ESD朋友探訪

今晚有2位靚姐姐黎探囡囡,一位仲係黎緊12月既新娘子添~

佢地都係我結婚個時係ESD識既朋友,雖然好耐都無見面,不過係blog或者facebook都keep住知道大家既近況~~

佢地知道我生左囡囡之後就話要上黎探下我同囡囡,囡囡照舊無喊到,2位姐姐好順利咁抱住佢影相呢~

可能因為佢地放左工先黎,時間唔係好夠,傾左一陣計就要走啦~~睇下幾時再有機會聚下~~

我覺得呢幅相好明顯睇得出邊個係待嫁姑娘,邊個係靚太,邊個係靚媽...哈哈哈

仲要多謝2位送既禮物,好在囡囡仲著到NB片片~~

The Citizen Grand Membership

自從囡囡出世,我個blog好多post都係講佢...無法啦,日日係屋企都係湊佢,唔講佢講邊個呀~~

今日出街,終於有d新野講,就係我喜愛既The Grand Cinema做緊入會promotion勒~平時入會既迎新禮品係2張電影贈卷,原來佢慶祝1週年送3張電影贈卷呀~

我就係琴日先醒起我張The Grand Cinema既會員卡好似10月到期,於是拎黎睇下,真係無記錯...仲記得上年佢o岩o岩開幕可以免費入會,我同老公就因為免費而入左~

本來我只係打算續我個張會員卡(續會費$120,入會費$160),點知今日去到先知送多1張電影贈卷,為起即係$40張飛,所以叫老公都續埋~

除左電影贈卷之外,仲有WoolooMooloo餐廳$100Coupon(要食滿$500先可以用),同埋MEGU餐廳甜品贈食(最少要叫一個主菜)~~

不過呢,有左囡囡要同老公去睇戲都要好好安排下,事關我手上仲有2張The Grand 電影贈卷,即係總共有8張...另外又有2張MCL電影贈卷,睇怕都好夠用啦,我驚我會過期都唔記得用添呀~

五星級育嬰室

今日我同囡囡去行Elements,除左因為近屋企之外,仲有就係知道佢備有得獎既育嬰室,咁就可以行得好放心啦~

估唔到熟睡中既囡囡真係係Elements醒左,仲喊晒咁要食奶~於是我就去呢度既育嬰室勒...嘩,真係唔錯喎,我入左一間獨立房,可以鎖門既...我坐左係張椅到餵奶先,之後再同囡囡換片...囡囡好似都幾鐘意呢間育嬰室,好開心咁換片片...唯一既問題係似乎冷氣就大左d~

宜家如果要帶囡囡出去行街,睇怕都要搵d有育嬰室設備既商場先得啦~

首次成功用Sling

屋企今日下畫3點至5點整座大廈都會停電,既然係咁我決定帶囡囡出去行下街街~

今日終於成功用條Sling揹帶啦...呢條Sling就係個時係BB展買既,其實之前都想用架啦,但係唔係好識用,因為每次想放囡囡入去條Sling到既時間,囡囡都會喊晒口咁,似乎好似唔係好舒服...咁我都唔想勉強,所以就無用到啦~

但係上次就咁抱住囡囡出街,只係1個鐘頭我已經覺得隻手同條腰好攰,更何況今日要出去起碼2個鐘...於是又拎條Sling出黎試下~

今次算係放到囡囡落去,不過佢都係有d喊架...咁我就抱住佢行左陣再餵陣奶之後佢就瞓左啦...仲瞓得好"林"添,咁我就好順利影張相同出街勒~

嘩,原來有揹帶出街真係爭好遠架,輕鬆好多,手同腰都唔會痛~

我同囡囡去左護協買野,然後去銀行,跟住去Elements行下...囡囡足足係條Sling瞓左2個鐘,係行程尾聲先至因肚餓而醒左~

睇黎我要練習多d用Sling先得啦~

留住這一刻(Day 35)

雖然滿月酒就無擺,但係老公卻對幫囡囡整手模腳模很有興趣~

為了留住囡囡現在的小手小腳模樣,我們決定貴一點也幫囡囡做一套手模腳模做紀念~

其實想平都可以買材料自己係屋企DIY既(二百蚊到),但係我見好多人都要失敗幾次先成功,計計下都唔平....於是我都係覺得搵人整好d,睇左幾間,決定選呢間honey-bebe~

雖然佢係咁多間內最貴既,但係卻係最靚最精緻既...而且包上門同送貨,一係就唔整,整就整到最好啦(兩手兩腳$1480,我有美贊臣卡有9折,即$1332)~於是就約左今晚7點半上黎幫囡囡整勒~

姐姐整緊模粉,旁邊既係佢個仔,好乖咁做佢助手添呢~

初初整第一隻手時囡囡仲瞓緊,第二隻手就醒左,其間有d掙扎同喊,到整腳模就平靜番...都好順利係半個鐘之內整好晒~

我地仲要寄張5R相俾佢地放入掛架內,非常期待7個星期後既製成品~

囡囡,我同爸爸幫你留住左35日大既手仔同腳仔呀

乙型肝炎第二針

囡囡一個月大,係時間去健康院打針啦~

今次要打既係乙型肝炎第二針,不過打針之前又係磅重時間,原來囡囡已經有4.04kg...即係8.9磅~~初生時6.6磅既囡囡,一個月已經去到差唔多9磅重,足足重左2磅,成績令人滿意~

跟住又去見個位無料到既男醫生,d黃已經退晒,醫生話唔使再check黃啦~

之後就等打針勒...個個BB都喊晒口咁出打針房,我仲估囡囡一定會喊到拆天,但係出乎意料之外,囡囡竟然只係叫左幾聲咋喎~

基本上姑娘打針時,囡囡作勢要喊,谷到塊面紅晒,正想喊出聲時,姑娘打完,我就用紗布按住囡囡大腿上既針口,佢就無喊出聲,不過塊面就"拿"埋晒...可以係痛到出唔到聲,哈哈~

之後佢肚餓反而仲喊得大聲呀~~

總括黎講,今日打完針無出現不良反應,亦無特別發脾氣,算係好叻女架啦~

坐月滋味

我諗我算係一個乖既坐月婦...因為我真係成個月都無洗頭同埋只係用薑水抹身~

雖然我阿媽同奶奶都唔係點識煮補品俾我坐月期間食,但係佢地不約而同都好堅持叫我唔可以洗頭沖涼,所以我都好聽話~

頭2個星期個頭真係好唔舒服,不過之後習慣左就無咁辛苦,不過一坐完我就即刻去洗頭沖涼,真係舒服晒~

至於用薑水抹身就只可以止下咳,因為好多時食完野就已經一身汗,點可以抹身就得呢...所以日日都要開冷氣,咁當然又唔可以開得好勁啦...呢種滋味真係幾難受架~

跟住就應該講下我既收身情況,整個孕期共重45磅,生完之後兩星期磅數少左20磅,但係再過兩星期磅數只係回落左5磅咋....仲有20磅都唔知點算

最礙眼既係我個肚,生完都仲好似有左3個月咁,肚皮鬆泡泡仲勁多肚紋,真係無眼睇~

經過一個月既時間肚皮已經比生完既時候收左好多,但係仲係成個肚腩咁,懷孕時43吋既肚圍宜家仲有成38吋,腰圍宜家仲有成34吋,真係唔知要用幾多時間先可以減得番~

最弊係我仲未可以載番隻結婚介指,點算好呢?希望返工之時可以回復產前既狀況啦~

久違了的shopping

終於都坐完月啦

囡囡滿月之日已經急不及待抱住囡囡出街行左個圈(1個鐘頭咁多)~

襯住星期日老公係屋企可以睇住囡囡,我就出街shopping下....講真我由懷孕開始都無認真咁去shopping呢,買既都係俾囡囡~

今次我既shopping好有目標架,都係我用黎收身或者授乳既用品,而且要以最快既時間完成番屋企,首先係屋企樓下搭小巴($4.4)去黃埔吉之島(做緊週年慶),買左

授乳one piece裙(原價$199,特價$59.9,再95折,即$56.9)

授乳上衣(原價$139,特價$83.4,再95折,即$79.2)

授乳頸巾(原價$239,8折$191.2,再95折$181.6,買滿$180減$20=$161.6)

六甲村束複帶(原價$248,9折$224.1,買滿$180減$20=$204.1)

之後係黃埔新村搭永安免費專車去尖東永安(做緊酬賓日),買左

污衣籃(原價$79,特價$49) -- 買黎放囡囡既污糟衫

跟住行去Sogo,買左

Clarins去肚紋兼收緊膏(原價$390,9折$351,用左信用卡迎新禮物$300 Sogo coupon,即只係俾$51)

Sogo超市(因為之前申請sogo卡俾左3張$20禮卷就黎到期,所以就入去買d野,今次用左2張,因為要買滿$50先可以用1張...折實$62.8)

之後就去搭K16番到屋企樓下,總共用左2.5小時咋~

雖然坐月成一個月不問世事咁滯,好在我都知道邊度做緊優惠,今日收獲豐富之餘都慳左唔少,好有成功感同滿足感呢

大學同學探訪

今次輪到我班大學同學黎探我同囡囡啦~

我既大學宿友仲帶左佢10個月大既囝囝黎添...10個月大既BB果然好玩好多呀,不過父母所用既精力又多d啦~

今日囡囡又再次發揮佢既親善大使職能,個個輪住抱依然無喊過,又贏得眾人既稱讚~

另外12月既新娘子亦於此時大派紅色炸彈,不過我地個個都好開心咁接住,因為等左好耐啦~~

次次見大學同學都係咁開心既,開心時間亦特別快過,期待12月係同學婚禮上再聚~~仲要多謝同學既心意卡同埋超市禮卷呢

產後檢查私家覆診

囡囡滿月之日,我要去醫生到再覆診,檢查下傷口情況~

本來我以為都應該好番7788,因為都唔係點痛勒~點知醫生睇傷口時話入面既線有d都係未溶,要同我再拆線喎~

因為上次傷口表面已經發炎,所以拆表層既線都已經好痛,於是醫生就無幫我睇入面既線啦~而今次因為表面已經好番好多,所以就檢查入面既傷口,好在今次拆線無上次咁痛,不過就feel到醫生係拆緊好入既線~

拆拆下醫生忍唔住問我係醫生淨係姑娘幫我縫針既,我咪答佢係姑娘lor...醫生話佢真係好有心機縫,因為真係縫左好多針,所以好多線要拆~

醫生拆完線又俾我睇下,我都估唔到原來仲有咁多線未溶,仲多過上次拆既線~搞到我好番七八成既傷口又要傷番d,激死...又要食抗生素同搽消毒藥水啦~~不過最重要係個傷口埋得好啦~

醫生話一個月後再去覆診,到時會同我照超聲波睇下個子宮復原情況喎....我諗下次應該係最後一次覆診啦卦~

~滿月啦~

今日係囡囡滿月既日子,不過因為夫家既家族無擺滿月酒傳統,老公又話唔搞,所以就無擺勒(其實我都想擺既,不過今次聽下老公話啦...囡囡呀,第日你知道係邊個唔幫你搞滿月酒啦)

雖然係咁,不過話晒都係囡囡滿月喎...點都要搞少少野啦~於是我就襯住今日刑滿出山既日子,帶左囡囡出街行一轉...買左個滿月蛋糕仔,呢個蛋糕有名堂架,叫做"快樂小雞",希望囡囡一樣開開心心,健健康康啦~~

我買左蛋糕,老公就買左個毛毛皇冠俾囡囡,都幾得意呀~

囡囡一向都唔係好笑既,撩佢都唔識俾反應住既,不過今日唔知係咪知道自己滿月,我撩佢玩佢竟然俾反應我,對我笑喎...佢開心時,我都好開心呢~希望佢越黎越識同我玩啦~

"好自在"自選坐月食療計劃 - 天妍康

將近坐完月啦,等我介紹下我坐月期間既膳食啦~

因為我沒有請陪月,沒有請工人,而奶奶及媽媽又說不大懂得坐月期間要煮的補品...所以初期老公就決定由佢親自下廚,佢仲睇左唔少坐月食譜~~我成日都問佢係咪掂架?佢就拍晒心口滿有信心咁話無問題,已經諗定煮咩俾我食添~

見老公咁堅持,我當然信佢啦~~不過到將近預產期時,我都係有d擔心,於是上網搵下有無幫人煮坐月餐既公司....原來係呢個年代真係有呢d公司架喎,不過就唔多,我只係搵到2間,最後幫襯左呢間叫"天妍康"既公司,唔使老公咁辛苦啦...而且我都係對佢既信心有所懷疑~

其實佢有好多套餐架,而且大部份都係有中醫師跟進既...價錢由萬幾蚊到幾千蚊都有,當然所包既野就唔同啦~就算只係訂湯水都得....最重要係佢係送餐送到上門架,足不出戶就可以有得食~

之不過我都係覺得貴左d,睇下睇下,原來佢有個叫"好自在"自選坐月食療計劃,最主要分別係唔會有醫師跟進,不過我覺得無都無所謂,因為呢個計劃內既餐單係會講適合咩人食既,例如適合人奶客戶/適合奶粉客戶/適合產後1-7天客戶...等等~下面就係例子啦~

而且食左廿幾日,我覺得味道都唔差,而且真係少油,少鹽,少糖...雖然我就食唔慣咩紫米飯/黑豆飯...不過我覺得總算唔錯啦~

我係訂左30日既套餐,價錢係$5388...不過如果早d訂就會有超市禮卷回贈,最多可以回贈$400架~~不過我係臨尾先訂,就無優惠lor~

我覺得如果無人料理坐月既膳食,訂呢d都可以達到目的~

9月新娘探訪

今日係9月新娘黎吳家探訪,今年我地呢班9月新娘唔少都做左媽媽啦...上次既聚會就係探謙謙勒~

今日除左黎探abby之外,仲有2個幾月大既子又都黎左呀~~睇相都唔覺,原來子又既真身係咁大隻架,體重係abby既一倍...見到子又,我無法想像abby到2個幾月大既時候都會係咁大隻

有人黎探囡囡,佢果然無咩點喊...等到大家一走佢就黎料啦,真係教都無咁叻呀~~而子又都好乖呀,仲喊得好斯文添...邊有好似囡囡咁喊到拆天~

Thy:下年要輪到你呀,都係快d擇定日子啦~

Fiona:見到你收身得咁快實在太令我羨慕啦~

Jimjim:你要俾多d護膚心得我地呀~

JK:你都要努力,下年我地要探你同阿Thy個bb啦~

大食傻豬豬

(Day 23)

囡囡其實都幾大食架,雖然我係埋身餵奶唔知道佢食幾多,但係每次食奶都表現出其狼吞虎嚥既表情動作~~

此外,有時佢仲會食到"濁"親,但係佢唔會嘔奶架喎,只係會咳幾聲...咁我就會第一時間同佢掃背脊...每次同囡囡掃風都會覺得佢個樣好搞笑,傻下傻下咁,兩邊面珠凳特別顯眼,真係好得意...吳生次次見到囡囡掃風個樣都會笑呢

終於有覺好瞓

(攝於Day 20)

仲有一個星期左右我就坐完月啦~

經過大半個月既努力,我終於算係掌握到囡囡既生理習慣,或者應該講係我地一家三口互相調節配合成功~

之前囡囡要到凌晨2點先肯瞓,仲要係喊到拆天咁,搞到我同老公都瞓唔到...點知幾日後,老公已經可以當係入睡前既音樂,照瞓可也,反而當囡囡收聲瞓左之後,吳生會扎一扎醒呢,真係佩服~(我就點都瞓唔到,不過習慣左無得瞓)

好在呢幾日囡囡好似開始明白夜晚係要黎瞓覺既,前晚12點埋身餵奶到12點半就瞓左,一直到4點半先喊醒,換完片再埋身餵左半個鐘又可以瞓到8點半,算係咁架啦~

琴晚仲乖,12點半瞓到5點先喊,我地兩公婆都算係有覺好瞓lor~~

上面幅相係囡囡熟睡中都可以玩口水,一陣間又無晒d口水架啦,真搞野~

第三次到母嬰健康院

相隔一星期,囡囡又要去健康院檢查啦~

預約左9點,好在健康院近屋企,8點9出門口d時間都綽綽有餘....原來早上既天氣已經開始涼涼地啦喎,無返工既我真係連天氣轉左秋涼都唔知呢~

今日磅重,囡囡既體重已經增加至3.49kg啦,即係7.7磅...計落已經比出世時重左1磅有多啦~

今日見既醫生唔係上兩次個位男醫生,而係轉左位女醫生....今次呢位女醫生比我既感覺良好,起碼我覺得佢有愛心,無個位男醫生咁冷漠同敷衍~

醫生話囡囡既黃已經退到差唔多無咁滯,唔使咁密番黎檢查,下次打針先再check喎~

另外就同囡囡檢查下視力,結果當然無問題啦~~而聽力測試就出世時已經係廣華做左,一樣都係合格...真係好啦,囡囡健健康康唔使令我同老公擔心呢~

教友探訪

今日吳家好熱鬧啊

早上先有62帶同姑奶既6299黎探囡囡(實在我都唔識點叫呢兩位長輩,唯有叫佢地auntie同uncle啦),囡囡有禮物又有大利是收~

下畫就係老公一班教友上黎探囡囡啦,囡囡又好識做啦,無喊之餘又係任抱唔嬲~~個個輪住抱佢影相都無問題....眼仔碌碌咁,到最後我抱住佢無耐就瞓左,係人聲嘈雜下都瞓得好香甜呢....似乎囡囡好鐘意熱鬧喎~

期間,大家品嚐左由吳生主理既豬腳薑(吳生淨係煲雞蛋都煲到發晒脾四呀~),估唔到大家都話OK喎~

等大家離開之後佢又開始喊啦,淨係蝦爸爸媽媽...見到外人就扮晒乖,搞到個個都話佢乖添...佢都幾識做表面功夫喎,學晒爸爸啦,哈哈~

仲有多謝教友們既禮物同埋利是呢~

HKCSS舊同事探訪

之前都係d親戚黎探我同囡囡,今日首次有朋友黎探訪啦~~

佢地就係HKCSS既舊同事,真係多謝岑太做搞手約埋其他同事一齊上黎,仲送左3大包細碼Pampers同埋好靚既Chickeeduck衫仔呢

唔知係咪有4位靚姐姐黎探囡囡,佢竟然一反常態無喊不得只,仲任抱唔嬲添~~搞到個個仲以為佢好乖呢....佢真係識做喎,淨係識得蝦爸爸媽媽~~

好耐無見齊D舊同事啦,佢地真係有心,難得囡囡又識做,我又可以同大家傾下計,坐月咁耐都無講過咁多野呀....見朋友真係同見6299差好遠呢...朋友們,歡迎大家多D黎探我同囡囡呀...哈哈

另外老公既同事們都好好,送左好多禮物俾囡囡,例如包被,相架,衫仔,心意卡,超市禮卷等,多謝晒呀~~

第二次到母嬰健康院及產後檢查

只係相隔左3日又要去健康院檢查啦~

今次醫生檢查得詳細d,聽下心肺,檢查下骨骼咁樣....最開心係聽到醫生話囡囡既黃開始退啦...應該無咩問題啦喎~

今日囡囡再磅重,短短3日竟然由3.04kg去到3.17kg...都唔好話唔厲害,哈哈~

而下畫我就去私家醫生度做產後檢查....雖然已經相隔12日,但係我個傷口仲係有d痛,特別係左邊~~醫生睇完傷口話有d線仲未溶,因為呢層線縫得太淺,就係皮膚個層,所以咁耐都唔溶...而傷口亦有少少紅腫~~醫生話一係開d消炎藥俾我繼續等d線自己溶,一係就幫我拆左d線....我問醫生邊樣好d,醫生話因為都已經12日d線都未溶,佢建議我都係拆左d線好d,於是我就話好勒~拆線都幾痛架,拆完醫生俾我睇下d線,原來仲有好多線未溶架,唔怪之得仲痛啦~

醫生再開左消炎藥,止痛藥仲有清洗傷口既藥水....就係咁就收左我$900啦...仲貴過我係醫院生BB既費用呢~~不過呢d錢都係唔慳得,我想傷口快d好呀....如果等廣華睇產後檢查要等到11月呀,實在無可能等咁耐啦~

媽媽初體驗

不經不覺囡囡已經出左世10日啦~

原來我也正式當上了媽媽有10天呢~其實我有很多感受,一些不曾領略的感覺~

我沒有請陪月,沒有請工人,也沒有回娘家或到奶奶家坐月,從分娩以後就在獨力照顧著囡囡....幸好回家後有老公陪伴我一同照顧囡囡,兩公婆一起學習為人父母,老公除了照顧囡囡更要照顧我呢....雖然疲累卻也覺得幸福~~(實在很感謝老公特意請了兩星期假來照顧我兩母女)

當上媽媽實在有種奇妙的感覺...

嗜睡的我不知道原來自己還有能力可以撐那麼多個晚上

聽到囡囡不斷的哭鬧,自己竟然沒有發脾氣的衝動

看到囡囡面上的粒粒和紅紅的屁股,心中非常心痛

我慶幸自己還沒有產後抑鬱,沒有發過一次脾氣.....或許很大程度上是因為有老公的支持~不知老公要上班的日子又會如何呢?希望奶奶不會連日間的時間也來看囡囡吧....

6299對囡囡的寵愛實在超出我和老公的想像,在我大肚的日子他們也是正正常常的...可是囡囡出世後他們每晚也來看囡囡,要知道62自我們結婚後一直也沒有來過我們家的,就因為囡囡的出世,他竟然和99每晚都準時上來看囡囡...每晚都在囉囉嗦嗦的,我和老公都怕了...真不知他們何時才能回復正常....他們對囡囡的關愛可是給了我不少壓力,再這樣下去不知會不會真的有產後抑鬱呢~~

第一次到母嬰健康院

囡囡照完燈出院之後,我地就打去母嬰健康院登記,約左星期五上畫去檢查啦~

屋企離母嬰健康院好近,慢步都係行10分鐘一定到,超正~

老公登記填表,而我就帶住囡囡去磅重,出世9日既囡囡已經由2.99kg上升去到3.04kg啦...進展唔錯呀~

姑娘檢查臍帶,其實囡囡出院當日臍帶已經脫落啦,所以我地都唔洗煩洗臍帶既野....姑娘仲話宜家個肚臍好靚添~

跟住就係睇下我餵人奶既姿勢有無問題勒~~基本上問題不大,姑娘仲讚囡囡食得好好,我又餵得好好咁啦...哈哈哈~~仲要我無補奶粉,姑娘話非常好喎~

之後就等見醫生勒....都等左一排,由囡囡眼仔碌碌好精靈咁等到佢開始喊都未有得見~~點知入到去見個醫生,佢只係用左唔夠一分鐘就睇完囡囡啦...只係話佢既黃要繼續觀察,不過唔使照燈勒,可以放心喎~

我覺得呢度d姑娘好好,但係呢個醫生就真係求其左d lor~