2008年6月30日 星期一

Huggies 初生尿片


其實係準備囡囡出世所需既用品,我算係一個嘆慢版既準媽媽,可以因為唔係自己用,又咩都唔識,所以唔似籌備結婚時咁緊張去周圍睇,就算一樣有上討論區睇資料都好少留言,我自覺同結婚時相比係相差得幾遠呢~之不過老公既表現就同籌備結婚時相反,佢好樂意去了解bb用品,亦好鐘意買,唔會好似搞結婚時得我一個人理~~


不過,我還是定時定候上網了解最新資訊...好似呢幾日從其他準媽媽處得知Huggies初生尿片(35片)做緊大特價,由原價每包$5x減至$29.9,都真係好似幾抵,不過就話好多萬寧已經斷貨....我琴晚同老公講起,老公就話咁就等我去睇下有無得買啦....點知我公司個邊既萬寧真係無晒貨,反而老公番工個邊就有,佢仲猛問我買2包會唔會少得滯,使唔使買多幾包?


其實我唔係無諗過買多幾包既,不過一來唔知囡囡會唔會大得太快,可能好快會由初生尿片轉去細碼尿片,我驚買多左會浪費....二來雖然好多媽媽對huggies既評語都唔錯,不過始終都要囡囡用過先得o岩唔o岩,原來尿片仲有好多唔同牌子,好似話日本牌子既更好,所以都係唔好買同一個牌子太多,免得想試其他都唔得~~


其實之前都係不同場合拎左d贈品尿片(6條Huggies NB同1條Pampers NB),我諗應該仲有機會再拎多幾條贈品尿片既,都係買住2包先啦~~


講真,我對買尿片呢個行動覺得怪怪的,因為自己從來都無諗過會去買尿片番屋企,估唔到宜家發生係自己身上~~


睇黎我要努力d,開始放多d時間去了解唔同bb用品既牌子同價錢,似乎我要set up番一個格價excel表先得勒~~


 


Origins organic lip balm


自從懷孕之後,皮膚實在每況越下,我已經沒有太多心機去護理,就等分娩後才努力吧~


所以這段期間對所有護膚品推廣都沒有購買行動(除了要為老公補購之外),前陣子才得悉Origins新推出了有機系列...這條organic line既產品好貴啊,不過我也換了2小份face lotion試用....今次更荀的是可以換領其lip balm,15g,不知是不是貨size呢?雖然我不知此lip balm的售價,不過我還是很開心能成功換領,因為只限頭500位才有的呢~


不過我相信最後也會俾老公拿來用的,哈哈~


2008年6月28日 星期六

K lunch

我成日同老公講要係囡囡出世前玩多d,去多d街,拍多d拖...老公都非常贊成~


前幾日我就同老公講點都要帶我去唱下卡拉OK,於是星期六老公就提議去唱K lunch,我地去左Red Box,d歌好似比Neways新,而且d食物都好味d喎,不過就貴少少,唱左2個半鐘,埋單$106~~


囡囡都好似幾鐘意聽爸爸唱歌喎,每當爸爸唱佢都會郁既,好似仲鐘意過聽莫札特...哈哈~


最搞笑係入房之前,我地問簽咩卡有優惠,經理話只有學生證先有折,咁佢就問我地有無,仲要問左2次咁多...老公之後話睇到我咁大個肚,都無理由問我地有無學生證啦,真係唔識點應佢呀....哈哈~


2008年6月27日 星期五

鄭太家訪聚會

本來是次約會是星期一的,後來改了星期五,也好,因為老公是晚有鵲局,咁我又有節目,各自各精彩啦~


原是一個鄭太學煮餸既約會,不過後來因為遲左收工,所以就無買材料煮野...不過都無所謂啦,都係想見下面傾下計o者~~


鄭太預先張揚既凌亂情況並無出現係眼前,咪幾企理...不過佢個寵物房就真係好厲害,如果俾我老公見到一定好開心....


睇完法證就散場勒,睇怕下次再見應該係生完囡囡之後既事lu...我一定會定d薑醋俾兩位靚太既~~


之後會合老公,老公今晚一家贏三家,贏左三底喎~~咁我就將靚太所贈既榴槤當獎勵送俾老公食...第二日老公一口氣就食晒lu,哈哈~


2008年6月25日 星期三

鼠年首個8號風球 - 風神

昨晚十點幾掛上8號風球,天氣未算太差,我同老公仲估今日應該會係返工之前落波添~


今朝瞓到咁上下聽到出面隆隆既雨聲,心想天氣應該幾惡劣,估唔到真係繼續打8號風球喎~~就係咁多左半日假,老公同我繼續大覺瞓~~


平時就算放假,老公都唔會瞓超過十點幾,點知今日佢竟然瞓到11點3,咁o岩就見到轉左3號風球...好在屋企都有少少糧食,煮左一碗菜肉雲吞玉子米線同埋一碗魚腐玉子米線,跟住就同老公一齊出門口返工lu~~


是晚收到朋友懷孕既消息,恭喜晒呀,真係開心勒~~


 


2008年6月22日 星期日

色慾都市(Sex and the City)


今日老公唔使番教會,於是決定同老公去The Grand睇番場戲啦~


本來想去睇功夫熊貓既,點知去到櫃檯先知下星期先上畫...咁就改睇Sex and the City啦,雖然我基本上一集Sex and the City既電視劇都無睇過,但係我見好多人既評語都唔錯...難得係老公都話有興趣,於是就決定睇呢套勒~


哈哈,我地竟然帶埋囡囡去睇三級戲呀...不過其實我都唔覺得三級~~


套戲原來成2個半鐘,不過無冷場喎,幾好睇呀...就算無睇電視劇都無影響我理解故事內容~雖然主角們年紀都比較大啦,但係佢地既衣飾絕對爭回不少分數...而且那一輯婚紗相的婚紗真係很漂亮,連老公都話好靚喎....不過最後個套VW婚紗我又不覺得太靚,似乎太plain了~~


不過點都好,呢套戲都幾有message呀,值得一看呀~~


肚皮的跳動

我既胎動感覺已經比前強烈左,宜家更見到自己肚皮會跳動,好得意架~~


琴晚當老公睇歐洲國家盃既賽事精華,一到緊張之處,老公就會大叫...剛巧老公大叫後見到我既肚皮跳動左一下....於是佢就話一定係囡囡鐘意陪爸爸睇波,所以俾反應佢喎~


為左證明佢既推論,佢又大叫一聲....哈,囡囡果然又係我個肚皮跳動喎,如是者,老公一直係度玩,連續玩左5次都係咁喎,佢不知幾興奮....不過我諗囡囡知道爸爸玩佢,所以第6次開始就唔再理爸爸啦...哈哈


2008年6月21日 星期六

不能倖免的妊娠紋

雖然我無買幾百蚊枝既防妊娠紋膏黎搽,但自3個月起我都每晚沖完涼之後塗上body lotion或者olive oil係肚皮位置...一直都相安無事既~


可能我個肚圍實在太大啦,6個半月已經去到40吋既境地,結果星期六晚當我如常搽olive oil既時候,竟被我發現肚底已悄悄地出現了幾條妊娠紋...d妊娠紋梗係以為係肚底出現我就唔知啦...不過一樣被我見到,個一刻真係好唔開心呀即刻叫老公幫手睇清楚,佢梗係安慰我話無所謂啦....雖然著衫會遮住無人會見到,但係個肚花晒實在令人好沮喪....6個半月就出,幾時出到囡囡出世呀~~~


我相信肚肚會繼續漲大,但係再漲大就表示會出更多妊娠紋,真係令人煩惱....希望只係出呢幾條就算,唔好再多啦,求下你啦,我唔想個肚變左花面貓呀


2008年6月18日 星期三

第六次私家產檢(25w5days)


今日足足等左一粒鐘先可以見醫生,因為好多大肚婆黎睇呀~其中一個仲係內地孕婦,佢好似有個agent陪佢一齊黎見醫生,仲講左好多到時既安排,不過呢個內地孕婦超肥又坐得唔多斯文,坐係梳化度打開晒對腳,係人都見到佢條內膽呀,好核突呢~~


基本上我都無咩唔舒服,去私家醫生度檢查都係想見下囡囡...今日醫生又再照下3D立體相啦,囡囡上次用隻手遮住半邊面,今次好少少,只係遮住個嘴仔...呢張相都影得囡囡幾靚呀,哈哈


我既體重已經累積升幅到25 lbs啦,不過囡囡都係得九百幾克咋喎...我問醫生我係咪太重,囡囡係咪太輕,但係醫生話無問題,好正常喎....既然係咁我就放心啦~~又要四星期後先見啦~


令人失望的大學生

公司又係時候推出暑期實習計劃,老闆好似上年咁要求請2位暑期工幫手~~


人事部俾左份申請名單老闆,最後同事幫手約左9位同學仔黎面試~~


好啦,面試當日有人打黎話有其他offer唔黎啦,ok無問題,都算有交帶....跟住又有個打黎話趕唔切約定時間想改期,因為我地只會安排一日,所以我就話唔可以改第2日,咁佢話改晏d得唔得,咁我就話要問下先可以覆佢...點知佢話佢要聽talk會熄電話喎(點解要去聽talk之前同事約佢既時間唔講呀?),咁我只有話盡快覆佢啦...最後老闆話ok,咁就改左佢5點鐘黎in~~


終於到左開board時間,但係一個都未到喎,老闆話入房先,我話仲未有人黎喎...大家只有概嘆時下既大學生既時間觀念...等呀等,30分鐘過去依然無人黎到,於是就打電話問下啦...第一位無人聽去左留言,第二位話蕩失路,宜家係附近黎緊...唉,點解唔check清楚早d黎搵地方,搵唔到都好應該打過電話黎問下呀~~


終於有人準時到勒,呢位男同學仔好搞笑,係我引領個段路,佢同我講"我好緊張呀"...哈哈,真係初出茅廬勒,點會同我講d咁既野架,我唯有安慰佢話放鬆d就得架啦~~呢位同學仔誠意可嘉,可惜答問題唔識避重就輕,講晒自己d缺點出黎,睇黎佢應該去上下教面試技巧既course...in完我帶佢走,佢又問我"我in成點呀?"...哎呀,叫我點答佢好呢,我唯有笑笑口話ok啦~


遲到個位終於到左,不過佢竟然著T_shirt牛仔褲,雖然呢份係暑期工,唔一定要著套suit黎in,但係只少都應該斯斯文文,點會著到咁架...更何況佢竟然係中大既學生令我超失望,不過佢既對答係所有面試者之中最好,英文亦係最出色既一位,最後老闆都將佢排係第2位~~


另一位中大同學外表本來幾令人喜愛,但係佢既表現根本唔似中大人,每個問題佢只係答3至4個字,仲要超細聲,個幾隻字又唔make sence,根本就係答非所問,問到老闆唯有轉番中文同佢in,我懷疑點解中大會收左呢個學生呢?


另一位city男同學雖然就染左一頭金髮,不過表現淡定,我同老闆一致應為佢係咁多位之中最好表現既一位,順理成章佢排左第一位啦~


仲有一位女同學,好明顯佢既答案係背既,不過都叫有準備下呀,起碼有d誠意,穩穩陣陣...呢位排左第3位~~


跟住又有一個遲到,我又打去問下啦,點知佢話唔黎in喎...有無搞錯呀,唔黎又唔講聲,離晒譜~~而改左時間個位又再打黎問可唔可以改期,我之前咪答左lor,又問過,我最後就叫佢即刻決定,當然佢就話唔黎啦~~真係麻鬼煩,叫你黎面試好似求你咁,唔係1,2個既問題,係整體咁多個都有問題喎...呢d大學生其實點請得落手呀?


2008年6月17日 星期二

補祝父親節@灣仔生記海鮮飯店


今日我同老公約左阿爸阿媽食飯補祝父親節...話說父親節前3,4日細細妹打黎問野,最後我問佢幾時食飯慶祝,不過我只係得星期六得閒~~後來細細妹打黎話阿媽星期六約緊打麻雀,於是就話正日去食飯,但係老公一個月前已經約左朋友聚會...是關一向我地都唔會正日去慶祝,不過細妹今次話去老上海食,就算正日都係用平時既餐牌~~於是我唯有話問下聚會個邊有無得改再覆佢啦....老公聽到既反應好無奈,佢話點解次次都係佢既約會要改期,雖然佢無話唔得,不過我都明白一個月前就約好左又次次都要佢就我屋企人,我決定幫老公爭取下~


細細妹夜晚打黎追問,我就話可唔可以改遲d,但係鑑於阿媽一向都唔鐘意後補食飯,所以就話唔好,咁我又唔想星期日,但係又無一口拒絕...結果細細妹就以不太友善既語氣話我究竟想點~~唔知點解一時之間我既情緒都被掀動,仲忍唔住開始喊....老公係房出黎見我講講下電話係度喊即時大驚,問我做咩事...我講唔出,只係將手上既電話交俾老公,結果老公唔理對方係邊個就開口鬧,最後仲cut線添~過左一陣我情緒平靜番就打俾細細妹,點知佢唔聽我電話喎...於是我就打左俾阿媽,同佢講案發經過...結果阿媽就話咁小事我做咩喊(其實我都唔知自己點解會喊,可能都係大肚婆既情緒問題啦),阿媽話我地唔得閒就另外再約佢地食,於是今日就同佢地去食飯勒~



一個背景複雜既晚飯,地點諗左好耐最後決定去生記,好彩阿媽聽到就話佢都想去試好耐,因為之前蘇絲黃介紹過呢~


生記有好多招牌菜,可惜阿媽最想食既鹽焗雞因為禽流感既關係已經停售左2星期,咁唯有食其他啦~


蕃茄薯仔煲唐排:佢地係逐位上,4位就俾4碗,3位就俾3碗咁既....啖湯好鮮甜,而且似住家湯,無味精...阿爸仲話佢地唐排幾靚~


生炒骨:係蔡爛話既正宗做法,碟底無汁,汁料包住舊肉,而且都幾脆口....可惜係唔夠熱,似係煮定左番兜上碟~



椒鹽鮮魷:阿爸一樣話用料靚,不過同樣問題係唔夠熱,似係煮定左咁樣....不過阿媽話鮮魷好鬆軟,唔會好似其他地方實的的~



煎藕餅:粒粒蓮藕,味道不錯...只是同樣也是不夠熱,點解唔似人地講話熱辣辣既?



枸杞浸豬潤:呢味好出名架,因為真係要即叫即煮,所以呢味等左好耐先黎...我唔好豬潤,不過都食左一舊,又真係幾滑架喎~



豉油皇炒麪:呢個炒麪老公激讚,我都覺得好好食~



泥鯭粥:我覺得幾好食,不過泥鯭好少,反而多左d肉丸,仲有油炸鬼送粥...食完即刻飽晒,不過我覺得就貴左d,要成四十蚊一碗,仲要兩位起喎~



最後有甜品白糖糕送,我印象中咁大個女都好似無點買過黎食,唔太甜,不過阿爸阿媽話唔夠鬆軟喎....呢度上菜好快,我地都係食左一個鐘左右咋...埋單$636,為起每人百六左右,算係貴左少少,如果佢頭個三味能夠熱辣辣即煮既話,相信感覺應該更加好味~


如果有機會,下次仲要試下翠塘豆腐,梅子蒸蟹,豉油王蝦,鹽焗雞,蝦餅,炒飯...都係好多人推介既美食黎呢~


2008年6月15日 星期日

9月靚太的禮物 ~ Carter's口水肩


上次9月靚太既聚會,其中一位因為天雨關係未能帶同囡囡出席....不過佢好有心呀,寄左份禮物俾我地幾位媽媽既BB...我今日就收到啦,係Carter's既口水肩呢,真係多謝晒


呢位靚太好厲害架,佢係全職媽媽,不過仍然積極開設網上店售賣嬰兒用品,黎緊仲會開舖添,祝佢生意興隆,當然我都會用行動支持下佢啦~


大家有興趣都可以幫襯下Baby Palace架~


 


準爸爸買的和尚袍


老公準時黎廣華接我,之後我地去左食晏,因為天氣依然唔好,我地今日就去睇下幾間樓上既嬰兒用品店,分別係Baby Super同埋Baby City~


樓上舖唔大,不過都有好多野睇既,老公仲買左4件和尚袍添,4件都係佢挑選仲係佢俾錢添,呢度100蚊4件,唔算貴,不過唔知有無地方再平d呢?


2008年6月14日 星期六

第一堂廣華講座 ~ 母乳餵哺的好處及技巧


廣華都有一系列既免費講座俾準媽媽參加,每個月既第一個工作天9時正就會出一批新既講座,大家就要準時上網報名,好快就滿額架啦....我第一次都低估左報名既情況,而且個次又唔係出好多新課程,所以第二次我就好準時咁上網報名~


今日終於上第一次既免費講座,就係母乳餵哺的好處及技巧,不過因為報名時只係得番最後一個位,所以今次老公無得陪我去~~呢堂為時成3小時架,不過講解既內容真係詳細好多,聽完更加覺得無理由唔餵母乳,不過姑娘都話唔好俾太大壓力自己,放鬆D仲會餵得好D添....


今日既講座有強生用品派發呢~ 


2008年6月13日 星期五

萬黃聯婚@帝廷酒家


又一個大學同學結婚啦,新郎哥係我year one細O雙魚組既組員,不過佢今次結婚都無點請其他組員,基本上我係雙魚組同NA既代表~~事關新郎哥係UC人,所以佢多數都係UC既同學幫手,好似我咁結婚個時就係NA既同學幫手lor~


UC既同學我都好耐無見啦,所以我地自己都影番D相留念,原來有個同學既仔仔已經20個月大添呢,真係唔見都唔知喎~


大家話我個肚好大,好似成8個月咁大喎...哈哈,真係著衫好有影響,上次9月靚太話我個肚細,今次D同學就話我個肚大,睇黎件衫都好影響個肚既大細喎~


 


第三次廣華產檢(25 week)

今日又係去廣華做產檢既日子,今次檢查既時間好早,係8點9,我早左5分鐘到,點知原來係開9點架喎,早知就唔使咁早到啦~~


不過可能比較早,而我又係睇助產士小組既,所以好快就到我檢查~~


政府既檢查真係好簡單,都係驗小便,量血壓,跟住就係用胎心機聽心跳,今次好快就搵到囡囡心跳,姑娘show俾我睇個頻率係153下,屬於正常~~


之後就摸肚勒,姑娘話size正常,而子宮底就去到肚臍位喎...之後睇下我有無水腫,再問我BB有無郁,一切正常之後就約下次覆診時間~


姑娘話下次檢查係時間要再抽血同驗血糖,就係傳聞中好難頂既糖水測試,希望杯糖水我頂得住啦~


2008年6月10日 星期二

甘味手打讚歧烏冬專門店@沙田新城市

係中大影左一日相,我其實已經好攰...不過難得同老公入左黎,都想係沙田食埋晚飯先番屋企~


於是就去左新城市行街,雖然一田既減價週已經完左,但係都依然好多人喎....我地當然又去左嬰兒部睇下啦....老公終於見到我買左個張Aprica既high chair 680實物,老公話真係幾好喎,呢度標價要$3900呀~


其實老公都好鐘意睇BB野,因為真係好得意,好可愛,如果係陪我買衫shopping,佢通常都係企埋一邊等,但係睇BB野呢,佢就周圍行,仲會叫我睇呢樣睇個樣添~行完一田就去睇埋荷花啦,睇左一陣都係時候醫肚,最後決定去甘味食手打烏冬~~



我地等左一陣就有位,甘味食物唔算貴,都係三、四十蚊就有碗烏冬,除左手打烏冬之外,呢度仲有款叫二十穀米飯,不過我地都係對烏冬興趣比較大:



薄切肥牛蕃茄湯烏冬($40):個蕃茄湯底都算唔錯,烏冬屬於扁身既,雖然算不上彈牙,不過都幾煙韌~


無骨雞翼湯烏冬($35):清湯底都唔差,而d無骨雞翼就普普通通啦~


三文魚壽司(特價$10):嘩,呢兩件壽司真係超迷你喎,就算十蚊都好似唔係好抵,老公仲話d壽司飯唔夠醋又太暖,唔得~


吉列煙肉波菜薯餅(特價$15):等位睇餐牌已經想叫呢個薯餅小食架啦,估唔到佢做緊特價,原來要廿幾蚊架,味道都唔錯~


奇異果鮮牛奶($18):呢度有個果汁鮮牛奶系列,我知奇異果係對孕婦有益既,不過平時係唔食既,不過用黎溝牛奶我又有d興趣想試下...味道帶少少酸,不過都叫ok啦~


芒果鮮牛奶($21):老公就叫左杯芒果奶,不過我唔食得芒果所以無試~


結果呢餐連加一都只係百五左右,如果唔係叫左兩杯果汁鮮牛奶,其實一百蚊就可以落樓,都幾抵食,仲食得好飽下呢~


2008年6月9日 星期一

大肚照@中大

其實之前老公已經話同我番中大影番輯大肚相,可惜連續兩星期都落雨,天氣影響,遲遲都未能成行~~


難得星期一終於放晴,老公就話同我入去中大影相,首先去老公最愛既澳洲牛奶食個早餐先出發,入到去中大就1點左右啦~


其實中大真係一個幾好既取景拍攝地方,除左有幽美既環境之外,最重要係我同老公都對中大太熟識,知道邊到有得休息、有冷氣、有梳化、有洗手間、有野食、有折徑,而且一邊影又可以一邊想當年,真係好開心架~仲有就係中大特別多昆蟲,可以俾老公影下d蟲蟲大特寫,佢不知幾開心~~



今日既攝影路線係


大學火車站-->崇基荷花池-->CC Chapel-->小橋流水-->工程大樓-->本部-->范克廉樓(食tea)-->MMW-->新亞香草園-->天人合人亭-->樂群館(休息)-->園形廣場-->小百萬大道-->眾志堂(換衫).....總共影左二百幾張相呀,超勁,不過因為太多相,未能逐一post上黎~



荷花池(又名未圓湖)



小橋流水既小橋(呢日先知叫順利橋,老公話今次影相應該叫做順產橋,哈哈)


本部既新建築物-文物館東翼



frankie既公司治同芝士素火腿漢堡飽




知行樓外既小農田,有可愛既稻草人



天人合一亭:d倒影幾靚~



小百萬大道上新加既公仔


我覺得自己都幾厲害架,大住個肚都行到小橋流水上本部,唔使去搭校巴,我地影到成5點幾呀,真係幾攰呢~~不過又好開心喎,每次番去中大都會勾起不少既回憶,個段美好既日子真係永遠都咁令人嚮往...今次托住囡囡黎中大,希望佢都感受到我同老公對中大個份獨有既情意結, 吸收下中大個份地靈人傑既氣息...,希望佢第日都可以係中大讀書,一樣好似我地咁享受係中大讀書既生活~~



2008年6月8日 星期日

大肚監考員

我雖然頂住個肚,不過都依然決定去做CFA既監考員,無法啦,除左要好似某超市廣告咁慳得一蚊得一蚊之外,我都要賺得一蚊得一蚊,當係幫補下d奶粉錢都好呀~~


我諗都應該無咩大肚婆會做監考員,現場所見,我只係見到一位大肚既考生咋~不過我著左件螢光既監考背心就遮晒我個肚,d人都唔知我係一個大肚婆~~


今日有見到邊個我識既人既,就係老公既姐夫,我細妹既男友,兩個大學師弟,仲有一位大學同學...而且我既大學同學仲係坐係我監個組添喎,考完晒我地仲一齊去搭機鐵,順便傾下近況,因為自從係我既婚宴見過佢之後都無約過出黎啦...今日見到仲唔傾都夠~


不過話時話,今日既機鐵好多人,無論係我一早搭去淨係搭番屋企都無人讓坐,雖然我都唔係好恨有人讓坐個隻,不過話晒呢班車既乘客係CFA既考生,都算係有學識既一群,但係唔讓坐不特止,仲同我呢個大肚婆爭位坐,禮讓個位係我喎,咩世界呀~


就算俾你考到做到專業人士,咁樣既人格質素都唔方可以有咩作為啦~


大肚婆係旺喎~

星期六一早係黑雨,好在下午細左好多,總算可以出下街...事關老公一班中學同學約左去九龍公園打羽毛球~~


我就當然只可以做啦啦隊,晚飯後,其中兩位朋友上黎吳家開檯...好耐都無攻打四方城啦...佢地話大肚婆會特別旺架喎~~


結果果然係我做左大贏家,雖然我地打得好細,不過我都贏左十幾蚊架,哈哈


2008年6月7日 星期六

Aprica catalogue


因為我比較喜愛Aprica這個嬰兒用品牌子,得知可以拿取的地方後就拜托勞太幫幫手~


在此要再次向勞太和勞太的同事說聲多謝,幫忙拿這本Aprica catalogue給我~


這本catalogue除了有齊Aprica的產品外,其實也有不少育嬰資訊,當做育嬰指南也不為過,哈哈~~


2008年6月6日 星期五

9月靚太聚@紅磡新星酒家


不經不覺,我們這班因結婚而認識的9月新娘已邁向皮婚紀念,亦即表示我們都已經相識了3年...曾經說過希望我們會不繼升級,由9月新娘-->9月靚太-->9月媽媽~~


哈哈,3年的時間大家真的開始逐步升級了....星期五的晚上雖然下起大雨來,不過無損我們一見小謙謙的決心,榮升了個多月的謙謙媽媽,發揮了她獨特的母愛,而小謙謙也表現了同期BB罕有的乖巧,好一對令人羨慕的母子


在座還有資歷最深的媽媽,其囡囡已經8個月大了,從她帶給我們看的video見到她的囡囡非常活潑,面珠脹卜卜的,好想摸下呀~想不到這位經驗豐富的媽媽表示很懷念大肚的日子,抱起小謙謙時又回想到囡囡初生時的軟綿綿,似乎我應該更好好享受現在的大肚日子,不過我更渴望快點見到小寶貝喎,很矛盾呢~


除了我這個懷胎6個月的大肚婆,還有一位懷胎已經8個月的準媽媽...她的肚真的比我大不少,可是我的肚圍卻比她大上2吋,點解會咁既?


平時出外吃飯,我總會留意應該吃什麼餸比較好,但是今次的聚會在眾多靚太和媽媽的監督下,所有合大肚婆吃的東西都叫了,我一點都不用費神呢,美食相片一貫都是大會攝影師勞太負責,今次也不例外,哈哈


雖然還有一位忙碌的媽媽未能出席,有點失望,希望很快可以有第二次聚會,見一見小彤彤啦~~另外也希望患病的靚太盡快康復,下次要來見見面啊~


至於兩位靚太:勞太和馬太,你們快點升級吧,下年靠你地啦


2008年6月4日 星期三

0604的晚餐


今日放工之時無落雨,所以老公好好咁買左餸番黎煮飯俾我食~~


我又可以留飯盒啦,真係好勒~~


準爸爸的喜悅

雖然胎動已經一段時間,但係我總是覺得囡囡郁得好斯文,都唔似其他人話覺得係度踢,只係好似係度轉轉下~~而且又未見到肚皮既郁動,所以期待囡囡再大d時會有更大力的胎動~~


唔知係咪我成日同老公講囡囡郁得好細力,所以老公都無真正feel過囡囡既郁動....不過我成日都叫佢摸多d我個肚,希望佢都可以感受到~~


不過好多時老公一摸囡囡就唔郁,就算有郁,老公又話唔係好feel到....琴晚瞓覺前,老公比平時摸得耐d,終於囡囡係正老公既掌心頂左一下....老公個樣好開心呀,佢話今次真真正正感覺得囡囡既郁動,好得意,好神奇,佢開心左成晚....今朝起身依然講緊琴晚囡囡同佢玩既事,哈哈,睇黎佢感受過之後會keep住摸多d都未定喎~~


2008年6月3日 星期二

0603的晚餐


好似好耐無食住家飯啦,因為呢期成日都落雨,老公話落雨唔想去買餸喎,於是多數都係叫外賣/出去食/去99屋企食~~


雖然今日放工之時都落雨,但係因為我今日係公司唔開心,所以老公話今晚請我食餐好等我開心下,不過我想食老公煮既野,所以老公就親自下廚勒~


好耐無食住家飯,真係好好味呀...多謝老公