就留言俾我add你啦~


2009年4月13日 星期一

私人化工程

幾經考慮,我決定要將我個blog進行私人化工程~~


其實我好歡迎任何人黎睇既,因為我總覺得寫左出黎就即係俾得大家睇...不過,宜家呢個社會真係咩人都有,有起咩事上黎俾人起晒底好似唔係太好...加上一向吳爸爸都唔係太鐘意我寫得咁公開~


所以由今日起我會慢慢將吳家吾居私人化(畢竟實在有太多篇),大家想繼續睇就留言俾我add你啦~


2009年4月11日 星期六

第一次食菠菜粥


今朝一早吳爸爸出去買麥當當番黎俾我做早餐,而我就叫佢去埋街市買斤菠菜番黎做囡囡今日粥仔既主菜...就係咁吳爸爸第一次自己去街市買菜,都係囡囡夠面子,哈哈~


第一次正式食蔬菜粥仔,先小試牛刀,除左第一啖出現怪樣之外,之後都肯繼續食,仲好似愈食愈鐘意...相中呢碗好快就食晒勒~


夜晚6點個餐係婆婆度食,我預多左份量帶去既,估唔到囡囡一樣食晒....婆婆仲餵得好開心添,一邊讚囡囡食得叻,一邊話我細個唔肯食,會一邊食一邊吐番出黎.....好在囡囡呢方面唔似我呢~


2009年4月10日 星期五

第一次食蛋黃粥


鯇魚粥已經一連食左4餐啦,囡囡愈食愈好,仲食得晒我準備既份量添~


今日2點個餐就係最後一餐鯇魚粥,因為無去買餸,屋企無其他食材適合作為囡囡既粥仔材料.....不過屋企有雞蛋喎,加上宜家係復活節,食復活蛋就最應節啦~


所以6點個餐我決定整新口味 - 蛋黃粥是也~~~~


因為蛋白會容易敏感,要1歲左右先可以食....所以囡囡只可以食蛋黃架咋,加上第一次食,所以只係用左半隻蛋黃既份量~


煲好粥底,又煲左隻水煮蛋,剝殼之後留左半隻蛋黃俾囡囡,其他部份就由我同吳爸爸瓜分左佢勒~


蛋黃粥完成,好靚呢~~~囡囡見到d粥個樣好似有d唔同,個樣好似係度問點解d粥唔同左樣咁既,試第一口已經好鐘意食,食下食下,我準備既呢碗蛋黃粥就食晒勒,真係好叻呢~


囡囡開完餐就輪到我同吳爸爸啦,好耐無食壽司,加上呢期元氣既激安優惠卷,所以就去左食勒....食晒我地必叫既壽司,8折後呢餐只係一百大元咋,抵~~~~



2009年4月8日 星期三

真正元兇


因為今日要安裝冷氣,於是要搬開晒d野俾個空間師傅進行安裝...一朝起身聽到滴滴達達既聲音,仲以為落雨....點知當老公拉開冷氣機個邊既窗簾(呢個窗簾基本上係唔會開既)就發現左整壞冷氣機既真兇啦~~~~~~佢就係一對鴿子!!!!!!!!!!!


原來我錯怪左豐澤牌啦,部機之所以壞係因為機頂有個鳥巢呀)))))))))真係發夢都無諗過會有對鴿飛黎吳家既冷氣機築巢....就係因為佢令我白白無左二千蚊,離晒大譜呀~~~~~~~


你地睇下佢個巢,用左咁多樹枝,仲跌晒入部機度,部機唔壞就奇啦~老公想趕佢走,佢仲打開晒對翼黎凶吳爸爸呀~~~老公話有兩隻,係一對黎架....唉,做咩要整壞我部冷氣黎整你地個愛巢呀!!!!


老公話如果佢係燕子或者都唔會趕佢走,不過佢係鴿子就無得留低啦....最怕佢有鴿蛋或者鴿BB係度咋....不過放工番去睇時佢地唔係度,亦都無鴿蛋或者鴿BB,我地就拆左部機啦~


我最怕隻鴿會係新機上面再築巢,老公話呢排未開冷氣期間要睇緊d,到夏天時晚晚開冷氣就唔使怕~老公仲話好彩換機,唔係無啦啦因為開冷氣有禽流感就麻煩喎,咁都俾佢諗到,真係無野講~


其實如果因為咁而令部機壞左,保養包唔包整番好呢?有無人可以解答到呢?


0408的晚餐 ~ 咸牛肉雞蛋炒烏冬


今日有人黎安裝冷氣啦,所以一樣放工直接番屋企,都無得去買餸~


屋企其實都無咩食材,不過我又唔想叫外賣,結果就用左咸牛肉,雞蛋同烏冬煮左呢個咸牛肉雞蛋炒烏冬...都ok啦~不過我覺得同意粉夾d,因為以前試過用呢個組合煮意粉,感覺上意粉好味過烏冬~


因為無咩餸,老公話唔使留飯盒俾佢,所以只係留左自己個份咋~


2009年4月7日 星期二

Mouliner Ice-cream Maker


今日冷氣機送貨,一早就講左話最快6點後先會有人收貨...今朝收到吉之島送貨部電話話confirm 6-8點送貨黎...於是放工即刻返屋企,都無諗住去買餸,點知佢地真係好準時,5點10左右就打黎話已經到左屋企樓下...我仲係巴士度咋喎~


於是叫佢地等15分鐘,今次都係第一次唔係我等送貨,而係送貨既人等我,哈哈~


行到屋企樓下就見到大大架吉之島貨車,我咪走埋去問係咪送冷氣機lor...於是佢地就立即行動跟我一齊上樓勒,收貨過程唔使5分鐘,超有效率~~


跟機送既雪糕機都送左黎啦,係法國萬能牌雪糕機(1.6L),曾幾何時我都想用信用卡積分換架...估唔到宜家買冷氣竟然送左一部俾我,都好似要成$4xx架~


唔知呢個夏天我有無時間親自整下雪糕食呢?


0407的晚餐 ~ 玉子菜芯粉絲 煎午餐肉 炒滑蛋


今日部冷氣機送貨黎,放工即刻番屋企收貨,都無得去買餸,於是就有罐頭出場啦~


老公鐘意食厚切而大塊既午餐肉,仲要煎得夠香口既,今日呢碟煎得唔錯~


屋企仲有半包菜芯同埋粉絲存貨,加包樓下買既玉子豆腐,就是但煲埋一齊食啦~


最後最簡單既就係炒多碟蛋,咁就夠餸留飯盒~


是晚成本大約廿蚊多少少,都ok啦~


Panasonic 3/4匹 冷氣機(CWC78JA型號)


前陣子的天氣有點點初夏味道,囡囡有一兩晚更因為太熱未能熟睡,抱起她時滿頭大汗,於是決定開冷氣等囡囡睡得舒適一點....沒想到我們房的冷氣竟然壞了,機是開動了,可是一點涼風也沒有...吳爸爸拿下隔塵網清潔也沒有用~...最後只好拿風扇入房代替~


天啊,這部冷氣只是換了年多兩年,怎麼壽命如此短?是我上年懷孕和坐月期間開得太盡了嗎?是我貪平買了cheap cheap的豐澤牌嗎?還記得是在一個打風的晚上,吳家大廳及睡房的冷氣因為年事已高經不起風吹雨打一同報銷....一下子要購買2部冷氣機真的很貴耶....於是最後買了兩部豐澤牌,想不到用不夠2個夏天就和我說再見....幸好大廳的一部還能運作~~


於是一早決定要在夏天來臨前換掉這部壞冷氣,還希望能遇上冷氣展銷推廣(我是深信天氣還沒進入炎夏時買冷氣應該會便宜一點),那就可慳上一筆了~


真的,機會來了,吉之島正進行迎夏冷氣巡禮,星期六日用Aeon Jusco信用卡更可享有10%回贈呢....於是星期日一家三口就去黃埔吉之島買冷氣~


經過上次豐澤牌一役,我不再挑最便宜的了...而是次最便宜的3/4匹是富士,只售$1990...不過最後我挑了售貨員推介的Panasonic(CWC78JA型號),正價$2840,現在推廣價$2390...而且買滿二千元會送J card會藉(入會費要$50架),仲可享有J card既95折優惠,即$2270.5....我再用Aeon Jusco信用卡可以回贈$200(呢張卡我真係好少用,不過養卡千日真係用在一時呢),最後$2070.5就買到啦~(我睇番豐澤呢期既冷氣推廣,部豐澤牌3/4匹賣緊$16xx呀,我呢部Panasonic都係貴佢少少咋)


價錢抵之外,仲有好多附帶優惠呢....除左送J card會藉,仲有小家電送(三文治機/小型吸塵機/攪拌機/雪糕機)...因為我只係無雪糕機,所以要左呢款...另外保養亦有得升級,包首2年免費工程安裝保養及首3年免費原廠保養...唔少得當然送埋鋁架同埋處理舊機服務啦~


呢部Panasonic(CWC78JA型號)都幾多好處既...首先就係慳電啦,除左係1級能源標籤之外,用電度係850,我見其他多數都係960,售貨員話呢度都可以慳到幾百蚊電費架~而且佢見我抱住囡囡,仲話好岩屋企有BB既家庭,因為有Super alleru-buster 多功能過濾網,可以抗敏、抗菌、防霉 ,另外仲有個藍鑽保護層散熱器,比一般散熱器耐用三倍.....佢有拆開俾我睇架,真係見佢同其他冷氣有分別呢~


所以好快我就決定買呢部勒,星期日買,今日星期二就送貨黎,聽日星期三就安裝啦,真係好效率呢~


2009年4月6日 星期一

第一次食鯇魚菜芯粥(附video)


星期六見到瑤瑤食咁多粥仔,激發起我要煮豐富粥仔俾囡囡食既行動~星期日去左吉之島,本來係買三文魚既,不過要成廿幾蚊一塊,而囡囡只係食好少份量....諗諗下改變主意,去左買$6一盒既鯇魚片...哈哈,都係試驗性質,買盒平d既試下先啦~


今餐我用左3片,當然起晒骨啦....仲落左3小塊菜芯(我同老公今晚既晚餐材料)加料,我有試食架,估唔到無落任何調味之下都好好食喎,我食到鯇魚既鮮甜呀~~~可惜吳爸爸唔食魚,所以佢欣賞唔到啦~


連我自己都咁滿意,相信囡囡都應該鐘意食~~





果然囡囡食得唔錯,比起琴日既南瓜粥食多好多,但係我準備呢個碗仔既份量都係食唔晒,可能對囡囡黎講都係多得滯,不過都食左3分2,我都好滿意...仲見佢食到個肚漲晒出黎,睇黎真係食到好飽下~


0406的晚餐 ~ 涼瓜炒牛肉 香煎雞翼 炒菜芯


今日既涼瓜炒牛肉係我第一次煮既,雖然我就唔好涼瓜既,不過炒落都好香,ok啦~


其他都係簡單野...不過今餐成本價要四十蚊,因為煎左好多雞翼,哈哈~


2009年4月4日 星期六

第一次食南瓜粥


4月4日兒童節,就整個新口味俾囡囡試下 - 南瓜粥


不過我無買真正既南瓜,而係用之前買落既一盒beanstalk四式糊仔,其中一式就係南瓜糊~


因為beanstalk盒米糊終於食晒啦,所以今次係粥底黎既,不過就加左包南瓜糊入去~但係我開得太稀(四式糊既份量同米糊既份量開法原來又唔同既),所以囡囡今次都係食得麻麻地...不過我覺得囡囡都應該係鐘意食既,只係太稀所以食得唔係幾好~


不過食完呢盒四式糊,我就會買d新鮮蔬果黎煮粥仔俾abby食架啦~


2009年4月3日 星期五

囡囡再叻叻


呵呵,囡囡本手冊又再有讚賞既字句啦~


4月開始,囡囡係嬰園既午餐已經改左食粥仔啦....今日睇下本手冊仲見到姑娘寫住囡囡"吃粥仔很叻!"既字眼...真係好開心呀~


吳家吾居部落3歲啦

唔係見到勞太話寫blog 3週年,我都唔記得原來我都一樣寫左3年有多啦~


3月13日就係吳家吾居3歲既日子,不過我唔記得左lu....因為宜家只係記住囡囡既野,哈哈~


原來不經不覺就寫了3個年頭...我想囡囡到3歲的日子應該都不是很遙遠的事,特別是她出世以後,時間好像比從前過得更快~


而我的吳家吾居內容愈見豐富,這表示我的人生非常多姿多采....我慶幸這個代表自己的小部落格沒有因為囡囡的出現而變得面目全非,起碼我仍然能常常寫,內容也不一律是有關囡囡的...雖然無可避免地寫囡囡的事情佔了很大的比例(她真的佔了我生活中很大的比例啊),但是我很開心我仍能維持自己的生活,我依然能夠每個朋友聚會都出席,我覺得比以前更多了聚會呢....只是多了囡囡一同參與其中~~仍然可以做我的廚房CEO,仍然可以和老公去吃美食....雖然旅行一環暫時停了下來,不過我想待囡囡大一點後,我一定會重拾這個興趣的~~


我其實沒有忘記和吳爸爸一同開了囡囡的專用blog,只是我想將那個blog留給囡囡自己寫,在她能夠表達情感時幫她寫,記下她自己的小世界~


2009年4月2日 星期四

吳家人奶庫(6 months+)


(12包210ml媽媽奶@End of March)


終於餵人奶既路途已經走到我所定下的目標 ~ 6個月啦!


吳家人奶庫庫存量已經大減啦,因為現在每包奶都要最少7安先合格,或者奶量係無減既,不過因為需求大左,相比從前3安一包奶既日子真係辛苦好多呢~


懷孕時忘記於那裡看到的說最好能用母乳餵哺至6個月,因為6個月時的母乳叫金剛奶,,不過我忘記了有什麼作用,總之就是有好處...之後因為嬰兒開始進食固體食物,母乳所起的作用就大為減少了,只是輔助性質,所以我早早就以6個月為目標~


達到目標真的很高興,其實我對這段奶媽日子很享受的....辛苦不是沒有,最麻煩是要每天帶著我的泵奶拍檔上班下班,想輕鬆一點都不行~也因為餵母乳的關係我不強逼囡囡戒夜奶,她需要的就由她,而且也是每晚一次罷了,現在的我也習慣了~倒是要執行那密密的泵奶時間表令我有點吃不消,不過也熬過了6個月~由從前要準備好一枝人奶才帶囡囡出街,到現在在街上隨時隨地都可以餵奶,那當中的轉變可以想像~


其實我真的挺喜愛餵媽媽奶的過程,囡囡在我懷中以超享受的樣子吸啜真的很心甜呢...吳爸爸每次見到囡囡那款嘆奶樣都會讚美一番...而且當囡囡哭至失控時,什麼都幫不上忙之際,只要給她吃媽媽奶就能安撫她,真的是萬試萬靈的呢~


雖然我的媽媽奶不足以令囡囡成為人人讚美的肥BB,不過我覺得吃了媽媽奶的她實在非常精靈活潑,我很滿意~


來到這個時間,我知道我的媽媽奶不再能夠滿足囡囡所須要的營養了,而且我的奶量真的少了很多...所以我打算慢慢退下火線~


4月開始,囡囡在嬰園已經改了一餐食粥仔,還加有茶點時間...如果我的人奶庫真的減產就由囡囡在嬰園吃一餐奶粉好了....不過我會繼續每天起床給她吃媽媽奶做早餐,也會以媽媽奶做晚安奶,而放學回家那一餐就食粥仔....希望直至囡囡自然離乳為止~


2009年4月1日 星期三

0401的晚餐 ~ 豉椒蒸排骨 金菇雞柳 炒白菜


好耐無食豉椒蒸排骨勒,今日就整佢啦...老公聞到好香不知幾開心,味濃既野佢就最鐘意~


就連金菇炒雞柳我都落得重手左,味道鹹左少少,不過老公鐘意食~今日既份量都夠留飯盒,成本價三十蚊有找,又搞掂一餐~