0429的晚餐 ~ 菜芯炒牛肉

老公今日煎既豬扒好好味,好鬆化,唔錯~~

菜芯都幾好,不過牛肉就麻麻...至於個蒸雞都ok,又完成左一餐勒~

《一百萬人的故事》

呢期TVB拍左個低下階層身同感受既節目《一百萬人的故事》,節目一出令好多生活富足既人都有反省既機會,而且令人關注香港貧富懸殊既問題,出發點理應是好的….不過我覺得呢個節目用左一個好負面既角度描寫,將所有問題都歸咎於貧窮,過份渲染….,點解唔用一個積極d既手法去拍攝,鼓勵下大家積極向前,相反只係怨社會既不公,政府既無能,挑起低下階層既怨憤~~

當然節目中某些個案生活真的令人很難過,但可能我和老公年幼時的生活也很窮,所以並不覺得節目中的生活那麼令人驚訝,沒錢自然省著吃,一餐餸分幾餐吃,有什麼出奇…即使現在的我也有機會出現此等行為~

昨晚的全民開講更令我覺得很奇怪,台下一班覺得自己生活於貧窮的市民聲淚俱下的道出自己覺得不公平的生活….我不禁想問一下他們有反省自己為何會這樣嗎?

一個沒有學歷25歲的人當$6800的保安員,我覺得也算可以啦….難道要給你萬元的收入嗎?那些萬元收入的保安員相信不是一個沒有學歷的人可以勝任的…為什麼當初不好好念書?一係自我增值去搵d有前途既工,由低做起lor,你想25歲就有幾萬蚊一個月呀?我到宜家都未有呀~

讀完展翅讀副學士,升唔到大學怨政府搞d課程出黎爛尾….雖然我都覺得政府既教育政策一直都好唔掂,不過升唔到唔好怨人啦,自己讀唔上都要面對現實架喎…出黎社會大學邊做邊學lor~

領綜緩的人說那金額不足夠,可是你們已經豁免了很多支出,租金‧醫療‧學費等都有豁免…那金額不過是日常的衣食,不用工作有錢用,點解仲要怨人俾得少你呀?要你去搵工又有咩唔妥呀?

其實我唔覺得政府有責任去養人,點解唔夠錢就要政府加到你夠為止?咩道理呀?讀經濟既我一直覺得市場主導係正確既,所以我覺得有安全網俾到基本生活窮人就可以,想生活好d就要自己努力啦….我同老公既屋企都係慢慢捱到宜家咁既生活環境啦….可能大家會覺得我無咩同情心,但係有時我會覺得係佢地不求上進仲要多多要求,(我知道有d真係好需要幫助既,但係我同老公真係見得太多無理既窮人),我覺得佢地唔止係物質上既貧窮,仲係精神上既貧乏,呢樣先係最可悲既~~

窮真的不可恥,相反在如此艱辛生活中努力向前更是令人尊敬~~我希望呢一百萬人唔好自己將自己標籤,積極向前,我深信黑暗總會過去的~~

胎動?

通常胎動都會係20week左右發生,有d孕媽媽仲會更早感覺到,而我亦好期待胎動既出現,但係似乎仲未感覺到~

今日坐係梳化正伸緊懶腰時,突然感到左邊既肚內有幾下快速彈下彈下既感覺,我當然即刻停止伸懶腰既動作感受下啦,但係呢個似是而非既胎動感覺瞬間就消失勒~搞到我都唔知係咪真係胎動添~~

之後都無再出現呢種感覺,希望快d真真正正感受到寶貝既郁動啦~~

當Nikon遇上Sigma

老公一月既生日禮物到宜家都未到手呀,因為個鏡頭到宜家都仲未出,於是老公開始物色其他勒~

結果老公睇中左個恆定鏡,咁當然都係買副廠既出品...如果買原廠Nikon既同類鏡頭,老公話要萬三喎,差唔多係鏡王咁滯~而副廠出品既,老公就睇中左Sigma或者Tamron,不過老公搵左好多間都只係得Tamron賣,反而Sigma就好難搵~~

老公話兩個鏡頭好類似,不過Sigma比Tamron重而且大個d,Tamron只係用67mm filer($250)就得,但係Sigma要用82mm filer($500),貴好多呢~

最後老公係中環搵到間兩個鏡頭都有得賣,於是就比較一番,最後決定買Sigma~

於是老公副裝備就增加左呢個成員

24-70mm, F2.8, DG Marco($2850)

呢個鏡比Tamron廣角d,而且多左微距function,不過仲未有時間去試下個鏡頭,係咁而影下我18week既大肚look啦....唉,好鬼肥呀

The Flying Pan@中環

星期六老公要去陽明山莊飲,仲要做當晚既司儀添~~於是我就同老公去左中環食晏,因為已經好耐無用張goodtime卡,所以就睇下有咩餐廳可以用啦~~最後決定去食The Flying Pan,有買一送一優惠~

雖然The Flying Pan係24小時供應英式早餐,但係晏畫時段都滿座,我地都等左一陣先有位~餐牌好複雜咁樣,我地都研究左好耐,不過因為我好想試egg benedict系列,所以都係決定叫呢個系列既其中一款,我要左配雞肉既($60),side dish要左garden salad同埋potato...而老公都係呢個系列不過配牛肉($70),side dish要左assorted fruits同埋potato...我配左杯apple juice,老公就要orange juice~

我地當然交換食啦,呢個就係配雞肉,面頭既係hollandaise sauce,好好味架,跟住就係蛋啦,隻蛋好好味呢,仲要係糖心效果~中間個塊雞就唔得勒,好鞋好乾,一d都唔好食,最底係英式鬆餅~

呢個就係配牛肉,呢個d牛肉幾嫩而且有汁,所以好味好多~~而side dish既薯仔同沙律都唔錯,加埋杯果汁,好滿足~而且仲好飽添喎,用左買一送一,呢餐$83,抵好多呢~

南翔饅頭店@荃灣

星期五又係早放既日子,今日一樣同寶貝去接老公放工,行左陣街就去老公推介既南翔饅頭店食晚飯,老公話佢好欣賞呢度既自家豆辦醬喎~

6點後就要收每人$8既茶錢,可以每人叫唔同既茶都得,老公要左菊花,而我因為唔可以飲茶,所以補多$2要左杯豆漿~~

睇左好耐餐牌,最後決定叫個二人餐$208,包括

鎮江肴肉:點醬汁食都唔錯~

酸辣湯:味道算唔錯,起碼酸味辣味都有~

鮮肉小籠包(6隻):湯汁豐富,皮就唔係薄個隻,係有上海風味個種小籠包,同鼎泰豐係唔同既,另外呢度既醋唔知點解好淺色架喎~

豆醬年糕雞:雞肉就少左d,不過年糕就好多,所以好飽....配老公推介既豆辦醬食更好,呢度既豆辦醬香而唔辣仲有少少甜,幾得意架~

糖醋魚塊:正正常常,不過差唔多成碟都係我食晒~

桂花拉糕(4件):食完味道咁濃既菜式,食下呢個甜品感覺清新~~呢個拉糕煙煙"un un"架,唔錯唔錯~

豆漿2杯:豆味都幾濃呀,好味道...3杯都俾我飲晒~

整體黎講都唔錯呀,7點幾出面已經好多人排隊啦,好在我地早d黎食咋~

0423的晚餐 ~ 西芹炒雞柳

老公繼續煮飯呀,,雖然無咩新意,不過我都照單全收,因為我知道要諗新菜式係好苦惱既一件事,所以我係唔會同老公講唔滿意既~~

不過老公可能都食到悶悶地,佢話覺得自己煮既野愈黎愈唔好味喎,哈哈,我又唔係太覺,可能佢落少左調味所以覺得唔好味...相反我就覺得清清地幾好~

老公今日買餸仲忍唔住買左個榴槤番黎食,佢話好靚喎~好在我一向都唔食既,唔係睇住老公食得咁滋味我就一定唔抵得~

0421的晚餐 ~ 臘腸蒸雞

老公又煮飯啦,雖然又係個幾味,不過今日有臘腸蒸雞飯,所以都食左好多飯呀~

Wii game: Mario Kart

呢期都係玩Wii Fit多,至於其他遊戲就已經好少玩,不過呢排應該會煲呢隻新game勒~

相信有玩開NDS既朋友都唔會對Mario Kart呢個遊戲感到陌生,終於呢個係NDS咁hit既遊戲出左Wii版啦~~

我地都忍左一排先買架,初初出既時間聽聞賣到成四百幾五百蚊,宜家已經回落番啦~~我地最後用$358買左呢個box set(遊戲加正版呔盤一個)~~

比係NDS,Wii當然玩得更盡興啦,畫面又大,呔盤手感又正,雖然有某d賽道同NDS相同,不過都有好多新既賽道,好刺激好好玩呢,玩到連寶貝都好似緊張埋一份咁呀

Pepper Lunch

今日心血來潮同寶貝一切去接老公放工,之後就去左旺角行街~~

諗下諗下,最後去左朗豪坊既foodcount食飯,我地終於試左Pepper Lunch啦~

上年去北海道時都有諗住去食Pepper Lunch,不過因為太多美食所以最後無食到...番到香港先知原來佢已經登陸香港,一直都想去試,點知要到差唔多成年之後先食到~

我同老公都選左呢個黑椒咖哩牛肉飯晚餐,做緊特價$48....仲有沙律,麪豉湯同汽水架~

個鐵板一拎到埋位就即刻要反肉架啦,唔係就會一邊熟一邊生,好忙碌咁將肉同飯同d汁撈埋一齊,除左本身個汁之外,老公仲落左d蜜糖汁添....味道唔錯喎~

飲埋湯,食埋沙律都唔知幾飽~~

0416的晚餐

今日老公繼續努力煮飯,不過都係最容易既,蒸排骨,煎午餐肉併牛扒,仲有蒜茸炒白菜~

飯後仲有青提子食,算係非常唔錯架啦

今餐三十幾蚊,仲有飯盒可以留,抵~~

0415的晚餐 ~ 甜豆粟米仔炒肉片

老公呢排都好忙,仲要做晒所有家務,其實我都知佢好辛苦...好在我大肚呢段期間都無咩負面情緒,仲係好似平時咁嘻嘻哈哈...老公有日仲攰到發脾四添呀,好在我仲識得哄番佢

今日佢可以準時放工,所以就買到d餸番黎煮,雖然都係3味之中有2味都係預先醃好左既,不過我依然非常欣賞(甜豆粟米仔炒肉片,香草煎豬扒,臘腸蒸雞),好耐無帶飯盒番工啦,當然要執番盒啦

風月堂@奧海城

星期六老公去左數碼港既姬子皇朝飲舊老闆個餐,而我就約左一位好耐無見既師兄去左新世紀既美心食飯,但係呢間美心既水準竟然好難食,都係今晚同老公去風月堂食飯最開心~

因為HSBC信用卡有8折,而且仲有甜品買一送一,所以我地都忍唔住叫左甜品黎食~

煙肉辣肉腸薄餅($50):批底好脆,好味道~

什菌墨魚汁寬麪($65):呢個比較清淡,如果個白汁味道濃番D就好勒~

辛口牛肉奄列飯($68):日式咖哩即係唔辣啦,不過好香...牛肉奄列同飯都好好味,唔錯~

豆腐雪糕夾餅($45):有兩大件,當然同老公一人一件啦,賣相咁靚,未食就已經好開心,食完好滿足呢~

蘋果香蕉雪糕批($45):個批係焗出黎,所以係熱架,配埋雪糕食好夾,好味道,不過其實食克件夾餅已經好飽啦,哈哈~

折左之後呢餐係$215,食得好開心好滿足,或者4月尾前黎食多餐先得

 

 

奶奶送的新衣

不知大家還記不記得我曾經寫了兩篇網誌叫"哭笑不得的新衣",那時99很喜歡買衣服給我,但係數量實在太多,而我又不太喜歡那些款式,所以便叫老公向99說不要再買~~

本來99已經沒有再買衣服給我,不過因為我有了身孕,所以就有了新藉口買新衣服給我~~今晚到99家吃飯就拿了7件大肚衫了,款式還算不錯吧(可能大肚衫也不期望會很漂亮吧)~~

幸好我只買了很少大肚衣服,還正考慮買多一點,現在可以慳番啦~~

不只是微隆的腹部

其實我一早已經要求老公幫我定期拍下大肚照,可是老公說不許我把大肚照放上blog,我沒有答應,於是就遲遲還沒有拍…..

終於昨晚老公又拿起心愛的相機清潔和把玩,我便順便叫他幫我拍照….結果他只肯拍下被睡衣遮蓋的肚子….這張相看似只是一個微隆的腹部,因為睡衣並不貼身,要不是我把手按實睡衣就更不明顯了~

但實在我覺得已經不是微隆了,我的肚圍已經是36吋了,還差3天才滿16週呢~平時穿褲子,肚子還不算太明顯,但穿上孕婦裙在胸位下束上繩子,我的肚就清晰可見……希望遲些可以再拍多些大肚照~

 

廚房大戰強哥

繼上回係睡房發現強哥之後,吳家又上演一幕驚心動魄既廚房大戰

星期日和老公行完旺角後覺得累便回家去,還順道買了下午茶回家當晚餐....入屋後,我便打算將下午茶放在廚房櫃面,怎料到被我發現了強哥穿梭於雜物之中(有調味品,有沖劑....).....這個強哥是頭頂有花紋的品種(即係好大隻個種),我當然即時驚叫,相信分貝應該爆燈~~

老公正在廚房門外脫衣脫鞋,聽到我大叫當然聯想到強哥啦~~我立即拿了下午茶走出廚房....老公即時戒備,一手準備洗潔精水,一手準備殺蟲水…..而我就拎左枝筷子用黎撥開雜物搵阿強哥出黎~~

結果對峙左半小時,老公撥到周圍都係洗潔精水都未搵到….終於係我移開個玻璃樽時阿強哥衝出,我地即時嘩聲四起,老公對準噴殺蟲水,不過強哥好頑強依然繼續逃跑,走到去廚房門後失去左影蹤~~

見不到屍體我們當然不會安心,所以唯有繼續守在門口,隔了不知多久,我看到了強哥於櫃頂出現便大叫老公,老公馬上向牠狂噴,終於結束了這場大戰~~不過其實我有點奇怪為何強哥那麼頑強可以再爬上櫃頂,不過解決了就算了….花了成個鐘仲要收拾七國咁亂既廚房~~

點知最後我地係洗衣機旁發現了另一隻強哥屍體,相信這隻才是我們最初的追殺目標…只是後來的一隻可能因為殺蟲水的氣味而被焗出的,幸好一次解決了2位大強哥,希望我們已經趕盡殺絕,真的不要再上演這些大戰了,真的很勞心勞力呢~

(鳴謝吳生提供插畫)

嘉蔚 ~ 彌月之喜

呢個咁可愛既BB就係我堂哥既囡囡啦,佢叫嘉蔚呀~~

琴晚就係擺滿月酒既日子,佢全晚都好乖,無聽過喊聲,只係不斷咁瞓覺

堂哥係遲我半年結婚既,估唔到今次佢個囡囡比我個寶貝早半年出世喎~

其實我都唔係好知D輩份應該點叫,佢地話我係嘉蔚既堂姑姐,咁嘉蔚即係我既邊個呢?係咪叫姨甥呀?咁第時寶貝又係咪應該叫嘉蔚表姐呢?實在係好混亂呢,呢D family tree真係好複雜

0402的晚餐 ~ 蒸魚

前排我覺得自己身體已經無特別唔舒服就入廚房煲水煮蛋,其實步驟只係開火毫無難度,但係被老公發現之後就話我做咩入廚房煮野食...唉,睇黎我一日未生,一日都唔可以恢復一家之煮既地位勒~

老公前日都有煮住家飯,不過都係之前出現過既菜式,即係必備蒸肉餅~~咁我就話可唔可以有少少新意呢...結果琴日老公真係煮左個好有新意既晚餐,就係有碟蒸魚勒~~

蒸魚係從來未係吳家出現過架,因為吳生唔食魚,所以我從來都唔會蒸魚既,最多都係炸魚...今次真係令我好驚喜,咁當然老公係一啖都無食過,成條魚都係我食晒啦~~唔好講笑,呢條魚都成四十幾蚊,一d都唔平,不過都蒸得唔錯,係個豉油就調得麻麻地啦~~

老公好鐘意蒸餸,佢話就咁放入電飯煲一齊煮好方便,所以每餐都會有一味蒸餸,今餐唔係肉餅啦,係排骨~~

另外仲有煎雞扒同埋薯餅,好豐富呀,我食左兩碗飯呢~~