本來我還在考慮是否應該替囡囡開一個blog,記錄她的成長過程...還是在我的blog加多個新分類比較方便~~
怎料老公卻快我一步,幫囡囡登記了一個新blog,仲寫明係"我愛爸爸"添
....佢點可以咁獨食,只係寫我愛爸爸架,咁媽媽去左邊~~
我無理由又幫囡囡開個blog架麻,所以我同老公講要一齊update囡囡個blog,佢負責寫我愛爸爸,我負責寫我愛媽媽,咁先公平麻~~
http://hk.myblog.yahoo.com/abby2008@ymail.com/
2008年8月29日 星期五
第六次廣華產檢(36 week)
終於都到左36週啦,今日又係去廣華做產檢,不過今次唔係見助產士小組,係要見醫生呀~
今日既檢查時間係11點,睇醫生個邊真係人頭湧湧,助產士小組個邊真係少好多人呢~
雖然好多人輪住睇醫生,不過今日整個過程都只係用左個半鐘,算係咁啦....而且我又撞到朋友,有人陪傾計,時間易過好多呢~朋友同我既預產期相約,又係睇助產士小組架,所以我地成日覆診都撞到,佢都話我個肚俾上次覆診好似大左好多呀~~
今日見既醫生係一個南亞裔既人士黎,不過佢都識講廣東話...姑娘聽完囡囡心跳之後,醫生摸下我隻腳睇下有無水腫,之後度下我個肚,又摸下我個肚咁就問我有無唔舒服...我話無咩特別啦,醫生話一切正常咁就睇完勒,都唔知有無2分鐘時間呀~
之後我個file拎番去助產士小組個邊,姑娘話我已經36週,如果有咩動靜(都係個3樣啦:陣痛/見紅/穿水,仲有就係12個鐘之內bb郁動少於10次)就要入院喎~~宜家開始要每個星期番去廣華做檢查,下星期五仲話要再抽多次血(唉,又要抽血,點解咁多血要抽架?)同埋照超聲波添....真係唔緊張都俾佢搞到好似好緊張咁呢
2008年8月27日 星期三
終極脹爆之肚(35week4days)
到呢個星期尾囡囡就達36週啦,我覺得陀左接近9個月既肚已經大到不能再大,因為個肚皮真係扯到好行,肚圍已經接近43吋啦~~
之前仲係好想去studio影番輯大肚相,但係愈陀就覺得自己愈醜(都唔明點解d人會話大肚婆靚),而且肚紋實在唔少,我覺得都好難影得靚架啦,所以都係放棄,慳番d錢,叫老公幫我影算勒~為免嚇親大家,我都係將d相整細d先post啦...哈哈~
除左肚紋之外,我條黑色中線已經愈生愈高,就黎去到心口啦...d人話去到心口就表示生得,唔知係真係假呢
2008年8月24日 星期日
為了囡囡而買的Lumix FZ28
無錯,又係老公既主意~~
買呢部Lumix FZ28既目的並唔係想幫囡囡拍照,因為老公已經有部Nikon D80既專業單鏡反光機用黎幫囡囡影相~~
咁呢部Lumix FZ28究竟買黎做咩
其實係買黎幫囡囡拍高清video~~最初我地係睇高清攝錄機既,可惜除左價錢太貴之外(動輒都要5千左右),老公亦嫌機身太重手~~
於是我地轉移視線睇具備拍高清短片既數碼相機,經過老公既一輪研究,Panasonic有兩款都合老公心水,多番試機,又因為豐澤係星期六用渣打卡有10%回贈,最後老公終於決定買呢部Lumix FZ28,折後約三千三百蚊~~
我相信男同女既思維真係有分別,其實我因為囡囡而想買打印機或者具備高清拍片功能既數碼相機意慾不大,但係老公就好熱切....我都明白係因為老公愛錫囡囡而提出既要求,所以雖然我覺得唔係太必須,但係都批准佢買~~
為了囡囡而買的打印機
打印機對於吳家黎講用途不大,屋企部laser printer都好少用...要印野通常都會係公司搞掂...但係今日老公卻專登去電腦展買左部打印機番屋企~~
原因不外乎係因為囡囡,老公話想幫囡囡印相喎~~其實我覺得拎出街晒相都好平,唔使買部printer番黎自己印咁麻煩,都唔係好支持老公既方案~~
但係老公又話唔鐘意拎出街晒相,佢話驚人地save起囡囡d相喎,又話自己印可以整多d花臣...總之佢就係鐘意自己印啦~~既然係咁我都無佢符,咪同佢去睇下d印相既打印機lor...真係有平有貴,平既唔使一千蚊,貴既去到千幾二千都有~
老公話電腦展應該會比較平,於是今日佢就約左同事放工之後去行下,結果佢買左呢部brother既printer,承惠$398....比市價平左三百蚊,除左印相仲有掃瞄功能....買機仲送左部買餸車仔添(老公話有呢部車仔方便佢運送番屋企喎),當然都有相紙送啦~~
唉,四百蚊都唔算貴既,起碼滿足左老公既要求...睇下佢係咪真係會幫囡囡印好多相
坐月好幫手 ~ 薑皂
呢包咁靚既東東就係我訂既薑皂勒
根據傳統既智慧,坐月期間唔可以接觸生水,否則第時好易有關節痛或者風濕問題~~除左煲薑水之外,我係網上見到有人會用薑黎整番皂,效果相同....雖然我都應該會煲薑水,不過有埋薑皂就仲好啦,雙重保險,我唔想第時有後遺症呀~
呢d薑皂市面無得賣,一般都係用家自制既....有幾位有心人會接受預訂,有單就自制,價錢都係接近成本價,通常都係$30一件大約70g-80g重既薑皂....有得訂當然方便過自己整啦~~雖然我見自制既方法都唔算太難,但係買皂基呢d材料都有d麻煩,所以都係上網訂啦~
睇左幾個網上訂購點,最後我決定係http://hk.myblog.yahoo.com/handmadekae/article?mid=64落單~~
無他既,因為佢係最抵lor...只要訂夠半打就可以有9折,折左之後為起每件薑皂(80g)都係$25...而且有多幾種成份選擇,估唔到包裝仲好精美,真係送禮自用都得呢~
我訂左3種成份配方,每款2件,左至右分別係
蜂蜜薑皂:應該比較滋潤,我會中段使用
純薑皂:呢個應該一開始坐月就用
牛奶薑皂:我想試下有牛奶係咪真係會滑d,應該到最後期先用...不過拎上手既質感都覺得比前兩款軟身~~
其實佢仲有黑糖同檸檬兩種,而且可以選擇唔同形狀...不過我覺得圓形最方便,所以都唔搞咁多花臣,全部都要圓形~~希望d薑皂真係發揮到功效啦
2008年8月23日 星期六
2008年8月22日 星期五
鼠年首個9號風球 - 鸚鵡
估唔到一個月之內有2日颱風假期~~這些額外的假期最大的好處就是令老公可以將要做的家務做好,今日一整天終於將囡囡的東西收拾好,放了入沐浴櫃了~
今次既鸚鵡仲要掛到9號風球添,吹到正一正,夜晚係屋企聽到出面強勁既風聲都唔好話唔恐怖~~
老公都話如果掛10號佢好有興趣落街感受下d風,我就當然唔係太贊成啦,咁危險....不過老公最後都有落街買野食,好在個時應該係風眼內,無風無雨~
我都唔明點解d人係咁高風球之下仲要去海邊玩,明知危險都要去,有d仲帶埋小朋友添...究竟係咪有病呀?我覺得無事係你好彩,有事就係自己既責任啦~
電視新聞中訪問那些玩命的人,那人說我們不是痴線的,如果真的太惡劣我們是不會下水的啊~~是嗎?我在質疑他是否真的能夠判斷什麼是太惡劣?天文台以其專業及科學數據掛起了9號風球,難道還不是惡劣的情況嗎?
我只是覺得這些行為真的很不負責任,追尋刺激也不應該是這樣啊~
2008年8月20日 星期三
拍拖8週年紀念@Apple Green
如果由正式拍拖日子起計,今天 - 2008年8月20日就是我和老公拍拖8週年紀念的日子
雖然已經結了婚將近3年,不過我們還是會去吃頓飯慶祝....本來老公想去天文臺圍的一間印尼餐廳吃飯,可惜原來已經轉了其他餐廳~~結果我就提議去一間開了不足一年,但在openrice也有很不錯評語的餐廳 - Apple Green
Apple Green位於尖沙咀河內道,幸好今天是星期三,我們沒有訂位也不用等~
食物真的不錯,特別出色的是兩個主菜~
Garlic Bread ($22)
Glassic Casear Topped with Grilled Chicken (半份$51)
Carbonara ($78):意粉真的煮到剛剛好,醬汁美味,yummy
Cajun Blackened Rib Eye Steak ($228):我們要了7成熟,這塊rib eye有12安士,味道和肉質均不錯,算是值回票價...而且伴碟的薯仔,粟米和菜也很好味~
老公也對食物很滿意,而且覺得這裡的待應服務很貼心...例如會拉開餐檯給讓我這位大肚婆有多些空間入坐,主動送來暖水給我,指示老公洗手間位置並推門讓他內進~~
如要扣分就是這裡比較嘈,影響了氣氛...而且餐廳面積不大,檯與檯之間比較逼呢~不過我們還是很滿意這一餐....有機會相信會再來~
2008年8月19日 星期二
Hallmark Babies禮物盒
逢星期日老公都會番教堂聚會既,佢既小組入面計埋我總共有3位大肚婆,非常熱鬧~
在剛剛的星期日其小組領袖買左好多禮物俾3位未出世既BB喎~~
囡囡就收到呢盒Hallmark Babies衫仔勒,有2件衫仔,一對手套同埋一條手巾仔...非常漂亮呢~而且仲連張VIP card都俾埋我地,可以享有既優惠包括
Regular Price Product 10% off
Fixed Price Product 5% off
Purchase $2,000 gift voucher and get Free $200
Additional 5% discount in your children's birthday month
Enjoy Private Sale
Bonus Point Program - Purchase $1 = 5 points, accumulate certain points can redeem free gifts.
雖然我好鐘意Hallmark Babies,不過無疑佢既價錢實在偏貴,我諗我都要等佢做sales先會考慮買架啦~
2008年8月18日 星期一
2008年8月17日 星期日
Shopping@Baby Outlet
之前係BB展因為太多人,而且價錢又不是很便宜,所以沒有買到專用來洗BB衫既洗衣液~不過因為都差唔多時間要開始洗BB衫,所以不得不去買回家~
由於沒有特別地方做特價,那麼這些平常的日子都是去樓上舖買比較便宜~~於是今日買完耳仔探熱計就同老公去左旺角既Baby Outlet...平時要買滿$300先有9折,不過上次係BB展拎左張9折卡,宜家就算買幾十蚊都可以有9折呢~
老公話覺得洗衣液比洗衣粉好,所以買左
Chuchu洗衣液(1枝樽裝600ml - 9折後$70 + 1枝補充裝500ml - 9折後$49)
另外老公又話要買棉花棒,咁我就選左Boots呢個牌子(300枝,9折後$16)
仲買左Tommee Tippee既Baby Nail Care Set (9折後$29)
9折後既價錢都算ok啦,唔知仲有咩未買呢?
百靈牌耳仔探熱計
究竟幾時先可以買齊囡囡要用既野呢
好早之前老公已經嚷著要買個耳仔探熱計,佢話呢個係一個好重要既用品喎~~初初我並不以為意,因為屋企已經有個電子探熱計,不過就係超普通個d~
但係眼見宜家d病菌真係好厲害,睇黎有個準確既探熱計都係必須既~~於是我又開始研究呢個產品同價錢...結果好多人都話百靈牌既耳仔探熱計係比較好既,好多兒科醫生都係用佢添....價錢大約係$499,我見最平有人買既價錢係特價$399~~
今日就同老公去格下價,點知咁o岩做緊特價,豐澤同百老匯都減到$438,另外仲有隻model差唔多但係就貴$60,sales話差別在於一個有8個記憶體,一個只得1個記憶體,不過要d記憶體都好似無咩用,於是我地就覺得買平d個隻已經ok~
因為今日係星期六,原來係豐澤用渣打信用卡有多10%現金回贈,咁即係有9折啦~~計落只係$394.2,仲要送40個耳套添....抵呀抵呀,於是立即買左佢番屋企勒~
2008年8月16日 星期六
2008年8月15日 星期五
第八次私家產檢(34 weeks)
星期五去私家醫生到檢查,本來約左下畫4點,點知醫生突然又要去醫院做手術,姑娘叫我3個鐘之後先番黎喎~~
就係因為咁,老公就趕得切放工之後黎見下囡囡勒~
4星期之後再磅重,我重左5磅,算係正常啦....累積已經重左35磅啦,睇黎到我生時應該共重40磅~~哎,我真係擔心唔知減唔減得番呢
醫生話囡囡宜家有2.5kg,咁即係有5.5磅啦...比上次重左3磅喎,唔怪之得我覺得個肚重左好多啦...醫生話size正常,唔大唔細係中碼BB喎...不過我覺得仲有3個星期先足月,睇佢宜家重得咁快,應該都有機會成8磅重喎~
醫生今日又同囡囡照下4D,見到囡囡"do"咀呀,好搞笑...所以醫生都印左張4D出黎俾我,不過又無收貴我喎~(老公話似我多D喎)
醫生話因為我高大,廣華一定要我試順產喎....其實我都係諗住順產架啦,所以無咩所謂啦~
睇黎睇多一次私家都應該生得架啦~~
2008年8月14日 星期四
2008年8月12日 星期二
意大利嬰兒沐浴櫃
真係買開唔停手,今日又一件大型BB傢俬加入吳家啦...佢就係我睇左好耐既沐浴櫃啦~
正面睇:4個櫃桶
睇面睇:放置沐浴清潔用品既側盆
櫃頂:用黎幫囡囡換衫/換片或者抹身既軟墊,有可愛既公仔圖案~
揭開軟墊:就係浴盆勒...個浴盆仲可以成個拎出黎架~
呢個沐浴櫃真係意大利牌子黎架,大大隻字寫住Made in Italy架~
其實沐浴櫃真係唔多地方有得賣,通常都要係d大型既嬰兒用品店先有,而且大多數都係意大利貨,價錢起碼3千以上....稍為平d既就係0/3 baby個張,不過都要$24xx...係BB展既荷花counter見到做緊7折又係要$24xx,不過已經賣出左~~
就係我同老公諗緊係咪去0/3 baby買沐浴櫃既時候,俾我搵到呢個櫃...大家睇相有無覺得有d唔妥?其實個櫃無唔妥,只不過佢係一個二手既沐浴櫃o者~~
唔知大家知唔知有間叫"環保媽媽"既舖頭?佢係提出一個環保循環再用既理念,以較便宜既價錢出售二手既嬰兒用品....佢地出售之前一定會進行清潔消毒或者維修都會架~
我就係係佢既網頁見到呢個沐浴櫃,根據佢既形容新淨度係90%....但係價錢只係$1390,係宜家買個四桶矮櫃都要差唔多一千,所以我就叫老公一齊去睇下勒~
佢個showroom係魚則魚涌,我地星期六個日就去睇下,有實物睇就真係可以了解件貨既二手程度,我地覺得真係好新淨(白色櫃真係呃唔到人架),而且質料好好,櫃桶開關亦好順滑,我地考慮左一陣就決定買勒~~我問佢地係咪要自取,佢地話可以幫我地call車,以我地屋企既地址大約要百五蚊....不過我同老公都想慳番呢個運輸費用,咁就當然要搵阿爸幫手啦...爸爸當然話無問題,個櫃亦可以繼續放係佢地度先,下星期去拎前先聯絡佢地....結果今晚爸爸就叫公司既司機送黎俾我地啦~
我覺得呢間"環保媽媽"都幾好,個日既sales仲介紹其他超荀既二手貨俾我,有d都好吸引,好似無用過咁架....不過亦有d比較殘舊,所以真係要親身上去showroom睇清楚~~佢地有d市面比較少見既牌子都有架,留心d應該可以搵到好多荀野呢~
我同老公都覺得呢個沐浴櫃真係好抵,sales仲收平我地十蚊添,哈哈~~而且我地都知沐浴櫃唔用得幾耐(囡囡大個d浴盆就唔夠位啦),所以買二手都可以接受啦~
http://www.eco-mama.org/entrance.html
2008年8月10日 星期日
值得驕傲的奧運開幕禮
由細到大都覺得奧運開幕表演好沉悶,而中國一向既文藝表演又係老土到死既,所以都無期望到北京奧運開幕有任何睇頭~
不過因為行BB展實在太攰啦,所以夜晚我都坐定定睇北京奧運開幕~~
估唔到北京奧運開幕辦得如此出色,真係每分每秒都咁精彩,驚喜處處...現代表演手法卻蘊含中國文化特色內容,電視上的畫面確實震撼人心....真的覺得身為中國人而驕傲和感動~
張藝謀果然是張藝謀,以人為本,很有氣勢...相信現場觀賞的話一定更加震撼,真的不得不寫下感受作紀念呢~
0/3 Baby: Sabrina 嬰兒床
不出所料,BB展真係無大型既BB用品賣,除左荷花自己有放BB床,BB車等貨品,其他都唔係好覺有得賣~於是我就可以一心一意買我之前同老公睇中左既0/3 Baby 嬰兒床勒~我同老公覺得佢既質料唔錯,係用德國櫸木,而且包埋4吋既椰棕彈弓床褥,好似話佢既床褥質素都幾好架,所以就決定買佢lor~
其實0/3 Baby 嬰兒床有好多model既,我除左唔鐘意佢既Sara摺疊式bb床之外,其他我都覺得幾好而且分別不大...咁o岩呢期0/3 baby選左兩款model做8折(所有銷售點都係8折),一款就係Sara,另一款就叫Sabrina....於是我就決定買呢張Sabrina 嬰兒床勒~
雖然所有銷售點都係8折,不過我一定要係星期五去永安買架,點解呢?因為逢星期五用HSBC信用卡係永安百貨(當然仲有一田百貨,sogo等等)買滿$800就可以有10%現金回贈,咁即係8折之後仲可以有多9折喎,(原價$1850,8折$1480,再9折$1332)....其實即係有成72折,實在係抵買時機呀~
所以行完BB展就拉老公番去佐敦永安買埋張BB床勒~~
底板設有三個高度可供調節
適用於初生至３歲
加有防咬膠邊，確保使用安全
附送4寸椰棕彈弓床褥
尺碼：43 x 27" (外圍)
木材：德國櫸木
2008年8月9日 星期六
思詩樂:日本純棉の專家
除左係BB展買左奶泵同埋揹巾之外,我仲訂左同BB清潔既日常用品,就係好評如潮既日本品牌 - 思詩樂
思詩樂潔淨乾棉120片裝:根據之前既格價行動,街價普遍係每包$28-$29~~今次會展價只係每包$25,而且仲係加碼新包裝,每包再多20片架....絕對係超抵買~
思詩樂潔淨濕棉30片裝 :呢款濕棉街價通常都係每包$27-$28~~今次會展價每包賣$20,平左好多呢~
佢個攤位不知幾多人,我同老公好辛苦先迫到入去買....原來買滿$500仲可以免費送貨,咁梗係買夠$500啦,於是我就訂左10包乾棉,10包濕棉,呢度已經用左$450....另外要左枝思詩樂全身用潔淨泡沫500ml(會展價$45)及嬰兒純棉手套2對(會展價$15)...一共$510,sales姐姐仲送左5樣贈品俾我,不過我已經唔記得係咩啦,佢係張單度只係寫左贈品編號咋,會係送貨時一齊送黎....估唔到買棉花都左成5百蚊,所以話BB用品真係特別貴~~
MEDELA Swing 思韻型奶泵
為左堅定我餵母乳既決心,我一早決定不惜功本買個好既奶泵~~其實奶泵有平有貴,平平地幾百蚊都可以有個,但係奶泵係返工時用,所以輕便,快捷,安靜都係我既要求...睇左唔少媽媽既經驗,口碑好既分別係medela swing思韻型奶泵($1620,最平見過有地方賣$1300)同埋ameda lactaline 輕便型電動雙泵($1720)...
今次expo,medela有攤擋,買swing送埋冰袋(包一大一細冰袋,冰種,仲有4個儲奶樽),平時買要$480架喎~而ameda係會展就只係平左一百蚊...問左老公意見,又驚雙泵拎番工麻煩,所以最後用$1620買左swing勒~
加上medela既sales好詳細解釋俾我知用法,清潔,保養等事項,又可以用信用卡俾錢,仲有一年免費保養添...所以我都覺得幾抵買架~
另外仲送左呢本書仔俾我呢~
美國 Slinglings 親子揹巾
之前報左baby outlet既講座,我同老公真係有去聽到架,講座仲示範左3款sling既用法,分別係有扣,無扣同埋雙邊既sling~
本來我對新出既雙邊sling最有興趣,不過價錢差唔多貴普通sling一倍,而且老公好似鐘意簡單d既無扣sling....結果我地就買左呢款無扣sling勒~
我因為比較高大,所以要買size24,而老公都o岩size,可以share用呢~
門市做緊85折,折實$330...而會展價就係$310,而我因為報名聽sling講座,所以送左張$100 sling coupon....而我咁好彩想買呢隻花既sling係最後一條,咁sales姐姐話無新既,平d賣俾我(其實佢都係o岩o岩拆袋示範俾人睇,所以根本同新既無分別)...最後佢平多$30俾我...雖然我用左$50報名,但係$40算係入場費,扣扣埋埋,其實呢條sling只係要$190,可以話係好抵既價錢呢~
希望囡囡會鐘意我用呢條sling黎揹佢啦
2008年8月8日 星期五
第一次行BB用品展
久聞每年一度既國際嬰兒及兒童用品博覽係媽媽界中既盛事,每次都吸引不少人入場,今年係第16屆啦...我覺得咁多人去應該都有唔少吸引既優惠...但係好多人話已經一屆不如一屆,而且人多且逼,挺著8個月肚子的我其實也有少許猶豫應不應該去
不過以我既性格,唔去睇下點都唔甘心既,所以我決定點都去睇下,只多搵埋老公做護花使者兼阿四....而且今屆第一日係星期五既番工日子,我諗情況會好少少卦~(我覺得都算行得到,但係都已經唔少人...相信如果星期六日去既話一定插針都插唔落)
可惜今朝廣華檢查有阻滯,唔可以一早過去會展,結果下畫2點幾先去到會場~因為知道上年排隊買飛都打晒蛇餅,我今次預先報左Baby Outlet既講座拎左2張入場卷,唔使排直接就同老公入場勒....不過就無得拎佢本優惠小冊子(要俾正價買入場卷先有),如果想拎贈品就要靠呢本小冊子,可惜我地無,所以唔使周圍去拎贈品...不過我地見好多攤擋都話贈品已經派晒,我諗就算要拎都要一早入場先得~
既然贈品無得拎(我都有d失望架),咁就去睇下我既目標貨品啦~不過其實都唔係平好多,有時吉之島或者永安做減價都係差唔多價錢,所以有d都無買,費時迫入攤擋同排長龍俾錢...咁當然我同老公都無空手而回既,我地都買左幾樣野架~
公公的禮物 - Dr Brown's 奶樽
雖然我希望以母乳作為囡囡既主要食量,產假期間當然是埋身餵啦,但相信總有要用奶樽的日子,所以奶樽還是要準備一下的~
我沒有仔細研究各奶樽的牌子,因為我的爸爸很早就告訴我他有朋友做奶樽代理,可以幫我拿幾個....有免費奶樽提供當然歡迎啦~
今天在廣華檢查完後順道到爸爸的公司拿奶樽,原來牌子乃是Dr Brown's,擁有專利內置式氣管系統設計,可以減少嘔奶既問題,價錢比其他牌子的奶樽偏貴的呢,估計呢度都值大約三百蚊~
爸爸幫我拿了6個8oz標準奶樽,相信應該足夠,而且也是他作為公公送給外孫的禮物呢~
第五次廣華產檢(33 week)
今日係08年8月8日,除左係北京奧運開幕日之外,亦係我去廣華檢查既日子~
今次如常9點左右去到,好快就到我檢查,姑娘摸左一陣個肚之後問我有無去私家照超聲波,我話下星期先去照...由於姑娘今日摸肚時唔肯定囡囡頭仔係咪轉左係上面,結果姑娘都係要照下先確定(我係第一次係廣華照超聲波咋,不過我無得睇呢)....好在姑娘照到囡囡頭仔都係向下,不過佢話因為頭仔係後面所以摸唔到~
另外姑娘話我上次既血糖報告無問題,血色素非常好,血糖指數亦偏低,所以我唔使飲糖水啦
...本來9點半左右已經檢查完,可惜今朝帶去既小便話有d問題要我再留多次黎驗先可以走....唔知係咪愈想有就愈無,老公買左2枝水要我飲晒佢,點知飲晒一公升既水,等左2粒鐘都仲未有得去小便....真係激死我,我好想走呀~~
等呀等,終於12點幾先完成任務....如果到1點都未有得去,醫院lunch time到,我仲要2點再番去添呀....幾驚要2點番去呀~
老公話原來有得去小便係咁開心既,哈哈~~可惜咁就浪費左我同老公2個幾鐘,我本來諗住早d過去灣仔會展行BB展架麻~
2008年8月6日 星期三
鼠年第2個8號風球 - 北冕
今年d颱風都幾旺喎,仲係正番工既日子,大部份打工仔都可以享受一下打風假期~
雖然打風可以休息下,但係屋企既寬頻竟然都俾呢個北冕打散左,一早就上唔到網....電視又無野睇,出面風大雨大老公又唔肯陪我出去搵d娛樂(本想去the grand睇番場戲都唔俾),真係悶到發慌~~
不過老公就好繁忙,佢將平時無時間做既家務都係呢個日額外假期完成左,特別係洗手間,真係乾淨左好多呢~
可惜呢個風令老公去唔成大學既o'camp宵夜,佢不知幾失望...上年又係因為打風除消左,估唔到今年既命運都一樣,唔知出年老公去唔去得成呢?
2008年8月4日 星期一
懷孕後期的不適(32 weeks 4 days)
轉眼已經去到孕期既32週,即係8個月啦~~番工番多一個月左右就可以開始放產假啦....非常期待呢~
呢排開始出現懷孕後期既不適,雖然我個肚圍已經定左係42吋呢個尺碼,不過我同老公依然覺得個肚不斷漲大,肚肚愈黎愈重,我隻腳開始唔係好夠力支撐上半身既重量,所以行路好慢好慢,而且好快就會覺得攰,但係我都會盡量行多d,希望可以幫助我順利生產~~
除左隻腳唔夠力之外,呢期既睡眠質素極不穩定,有時可以成晚都瞓唔著...因為無論用任何睡姿,始終找不到一個舒適既姿勢睡覺,不得不轉身,可是轉身又要花好些時間....就算入睡了,沒多久就因血液循環太慢令雙手麻痺而要轉換姿態,結果又醒了過來...仲有,囡囡宜家郁得好厲害,我個肚好似個洗衣機咁,成日搞下搞下,轉下轉下,仲要一痴住爸爸就狂踢,有時真係踢到我都有d痛架~
如果睡不好,翌日我就會開始頭痛,加上腰骨和恥骨也開始不適,結果是周身骨痛....好像一個廢人似的,不想郁動,但係唔郁動下又會更加無精神,所以好矛盾~~
雖然呢期真係好辛苦,不過我始終想囡囡係我放產假既時間先出世,唔好打亂我既計劃呀~~
2008年8月2日 星期六
Origins推廣@海港城
老公用護膚品既速度真係好驚人,我既皮膚因懷孕既影響變得極差,就算用咩護膚品都無用,於是我只係做最基本既洗面同埋搽眼搽lotion就算...其他野就只有老公拎黎搽,但係佢一個人用都可以好快用晒...忍左好耐無補貨架啦,不過見origins罕有地係海港城做promo,於是今日就同老公入貨~~
老公話佢一定要買make a different($320)喎,而我就想試下佢新出既白茶洗面cleaner($200),咁就買左呢個set,除左有呢兩樣貨size之外,仲有枝貨size既白茶眼霜($300),30ml既白茶面霜、 50ml白茶toner、15ml白茶精華、 一張make a different既mask...呢set野只係$870(原價好似一千二百幾架)...另外老公仲話要補多枝drink up($200),咁個sales再送左3枝sample仔俾我,分別係ginger body cream(我諗佢見我大肚所以俾我既),白米煥膚同埋深層清潔面膜....就咁又使左成千蚊啦~
唔知夠老公用幾耐呢
Momo Cafe@香港萬怡酒店
因為無食到一餐像樣的生日飯,所以我決定呢個星期六去食番餐tea buffet,不過呢個tea buffet係由1pm至5pm咁長架,所以做埋lunch都仲得....就係上環一間新既酒店~香港萬怡酒店既Momo Cafe...其實就係JW萬豪集團既副線(Courtyard by Marriott Hong Kong),所以食物質素都唔使擔心,但係價錢只係每位$128,用HSBC信用卡仲有85折,白金卡更加有75折添呢,咁抵食就梗係去試下啦~~
有多款沙律、 pizza、 豬頸肉、 熱狗、 雞翼、 盅飯、 天婦羅、 雞粥、 韓式煎蛋餅、 炸魚柳、 即製法式薄餅、 椰汁西米露、 豆腐花、 蛋撻、 鬆餅、 朱古力噴泉、 雪糕...仲有任飲既果汁(芒果香橙或者士多啤梨香蕉乳酪),仲包餐茶一杯(不過杯餐茶好難飲,我情願飲果汁)
我覺得呢個價錢,食物都算幾多呀,而且味道都算ok架,好似呢碗雞粥咁都幾好味架~我同老公飽到晚飯都食唔落呀~
呢個tea buffet只係做星期六、 日或公眾假期,之不過大家一定要book位呀,我前2日打去book,佢地話要到9月先有位,咁我問佢會唔會留檯俾walk in客,佢地又話唔會,不過可以寫我落waiting list,前一日佢地confirm booking時如果有客cancel就會俾waiting list架啦...好彩我收到電話,不過就要3點半交檯,我見都有成2個半鐘食都夠啦,所以就照去勒,都幾滿意呢~
訂閱：
文章 (Atom)