如果唔係天氣不穩,老公本來打算同我入去中大影番輯大肚相,不過因為驚落雨,所以最後就無起行~~
結果去左旺角pizzahut食晏,之後都無咩地方想行,但係我又唔想番屋企,結果我就話去睇戲~~一諗到囡囡出世之後想去戲院睇戲都幾難,所以都諗住係生之前睇多幾次...而老公亦有好多戲話想睇...
今次既奪寶奇兵第四集,老公一早都話想睇架啦,於是就決定同去入場睇下啦~~不過開頭我地兩公婆都覺得好眼瞓,真係差少少就會瞓著個隻,好在頂得住,睇到後期開始精神番好多勒~~
老公話第一同第三集都係好好睇,不過今集對佢黎講就比較失望...而我就覺得ok啦,奪寶戲我一向都唔係特別鐘意既~
番到屋企明珠台仲播番第三集,我又陪老公睇下,咁又好似第三集好睇d喎~~
而且今次囡囡都無上次睇鐵甲奇俠個次郁得咁厲害,我諗囡囡都係麻麻地鐘意睇,哈哈~
星期六同老公去左逸東酒店聽個免費講座,係有關母乳餵哺及BB疫苗講座~~
原來主講醫生就係我睇開既靳醫生,好有親切感呢~
雖然係我身邊既媽媽級朋友並不是很多人堅持餵哺母乳,但是我亦見到有成功既例子,希望我都可以堅持做一個成功既母乳媽媽~~
老友星期日就會番澳洲啦,每次我都會盡力係佢走之前約多d小學同學出黎見面聚下食餐飯,今次都唔例外~~
雖然我星期頭開始作病遲左打電話,不過琴晚個飯局最後都有成9位出席,成績唔錯架~
今次去左北角食飯,地點好冷門呢,不過因為我地間小學係炮台山,好多同學都係住北角架....我以前都係,今次去北角食飯順便緬懷下小時候既成長地啦~
希望係我生之前可以出席多d朋友聚會,我成日都驚囡囡出世後我就唔可以出席咁多朋友聚會架啦,所以宜家要去多d~
今日終於買左囡囡第一份大型用品,就係Aprica搖擺餐搖床椅勒~
其實我諗應該買BB床先既,不過因為我地打算囡囡出世後先開始整BB房,初生時都係諗住同我地一齊瞓,但係我地間房比較合適放BB床既位置只可容納大約20-22吋闊既BB床,但係我地睇左好多地方都只係搵到最細24吋既床仔,所以一直為此很苦惱
由於今日又係SOGO半年一度既週年慶,另外永安百貨又做酬賓日,好多BB貨品都大減價,我見Highchair都有成7折,於是開始格價同比較,睇下係咪入貨時機~~
而我搜集到既情報,受歡迎既Highchair不離combi同aprica,不過我比較鐘意aprica,但係佢唔係好多地方有得賣,起碼吉之島就無勒~而在眾多款式之中,我最鐘意既就係aprica model no.680,而佢亦係最貴既一款~~
經我一輪格價查詢之後,我決定唔會等8月會展既BB展入貨,因為從朋友經驗中得知,BB展都係日用品最抵買,反而大型BB用品(BB床/BB車/BB Highchair)並非想像中平,好少人會係BB展入貨~~
而平常既日子不少人都話將軍澳南豐廣場內一間叫愛嬰坊賣aprica最抵,不過今次永安同SOGO減價反而更抵,所以今次真係入貨良機~~等我將aprica既highchair資料比較下啦~
Aprica model no. 589
愛嬰坊 $1680
永安(原價$2200) - 酬賓日七折,即$1540
Aprica model no. 625
愛嬰坊 $2000
永安(原價$2900) - 酬賓日六五折,即$1888
Aprica model no. 680
愛嬰坊 $2800
永安(原價$3900) - 酬賓日七折,即$2730
SOGO(原價$3990) - 週年慶折後$2688(限售10張),用Sogo Visa再享額外95折 - 即$2554~
以上3款都是幾受歡迎的Highchair,而我就極喜愛Aprica model no. 680,不止款式漂亮,功能也是3款之中最好的,雖然打折後也比Aprica model no. 589貴上一千元,但是就是想給囡囡最好的,所以還是去了Sogo買下了~~我去買時也正有位大肚媽媽想買呢,不過因為6月尾才送貨,她說還有兩星期就分娩,想早點取貨,但sales也無能為力,那媽媽很是失望呢...而我就當然沒有問題啦,加上我有Sogo Visa,所以真的是以最抵的價錢買了最好的東西給囡囡呢~
我還打算在囡囡初生時將這個highchair兼做BB床,闊度有22吋,應該可以吧~~
http://www.aprica.com.tw/SEIHINN2/High_Low_chair/item-k_r2.htm
之前老公已經拎左隻俾BB聽既CD番黎,不過我覺得d音樂好似悶左d,而且聽左幾次寶貝都無反應,郁都無郁一下...我諗囡囡同我一樣覺得d音樂唔吸引啦~
今日去檢查,醫生送左呢隻寶貝莫札特俾我,話多d開俾BB聽,佢話BB聽左一定會郁喎~~好啦,見呢隻碟既曲目比較吸引,就開黎聽下啦....啊,囡囡真係有反應喎,既然係咁等我得閒就聽多d先~~
本來應該遲多2個星期先去檢查,不過因為醫生要放大假,所以提前左今日~
檢查前約左阿媽飲茶,傾傾下阿媽話我係BB既時間係最難湊既,唔肯食奶,食完又嘔奶,兩個月就要食糊仔,又要人陪瞓,大人一醒想行開我就即刻醒,去健康院打針之後次次都病成個星期...希望囡囡第日唔好似我咁難湊啦
今日照超聲波時囡囡特別郁得厲害,一路照我就感到個肚一邊郁,今次第一次好清楚見到囡囡既脊骨添,因為突然提前老公請唔切假,今次係我一個單獨赴會,老公番黎見到d相睇得好詳細,佢話囡囡脊骨好長,第時一定係高妹....另外影左囡囡個樣,醫生形容呢個階段影出黎個個都係蜘蛛俠咁既樣,所以我都係唔post出黎勒...不過老公話個面形好似我,都係下巴尖尖,瓜子口面喎...咁即係靚女啦,哈哈哈
脊骨
手仔
大脾
哈哈,唔知係咪琴日收到兩件衫仔覺得好可愛就點燃起買BB衫既慾望,於是今日就成為左出血日勒~~一早陪老公去整牙,佢有隻蛀牙要補,另外因為太多牙肉蝕左露出好深既牙腳,為免日後無得補求,所以唯有同佢補番下啦,今次補住上棚先,整一整足足用左三千蚊
...嘩,好貴呀,不過為左老公既牙齒健康無辦法啦~
食完晏,我地去左海港城,因為今次既特賣場係做嬰兒小童衫及用品展,我同老公就上去睇下...全部都係名牌黎架,而且都減得幾多,我地睇左好耐呢~
首先買左一套10件既初生嬰兒套裝(0-3month),分別有
sleepsuit(長袖) x 3
bodysuit(短袖) x 3
bibs(口水肩) x 2
mitten(手套) x 1
hat(帽仔) x 1
原價$318,宜家只係$119就有10樣野,我覺得好抵呀,呢個係英國牌子黎~~計埋琴日收到既2件bodysuit,我諗頭3個月既衫仔都夠替換啦卦
雖然全場有好多牌子既衫,不過有d賣既比較大個,所以都唔係太o岩...而我一向都覺得hallmark既衫好靚,我聽到好多媽媽都話全場最靚既衫都係hallmark呢~~最大件事係hallmark好多bb衫呀,我同老公睇到愛不釋手~
因為囡囡3至6個月大時就係冬天,所以我地就睇中左hallmark既冬天衫勒~~一款係一件過粉紅色既overall pants(原價$328),另一款係分開3件粉藍色既外套加狗仔工人褲, 上衣(原價$138),外套(原價$368),工人褲(原價$488)~~
呢兩款衫既質料係大家冬天著既羽絨防水面黎架,相信用黎做bb衫真係好少見既,全場都係得呢兩隻款,仲要係最後一件添,所以我好鐘意呀
...老公都覺得d衫好可愛,質料又好,佢話囡囡一定著得好舒服喎~於是忍唔住就買晒兩套勒,宜家呢度所有都係7折(我睇過就算係hallmark既vip member平時只係得9折,而crown memeber最多都只係有8折架咋,所以7折已經係好抵架呢),雖然折完都要九百蚊,不過已經慳左4百蚊架啦~
囡囡,你d衫真係唔平呢,仲係靚野黎架....我都未捨得買咁貴既衫俾自己呀~~不過我諗都係等囡囡出世先再買衫仔啦,黎緊應該要買bb用品多d~~
好開心呀,我既死黨又係澳洲番左黎香港啦...雖然只會逗留短短兩個星期,不過當然要出黎見下面啦,而且佢都要見下我個大肚look
我仲以為佢會想食中菜,點知佢話番香港之前去左加拿大探親餐餐都係食中菜,所以就話最好食其他...於是我就同佢去左食日本野既和民勒~
呢期和民同DBS卡做緊優惠喎,我地叫左個原價$260既套餐,宜家只係$206咋,有
香薯煙肉牛油粟米
鰻魚芝士卷
明太子芝士豆腐
豬扒鍋
和風pizza
雞肉野菜燒
單球雪糕 x 2
活乳酸梳打 x 2
2個人可以坐到4人卡位,食得好舒服呢....我地慢慢食,食左兩個鐘先走人呀,因為我地實在有太多野要傾啦,當然我講左好多我懷孕既感受啦,都好少可以咁盡情咁講,只要見到呢個識左廿幾年既死黨就咪都會講晒出黎~~
其實我地一直都未買任何有關囡囡既東西,老公話7個月先開始睇都未遲喎~~不過有樣野我地已經煩惱左好耐,就係幫囡囡改咩名好呢~~老公話呢份係我地送俾囡囡一生一世既禮物,好重要,所以佢好緊張呢~
之前由於一直以為係仔,所以老公都係諗男仔名先,因為姓吳實在太難改名啦,所以諗左好耐都唔滿意,不過最後都有決定,之後先再諗女仔名…點知後來知道係囡囡,我地就想再諗下,因為上次係由男仔名引申去女仔名既,不過既然知道係女,我諗我地都會再諗清楚先得…大家有無好提議?
不過知道係囡囡後,我反而幫囡囡改左個英文名喎~~本來我一直都覺得改唔改英文名都無所謂既,等囡囡第日大個自己幫自己改都無問題,不過我都見好多時係因為學校要改英文名先是但作一個,所以既然我諗到就決定用啦…囡囡既英文名就係~~~Abby~~~啦
等我解構下呢個名既意思啦~
雖然老公係不同既朋友圈之中有不同既英文名,不過我當然以我識佢既時候佢所用既英文名為正統啦...而佢個英文名既字頭就係A勒,而我既英文名既字頭就係Y勒...而囡囡係我同老公既BB,所以就即係A同Y既BB啦,咁就成為左Abby呢個名啦~~而我係網上搵到Abby既意思係解"被神父喜樂的",咁都幾好呀,因為老公已經話會同囡囡做BB領洗架啦....暫時黎講,我對呢個英文名好滿意,所以九成以上機會都會用Abby架啦...大家又覺得點呢?
大肚婆係應該呼吸多d新鮮空氣既,所以今日就去左赤柱走番轉~~
老公話不如帶隻公仔去影下相,於是就拎左阿May一齊去啦,哈哈,我都有拎住阿may影相架,超低能呢~~
好開心既赤柱一日遊
一連3日假又點可以浪費掉呢,雖然今日長洲有飄色巡遊我地都好有興趣去睇,但係見到咁多人好驚太逼,所以都係打消左呢個念頭~~
於是我地改左去赤柱行下,屋企樓下有架973直達赤柱,不過車程要成1個鐘,我地11點上車,去到已經好肚餓,於是即刻去美利樓搵野食....最後去左King Ludwig Beerhall食lunch buffet($168 per person),可以食到3點架~~
我知道想坐望海景既位應該要訂左先得既,本來經理安排左我地坐室內,點知後來佢見到我大肚就改左張檯,俾左張海景位我地呀,囡囡真係勁啦,未出世已經可以拎到著數,睇黎有我既著數王潛質喎,哈哈~
其實我覺得食物同我之前係尖東個間食既tea buffet差唔多,不過可能好耐無食,依然覺得好好味,特別係馳名咸豬手,真係好正呢~老公亦盛讚其煎龍利柳,真係好少有呢...仲有好味道既白汁意粉....其實仲有龍蝦仔,不過我唔食得,無辦法啦~~
對住靚景,又有海風輕彿,真係好舒服呀...所以價錢俾tea buffet貴都無所謂啦...食完仲有餐茶架,好嘆既午餐,足足食左兩粒鐘
雖然今次係我大肚過既母親節,不過吳生都無特別表示喎...算啦,都無咩所謂既,只要有佢陪住我就開心架啦~~
母親節無謂去食貴價野啦,老公話想去食Triple O's喎,所以就去左海港城食勒~~因為goodtime卡只係限於早餐套餐可以有買一送一優惠,所以今次就試下食早餐套餐勒~
breadfast club combo($53):有蛋,有煙肉,而中間既原來係炸薯餅喎,估唔到將薯餅用黎做漢堡餡竟然幾好食喎,好得意~~
burge-eggs combo($53):呢個就有蛋,有漢堡,餡料就普通左d,不過係送既就無所謂啦~
可以只係用$53食到2個combo真係好抵呢
今個星期六老公長週,放工之時天色唔多好,最後仲落雨添,結果老公買左燒味飯盒番黎一齊食....終於到下畫3點幾天色轉好,於是就決定同老公出街行下啦~
我地去左買飛睇9:40既鐵甲奇俠,於是就諗下去邊到食野啦....我地無無聊聊咁又去左新世紀間荷花睇下BB野,不過照舊都係咩都無買啦...係同一層見到呢間新餐廳 - 峇里園,原來今日係第一日開張喎,我地見餐牌既價錢都唔算好貴,而且係食印尼野,咁就決定試下啦...入到去裝修都唔錯,幾有情調架(即係以前百人一朱個舖位)
牛肉薯仔餅($46):99都整過俾我地食架,佢呢度既味道都幾似,不過外層應該係包住蛋液炸,而我個次係用煎既方式,所以佢地個皮就脆d,不過就油d...
咖哩牛尾(78)配印尼煎鬆餅($6):老公話食開既印尼咖哩通常都唔辣既,反而係少少甜同埋多椰汁,不過呢度既咖哩就唔係呢隻味,反而有少少辣,不過都係好輕微..牛尾亦炆得幾淋,如果份量多d就好勒~~至於個鬆餅就無咩特別啦~
印尼特別炒飯($68):本來想叫半打串燒既,後來見到呢個炒飯都有2條串燒而價錢一樣,咁我覺得有飯食會飽肚d,所以就改左呢叫個勒....味道唔錯,又香又好味,老公都話好食~
最搞野係埋單時我見個價錢比我預先計既平左,睇真d菜式無錯,原來最後加左全單7折喎,咁就梗係好啦,照簽張單啦...不過我都奇怪點解佢無係門口話有7折優惠呢,於是我就問個待應呢個7折優惠做到幾時,點知個待應都唔知有7折,佢猶豫左一陣,跟住話算啦,今日第一日開張,無所謂啦~~哈哈,睇黎原來係無呢個優惠,好在佢無收番我正價咋,呢餐最後都只係$158,抵
終於都黎都孕程既20週啦,即係已經過左懷孕期既一半....真係話耐唔耐,話快唔快,時間真係不知不覺咁就過去啦~~宜家既我身體狀況係
體重:總共增加左20磅~~
肚圍:已經去到37吋~
胸圍:哈哈,唔好講少,吋數升,cup數都升,超好身材架
大脾:算係肥得最多既地方,已經去到行路大脾貼大脾既情況,好唔舒服~
手臂:一向都肥架啦,宜家就更加啦~
小腿:唯一尚未失守既地方
面:雖然下巴仲尖尖地,不過皮膚真係差左好多,洗面既時間覺得"鞋"架~
嘔:已經好少嘔啦,不過諗番起頭3個月既嘔吐日子真係超辛苦~
體溫:大肚婆真係好怕熱,宜家唔開冷氣就出汗
胎動:自從第一次胎動係特別大力之外,宜家感覺到既都係細細力,好似有條魚係肚入面游黎游去咁,或者係心跳既感覺,不過頻率就多左好多,我坐低既時間最容易feel到~可惜老公都唔係好感覺到,只係琴晚話覺得有少少彈彈下既感覺,希望遲d感覺再實在d啦~
宜家算係懷孕蜜月期,我依然健步如飛,雖然比起以前已經行得慢左,但係我都仲係行咁多路架~~不過呢期食野食得飽d個肚就會頂頂下,有d唔舒服,睇黎都係唔好食咁飽啦~
不過最重要都係寶貝繼續健健康康咁成長,仲有一半既日子咋~
本來今日老公話唔煮飯既,但係因為琴晚d湯未飲晒,老公又唔想浪費左d湯,所以最後都決定煮飯~
豆醬唐生菜
冬菜蒸肉餅
煎雞扒
咸牛肉炒蛋
今日唔使食兩碗飯勒,不過都要食碗半,真係好飽呀~
雖然一直都未確定寶貝既性別,但係從種種跡象顯示BB係仔既機會似乎比較大~~
- 醫生好早就話有60%機會係仔
- 頭3個月嘔得都幾多
- 每次見BB都覺得佢好活躍,似男仔
- 我既皮膚差左好多
- 老公既第六感覺得係仔(佢話佢既第六感好準喎)
所以老公就早早將佢既心理狀態調節左去生仔個邊,諗名都諗男仔名先,時不時都叫BB做囝囝...雖然我次次都叫佢叫BB先,而且又諗定第日同阿仔一齊玩高達模型,又話教佢影相識女仔咁,總之就轉晒台咁啦~~
不過我呢就未肯定,仲心存希望可以係囡囡,因為我知老公心底其實鐘意女多d,而且我想同BB扮靚,女仔多好多選擇,仲有就係女仔會乖d,易教d呢~~
而99同我之前都發夢生左個仔,但係有日老公瞓醒第一件事就同我講佢發夢我生左個女,語氣同神情都好奇怪,佢話點解同佢既第六感唔同~~
星期一去見靳醫生,醫生話可能係女,當我地步出診症室,我見到老公偷笑左一下,但係之後隨即出現奇怪既表情...我問佢唔係鐘意女咩,佢話佢既第六感無理由會錯,而且佢話佢已經做左心理準備係仔,所以突然話係女,佢有少少不知所措~~不過一切都要等睇結構先知~
照結構去到尾聲時,醫生問我想唔想知性別,我話想知..點知醫生玩野話聽唔到,足足要我答佢3次先肯照俾我地睇....結果係------囡囡黎既
當晚用電話話左俾阿媽知,另外食飯時同左99講,估唔到99竟然笑喎,仲話女好過男,又乖又易教喎~~
老公好快就將心理狀態調節左去生女個邊勒,呢幾日摸多左我個肚,仲改晒口叫囡囡添...佢話要教佢飲酒,唔好被人呃喎,又話一樣教佢攝影,話女攝影師好型,真係服左佢~~
...而且好似我呢個時間都唔係好適合食薑醋,於是就益晒老公啦~~
