病倒了

很久沒有病得如此辛苦,昨天和今天都請了病假....無胃口又要介口,好慘~~

我要在過年前將身體恢復過來,所以呢期要乖乖在家休息,不是吃粥就是吃河粉,好可憐啊~~

Rasonic電飯煲

我一向對現任既電飯煲都唔係幾滿意,可能係99留俾我既關係,二手野點都係覺得有d問題,搞到我成日煲飯都麻麻地,而且任何功能也沒有,只有一個煲飯掣,實在太不濟~~

一直都想換掉它,但係又未至於唔用得,而且又唔捨得真金百銀買過部....終於等到有黃金機會啦~我就係咁架啦,唔急咪等下,總會等到最抵既時機,哈哈

HSBC呢期搞緊積分換領折上折,只要係1月或2月既星期六或日就可以用優惠積分換精選禮品,而且仲可以再扣除張信用卡既年資折扣添~~

呢個電飯煲由原本要124500分減到只要75000分就可以免費換領勒(或者可以20000分再補$220都得,不過我一向都唔會補錢換野既),加上我既用卡年資折後只要52500分,再用星期日折上折,總之最後我只要31500分就可以換到啦,超抵

前幾日收到換領信,今日老公就幫我去拎番黎啦...個外型都幾靚仔呀,而且有多幾個功能,雖然未試用,不過都好滿意~

唔知我仲趕唔趕得切儲番多少少分,咁樣仲可以換埋個精選雪糕機黎玩下喎大家手上都有分既不妨睇下有咩心水禮品或者禮卷換,d $100禮卷折埋比平時換都抵好多架~~

9月靚太聚@Jimjim家

因為拜託了其中一位九月靚太幫我出機票(仲要出到最抵價),所以就相約星期六交收~

於是我就順便問埋其他靚太有無時間一齊食晏...估唔到今次約得咁急但係都好多靚太出席喎~~

首先Jimjim帶我地係佢屋企樓下既日本料理店"住吉"食晏,4個set lunch但係都好多菜式喎,味道亦不俗,每人八十大元都唔算好貴~今次大會美食攝影師依舊是勞太,大家想睇就要去勞太個blog啦~~

之後上左Jimjim坐擁無敵維港海景既屋企,睇煙花絕對無遮無擋~~仲有幸見識到uncle既風趣幽默~~又參觀左非常專業既美容纖體部添

傾下傾下就過左幾個鐘,各位靚太又係時候回到老公身邊勒....期待下次去探小僖彤既聚會

 

0125的晚餐 ~ 當喬麥麪遇上南瓜忌廉湯

溫度急降又下起毛毛雨,天氣更顯寒冷....放工只想立即回家,躲在被窩內~~老公回來便一起窩在床上看電視,既溫暖又溫馨

本來老公話叫外賣做晚餐,不過我見雪櫃有物資就話可以煮晚餐,但係又唔想搞咁多野,結果用琴晚剩餘既南瓜忌廉湯做湯底,配上低脂喬麥麪,另外將之前打邊爐剩下既所有丸丸做餸就成為今晚呢個奇怪組合湯麪勒

係我準備番煮南瓜湯時,老公問我用咩湯底配喬麥麪,當佢得知呢個配搭之後就話可唔可以就咁用雞湯,不過我話南瓜湯都係用雞湯整所以無問題....

最後既效果好唔錯,老公都話好味道,佢無自己再調味呢原來喬麥麪同南瓜忌廉湯都可以夾得埋架喎~

煮飯仔聚會@吳家

好耐都無見靚太S同靚太N啦,靚太S話要學煮飯,終於約下約下約左今日上黎吳家煮飯仔...靚太S指定話想學意式肉醬千層麪,另外就想靚太N教整芝士餅....最後決定今晚既菜單如下:

甜餐包:靚太N係吳家附近既麪包舖買黎送湯既~

凱撒沙律:靚太N話為左配合今日咁西式既晚餐,所以帶左沙律菜黎整,good~

南瓜忌廉湯:呢個都係我第一次整,原來都好容易架咋...我在旁教路,由靚太S主理,不過因為靚太S又要出去學芝士餅,所以整到咁上下就由我接手勒,不過我落水既分量多左令個湯唔夠creamy,不過味道都好唔錯,仲好有口感添

意式肉醬千層麪:嘩,盒千層麪搵左好多間超市都無,最後終於係citysuper先搵到,仲要得番最後一盒,真係險~~呢個菜式其實最重要係個醬汁,所以我都係決定自制茄醬唔買現成,不過煮左好多到最後都唔夠醬汁舖最面個層,令最面個層比較硬無咁淋....幾驚佢地覺得唔好食,好彩都算合格~~不過好飽食唔晒,仲可以等我留飯盒

XO醬炒蘿蔔糕:哈哈,呢味好似同其他菜式唔係好夾....不過係因為靚太N媽媽最拿手整既蘿蔔糕,所以專登拎上黎俾我地食...果然係好好味喎,我食左好多呢~

藍梅芝士餅:呢個係靚太S同N主理既,仲趕得切雪起俾靚太S帶番去俾老公食...我諗味道應該唔錯~~

今日都整得幾耐下架,不過一樣食得好飽....唔知我地維唔維持到一個月一次煮飯仔聚會呢??希望靚太S學有所成番去煮俾老公仔食下啦

0123的晚餐 ~ 焗咖哩雞、豉汁蒸釀豆腐

今日煮餐正經飯,有好好味既焗咖哩雞,今次除左薯仔仲落埋甘荀,老公叫我下次再落多d喎..睇黎應該係好好味勒~

豉汁蒸釀豆腐係新嚐試,其實都只不過係豆腐面舖層牛肉o者...其實都唔係釀既,哈哈~~今次既豉汁比以前較得好味左,應該因為我無咁慳住d豆豉黎用,所以都好味架~~

要留飯盒所以煎多碟腸,今餐其實都唔係好貴,大約廿五蚊咋

《魔街理髮師》首映禮

(Sweeney Todd: The Demon Barber of Fleet Street)

好似好耐都無抽中戲票啦,終於08年既1月抽中左《魔街理髮師》既首映禮,又要多謝she.com....可能呢套係三級片要滿18歲先可以抽,所以容易d中啦~~

呢套戲因為有尊尼特普做主角而稍有興趣,不過見佢係金球獎拎左獎就再加多幾分興趣添~~最好係今次既首映禮係屋企附近既The Grand,就算九點半都唔怕夜呢

9點出發,去到見到有紅地毯我仲諗住行入去添...點知老公拉住我話紅地毯係明星行架,咁又係喎,好多記者同年青人係度影相....原來另一邊已經排晒隊開始入場啦~

首映禮開左2個院,如果張卡係男主角就去House 6,如果係女主角就去House 1...最衰佢reserve左成4,5行,搞到我入到去只可以坐係第三行....不過將近開場時終於都放番d位出黎,大家一湧而上....我地因為坐太前當然趕唔切行上去啦...不過人棄我取,都升多左2級,不過就係側邊位,不過感覺已經好好多~~

添布頓執導既戲都係一貫風格,就係黑黑沉沉,而且對白係唱出黎...不過我覺得呢套戲既唱白唔係幾好聽~~黑黑沉沉既畫面亦令雙眼睇得好攰

難得有幾段彩色畫面即刻睇得舒服好多,不過唔係黑白色調就唔會顯得鮮血咁刺眼~~港版有人肉叉燒飽,添布頓就拍套人肉餡餅....其實故事好簡單,為左報仇變左殺人如麻既變態理髮師~~個個都割喉,鮮血狂噴,真係好核突,唔怪之得列為三級.....個人對呢套戲感覺不過不失,估唔到可以係金球獎分到一杯羹喎~

0122的晚餐 ~ 伊麪兩食

今晚要去睇首映,所以就用琴晚既剩餘物資黎做餸~~

老公鐘意食伊麪就買左一包番黎,佢見到不知幾開心...我話一半用黎炒做飯盒,一半用黎放湯今晚食,老公都贊成~~

個湯雖然用左蕃茄煲,不過味道都係偏淡....老公當然又自己再調味啦,而我其實都覺得淡左d,但係唔想落其他野所謂就咁食就算~~

食完之後就炒伊麪,我有試味架...味道都ok,無上一次炒得咁咸亦唔算淡,算係合格,不過我都係覺得係街食既炒伊麪好味d

七彩燒烤樂@馬鞍山效野公園

星期日老公約左小學同學去BBQ,好耐都無自己親手去買野,去效野公園霸爐燒野食勒~~雖然無去任食任燒既地方黎得方便同乾手淨腳,不過其實又係另一種情趣~~

呢個場都唔錯,空氣又好,好舒服...今次BBQ仲係有史以來第一次食晒買番黎既野,絕無浪費...初初仲驚唔夠食要配給,因為6個人每款丸都係夾左3粒,每人一粒都無架,不過唔知點解又食得好飽喎...飲品亦剛好,實在計算得太準確啦

除此之外,今日仲發現大家既衣服分別係紅橙黃綠紫,真係約埋襯色都無咁o岩啦....好搞笑,影出黎d相仲好sharp添~~朋友仲買左個小蛋糕同老公補祝生日,佢都幾驚喜架...4點開始燒到7點落山,好在有童軍領隊摸黑落山都唔驚(當然亦好多謝童軍領隊發揮佢既透爐絕技,個火起得好靚呢)~~今次呢個BBQ都係每人$60,又抵又開心

 

0121的晚餐 ~ 滾滾打邊爐

呢期真係好忙,在工在私都好多野要搞,估唔到08年一開始就咁忙碌~~

今日終於頂唔住要加班啦,老公見我好耐都未番忍唔住打俾我睇係邊~~我去到超市見火鍋類食品有特價,於是就唔諗決定買黎打邊爐勒~~

今日買左九十蚊左右都算係咁啦,不過我地兩口子當然食唔晒,睇黎都可以食多一兩餐~~

一月生日飯第十擊 ~ 唯珍上海麪家

老公又大左一歲啦,之前既生日飯實在太豐富,星期六就決定去食番D粉麪咁啦~~

想介紹佐敦呢間維珍好耐架啦,不過次次去食都無帶相機係身,今日係第一次黎食晏畫,平時都係黎食晚飯既,不過都係叫呢幾款野食~

北京餡餅($6):好好味既北京餡餅...除左清真既牛肉餅之外,相信我同老公第二最愛就係呢度既餡餅,韭菜做餡超級好味~~平時夜晚黎食好多時都賣晒架~

豬扒豬手麪($24):老公話其實佢都鐘意食豬手,但係唔係好多地方做得好食,第一次黎食既時候佢見隔離檯個豬手好吸引就叫黎試下...就係咁成為左老公既至愛...不過今日可能係晏畫,老公話無平時咁淋喎,不過依然好味~

豬扒雲吞麪($24):唯珍既豬扒都炸得唔錯架,而我覺得佢既雲吞都好正宗,因為好似以前麻麻包既上海雲吞架,係家鄉風味個隻~~

我地都係叫左粗麪底,其實即係烏冬,加埋雪菜係面好飽肚架...加多杯豆漿就係豐富美味既午餐勒~~我地仲試過佢既無錫排骨菜飯都好好味架~

一間普通既家庭式上海小店,但係質素好唔錯...以前我地都鐘意去柯士甸道既北京水餃食野架,不過發現左唯珍之後就已經覺得北京水餃無咁好食,都無再去啦~~

大家經過不妨去試下啦~

一月生日飯第九擊 ~ 印度菜@Gaylord

本來我打算係中環同老公食埋晚飯既,不過老公話呢排食得太多西餐想轉下口味...於是我地就坐船番去尖沙咀個邊~~

幾經商議老公終於決定去食印度菜,我地就去左Gaylord勒~~

呢度裝飾都幾靚架,仲有現場印度音樂伴奏添....我地本來想散叫,但係後黎發現有自助餐,由於我地想試多d款式,最後就決定食自助餐勒,每人$148都唔算好貴呀~

其實呢度除左有印度人黎食之外,仲有唔少外國人都黎食添...香港人其實唔係佔好多,味道唔錯架,最鐘意佢兩頭都尖尖既飯,配埋咖哩食好得架~~

我地都只係食左兩輪左右就開始收手啦,因為都幾飽下...但係我就覺得呢度比較焗同埋座位比較迫,如果改善埋就好勒~~

《27 Dresses》(27宜嫁)

行完展覽老公就提議去睇場戲...我個2張IFC戲院贈卷都仲未有機會用,於是就去睇下有咩戲啦~~

老公知道我對《27 宜嫁》有興趣,5點半個場仲有位,所以就換左呢套戲既飛勒~~原價成$70一張真係超貴,而且我覺得音響效果都無The Grand咁正...睇黎我地都唔會特登黎IFC睇戲勒~

今次又係我鐘意睇既一貫小品式愛情片,老公當然無咩特別感覺,不過我就覺得幾好睇...而且主角個位刁蠻任性既細妹令我都有不少共鳴...不同的是我其實沒有當過姊妹或伴娘,雖然我也常常幫朋友籌備婚禮,但還沒有一次是成員之一呢~~

不過不要緊,起碼我已經當上了主角,這才是每個女孩最渴望的呢~~一套不錯的小品愛情電影~

 

再織城市@中區警署建築群

難得黎到中環,我就帶左老公去中區警署建築群睇呢個免費建築展覽~~

其實我地志不在展覽,而係想參觀中區警署建築群呢~~中區警署建築群之前曾經開放,不過因為當時太多人去參觀,所以我地個時都無去到...其實我一直都有興趣去睇下,話晒我以前都做關於古蹟既工作,點都想去行個圈~~就借呢次展覽去參觀下啦~~

入到去個感覺好寧靜,完全忘記左置身於繁榮既中環....地方好大呀,仲有幾棵好高大靚仔既樹添喎~~

呢度有好多座建築物,有d係以前警察既辦公地方,有d係會所,仲有就係域多利監獄勒

睇電影就睇得多,現實中都係第一次見識監倉既間格,間房真係好細呀~~鐵窗生涯真係好慘

呢度好多人都拎住相機係咁影,估唔到咁多人都咁得閒黎呢度取景喎~

一月生日飯第八擊 ~ Boca@中環Soho

老公之前已經將我諗既所有生日節目推翻晒,迪迪尼話唔鐘意,帶佢去artjamming畫畫話無興趣,去上海旅行又話貴,最後要既係春季先到香港既一個for Nikon用既鏡頭,禮物唯有hold住先啦~~

雖然宜家我地對慶祝生日唔係太著重,不過都搵d野搞下啦...中午去左中環Soho區既Boca食午餐,因為又有生日優惠呀

今次呢個係Eclipse Birthday Club既優惠,生日月去Boca食晏,壽星仔/女會免費既...如果正日去仲會送多枝酒呢,所以今日就去呢度食午餐勒~

中午只係得3檯客咋,我地叫左兩個$98既set lunch大家一齊食:

麪包籃:味道都唔錯呀

南瓜湯:味道唔錯,加上天氣咁凍飲湯就更加好味~

沙律:酸味味好開胃,仲有好味既牛油果,雞肉,蕃茄仔~

飯:個餸係白豆燴香腸,不過d腸係d風乾左個d腸...可以太多白豆,所以味道普通~

長通粉:呢個長通粉既醬汁唔錯,少少辣幾惹味...而餸呢就係蔬菜類,好似有唔同既椒咁啦,我都食左幾舊架~

甜品:朱古力餅雖然細細件,但係對於我黎講都已經好夠,味道都唔錯...個3粒藍莓仔仲幾好味添喎~~

每人仲有一壺餐茶,都可以有兩杯份量架~熱辣辣既檸茶好醒神~

呢度其實係食西班牙菜,主菜份量其實偏少,而且今日呢兩款都唔多肉,都好既,等我地食多d蔬菜...不過唔知係咪呢個原因,令我覺得味道欠了點什麼似的~~有優惠黎食就可以,如果唔係,$98個就唔係好抵勒~~

好在今餐只係$108,仲有枝紅酒送添...所以感覺都幾好~~

一月生日飯第七擊 ~ 明星海鮮酒家

聽日就係老公既生日,雖然無特別節目慶祝生日,不過放假休息下都算係獎勵下,所以我地都請左假輕鬆下~~

今日天氣凍左好多,放工之時北風迎面吹來真係凍到無晒知覺,老公打黎話想打邊爐喎~~呢個時勢自己買野打邊爐都唔平,見聽日又唔使番工,於是就去街打邊爐勒

本來屬意任點任食個類既,平平地計埋加一茶芥都講緊百三蚊一位,而且其實我地又唔係好肚餓,最後老公選左明星海鮮酒家逐碟計既火鍋~~

估唔到個卡位有私家電視睇喎,仲係HD ready添喎~~我地點左幾樣食,原來竹笙用黎打邊爐都幾好味架喎~~最後呢餐都係$170,每人$85都算ok呀~~

0116的晚餐 ~ 粉絲魚皮餃白菜煲 + 午餐肉

呢期每日唔係豬肉就係牛肉加價,想點呀,再係咁真係買飯盒食仲平過買餸煮飯呀~~

雖然有心煮,但係真係無野買得落手,最後只係買左包白菜仔($2)同魚皮餃($5)咋~~番屋企唯有開多罐午餐肉做餸(吳生琴晚話想食喎)~~

結果只係整左個粉絲魚皮餃白菜煲同埋香煎午餐肉,簡簡單單就算勒~

0115的晚餐 ~ XO醬炒腸粉、香蒜牛柳粒、芝士焗豆腐

要係老公生日之前煮多幾日飯先得,不過d餸貴左好多,都唔係好買得落手~~

其實琴日買左六蚊腸粉只係食左一半,老公叫我今日試下用XO醬黎炒喎,所以就解決左一味餸勒

豆腐平,所以買左一磚,原來上次整既芝士焗豆腐都已經個幾月前既事,味道依然唔錯~

香蒜牛柳粒:最後見到盒牛柳粒特價,買左先算...最後就整左呢個新菜式,味道都合格啦~~

最後今餐只係用左$11.5咋

0114的晚餐 ~ 咖哩肥牛腸粉煲配西炒飯

好耐無煮晚餐啦,我諗都有3個星期...期間都會搵d物資煮下飯盒或者午餐,終於屋企既物資都用得七七八八啦...不過雪櫃仲有盒冷飯同半罐蕃茄,今日又唔係點買到餸,結果就整左呢個咖哩肥牛腸粉煲配西炒飯

咖哩肥牛腸粉煲:味道都算ok,不過尚有不少改進空間,而且有少少痴底呢~

西炒飯:今日炒得唔好,因為半罐蕃茄太多汁,濕得滯影響左,不過味道就ok~

唔好睇好似好少野食,實際上我地都不知幾飽,仲留左個盒飯添~

一月生日飯第六擊 ~ Boathouse@赤柱

行完山之後我地就搭巴士入去赤柱食晚飯,今次食飯地點係上次我其中一餐生日飯既地點,就係Boathouse勒~~

今次人多可以叫多d野食,上次覺得好好味既炭燒蒜茸包同埋海鮮筒都又再叫,大家都覺得好好味~~

另外仲叫左雞翼,意粉,非洲雞同埋baby ribs...大家都食得好滿足,不過BB就辛苦d,喊晒想瞓覺,都係要阿媽出馬先可搞得掂~~

今餐用左Eilte卡既折扣,每人都係$144,大家都覺得好味又抵食~~

悠閒行山之大潭水塘段

星期日又係老公番教會既日子,今日仲係一月份生日會,老公收到份厚禮呢~~

哈哈,老公話枝筆咁浮誇o岩晒佢係公司簽文件~~

生日會完左之後就係今日既行山節目,參加者仲有7個月大既BB添,BB全程都好興奮,第一次見到咁多樹,第一次見到咁大個水塘,第一次見到咁多狗仔....佢都不知幾爽~~

呢段路真係好易行,我地沿途又影下相又搞下BB咁,都可以係2小時內完成...美中不足係中途落左少少雨,無左藍天影相淨好多呢~~

不過今日行得好舒服,so good

一月生日飯第五擊 ~ 愛爾蘭菜@Delaney's

今日3點半又係老公教會朋友既婚禮,老公仲要幫手做左兄弟都唔知添~~

我同細妹分手之後就去玫瑰堂會合老公勒....走得之時都已經成五點半啦,我地又無特別地方去,於是就同另一對朋友一齊晚飯~~

唔知食咩喎,就拎起我張goodtimes卡睇下啦,結果去左Delaney's,呢間係食愛爾蘭菜架

我地都叫左好多愛爾蘭既名菜,不過最好味既都係炸魚薯條($108),超正...其他雖然都幾特別,不過味道就無咁正~~

Guinness pie($98):呢個都唔錯,d牛肉燉得好入味...

Iris stew($88):呢個係麪包內放左薯仔,紅蘿蔔同埋羊肉...不過麪包口感差左d(麪包藍既麪包好食好多),內裡既餸都ok

蔬菜千層麪:味道好淡,要配茄醬食比較好,不過茄醬又唔係好夠~~

Satay($45):反而串燒又唔錯喎,有牛同雞,我只係食左牛,不過肉質唔錯...佢d醬同平時食開既唔同,不過都好味~

另外朋友仲叫左杯PT strongbow($40),今餐goodtimes卡送既係千層麪,大約$8x~~而我地每人係夾左九十幾蚊,都唔算好貴呀

呢間餐廳係pub既格局,而且幾乎清一色係外國人,所以老公話有唔係香港既感覺...哈哈哈,今餐都幾特色呀~~

密謀離家出走@旺角Lime at T5

呵呵,無論最初有咩計劃都好,機會往往突然而來~~~今日難得同細妹食午飯,其實係相討我地黎緊既大project,宜家只可以話俾大家知我將會離開吳家出走呀,就連吳生都唔理呢

今日同細妹去左Lime@T5食野(即係Lufuma既樓下),食物普通不過不失,lufuma好味好多,不過勝在靜侷舒適,真係好o岩我地密謀大計

我叫左個鴨胸焗飯,而細妹就要左個西蘭花吞拿魚焗意粉,餐茶特別d,叫左蘋果紅茶同蜜桃紅茶~~

食完飯繼續去搜集資料,成3點先各自離開呢~~

《玩具掌門人》(Mr Magoriums Wonder)

我同老公都係The Grand既會員,其中一項優惠就係生日會送一張電影贈劵同埋一張爆谷劵,贈劵同禮劵有分別架,只適用於星期一至五,某d大戲亦唔可以用...雖然有3個月限期,不過都係快快用左佢啦....而且老公張白金卡有8折,所以只係用左$48咋

今期既《玩具掌門人》好似幾得意,於是就入場睇下...呢套戲想大家拎番d童真出黎,相信下呢個世界有魔法....係外國拍先有說服力,香港邊有咁樣既玩具店呀~~

好鐘意德斯丁荷夫曼既演繹,有演投果然係唔同d,真係睇得出架...有佢既場景令我覺得感動...故事其實好簡單,唔算好吸引,不過我覺得幾得意呀