私家覆診(15w2d)

今天又是私家覆診的日子,又可以見到吳家寶貝了,吳生當然也請了半天假來看看他~

上次醫生說有6成機會是囝囝,今天醫生再照卻說看不清楚,是囡囡的機會又增加了點,還是要待下次才能確定寶貝的性別,看來寶貝也想我們再猜猜看,大家也來猜一下吧~

今天能夠清楚的看到寶貝的小手和小腳,手指和腳指很分明呢,又長大了不少,現在的寶貝有10cm多呢~~

見寶貝的時間總是很快就過去,又要等4星期後才可以見面了~

一家三鼠

我們的朋友陸陸續續知道吳家有喜的消息,老公一位同學和我們住得很近,星期日晚突然致電說上來吳家,我們當然沒有問題~

原來老公的同學和女友今天行街看到了這個一家三鼠的裝飾覺得很適合我們就買來送給我們了,更即晚就送上來呢,他們這份心意真的令我們很感動呢~

其實老公於他的一班同學中有個花名,就是叫老鼠~~那是因為讀書時代的吳生非常瘦削,面形瘦得像老鼠一樣,因而得名....加上吳家寶貝的生肖屬鼠,所以這個一家三口的老鼠家庭真的很貼切啊~就這麼這一家三鼠就進佔了我們飾物櫃的一角,幸福快樂的在吳家生活了

 

峰壽司

以前我以為孕婦唔使刻意節制食量,鐘意食幾多食咩都得,非常羨慕...但係當我成為左孕婦既時候,我先知原來孕婦係有好多野唔食得,雖然食量可能會多左,但係亦並非任食既~~

人就係咁衰架啦,平時都唔會特別想食壽司,但係自從有左之後話唔食得生冷野,壽司列入禁食名單之內後,我不時都會心思思想去食壽司~~終於星期六天氣實在太熱,老公批准可以去食壽司,於是就去左峰壽司食晏勒~

好在我一向唔好魚生,所以都只係食熟食既壽司o者(個兩碟魚生係老公食既)....可能禁食太耐,我覺得呢餐食得好開心,好滿足呢~~yummy

驚醒 VS 笑醒

呢排既我成為左睡寶寶,每日放工一番到屋企就去瞓,瞓到起身食飯為止~

於是呢排既我寫少左blog,反而老公就係我昏迷既時候寫blog,所以佢呢排出blog指數好高呢,而且仲會有心機到畫圖添,勁~

話說上星期五一早起身準備番工,老公起床先,但係突然之間大叫老婆,我張開眼望下佢見到佢受驚嚇既樣子,原來有隻大蟑螂係正房門口,好在既係隻蟑螂都唔係點郁,應該係就死架啦~~

不過困係間房無殺蟲劑喎,拖鞋又係廳,所以搵唔到武器對付呢...老公個樣好徬徨,我就忍唔住係張床大笑(我知老公唔會叫我呢個大肚婆殺既,哈哈)...結果,老公最後拎左我係檯頭既一疊好有份量既食譜一野擲向蟑螂上面,隻野就死左勒~

因為趕住要番工,所以未清理現場就走左啦,等我放工番黎先處理屍體呢~

和樂日式意粉屋(Pasta De Waraku)@Citywalk

好似好耐無去搵好野食,因為老公話見到荃灣有間價錢合理款式又時尚d既孕婦衫舖頭話帶我去買,所以就入左去荃灣勒~

入到荃灣我就提議去citywalk新開既和樂日式意粉屋食晏,都等左一陣架,不過因為有好多意粉既display,齋睇再諗食咩都有可以消磨下時間,而且我地坐底等左一陣仲有個笑容可掬既waitress派飲品俾我地呢(有烏龍茶,可樂同七喜),服務好唔錯喎~

因為餐廳既一面係落地玻璃,對出係個露天花園,所以有陽光射入黎好舒服~打開餐牌真係花多眼亂,意粉我諗都有過百款,好在我好多野宜家都唔食得,所以唔使諗得咁辛苦~

三文魚菠菜奶油麪($68)

可以選意粉或者寬麪,可以選落唔落蒜茸,可以選R(regular)或者L(large),咁當然L就貴十蚊~而我因為三文魚同菠菜都有益,所以就叫呢個配寬麪同蒜茸,不過食唔到蒜茸味...我呢個係R,份量實在係太少啦,好後悔點解唔叫L....味道都算唔錯呀,寬麪亦算彈牙~

豪華燉汁漢堡排($58)

因為老公非意粉愛好者,所以佢要左呢個漢堡排,係鐵板上既,但係同一個問題就係份量迷你...塊漢堡只係得手掌心咁大咋,不過咁我試左一啖覺得好好味喎~

煙肉雞蛋日式Pizza($58)

睇餐牌已經覺得份量唔多,所以叫多個pizza,都係叫個R啦,點知個pizza真係細得過份,好在味道唔錯,批底亦好脆~

其實我仲有好多野想試,味道亦唔錯,但係收得呢個價錢,份量真係太少啦,唔係好抵呢,而且係荃灣咁遠,睇黎我應該都好少機會再去食架啦~

BB的第一件禮物

細妹已經係海外受訓完畢返港,而且仲有好消息,就係收到一畢可觀既花紅,於是就請一家人食餐飯啦~

食飯前行經時代廣場見到幾米10年展就影左幾幅相,之後就去cwb既食街i-thai食晚飯~

小B既第一份禮物原來係自荷蘭空運返港架,幾巴閉~~係miffy縛奶咀既夾夾呀~

實在miffy呢就係我頗為喜愛既公仔之一,所以我諗小B都會鐘意阿姨送俾佢既呢份禮物卦~

復活節之宗教活動

吳生每逢大時大節一定會去望彌撒既,而我都會做跟得夫人陪佢一齊去教堂~~

復活節當然都係一個重要既節日,於是星期六晚食完晚飯就同老公去教堂陪佢望左2個鐘既彌撒勒,呢晚仲好多人洗禮添....我諗小B出世之後都會領洗架啦,都係要多d帶佢去教堂望彌撒習慣下先得~

而星期日就同老公去見證佢位朋友既基督教既浸禮,形式同天主教唔同,要整個人浸入水中,牧師仲會按佢個頭入水中(其實我覺得牧師都好似幾大力,好似好粗暴咁呢,哈哈)~

就係咁連續2日都係宗教活動中度過呢個復活節勒~

鼎泰豐

本來外遊既4日復活節假宜家就係香港休息,轉眼間4日假期又完左啦,又係時候要番工~~

星期四放工同老公去左鼎泰豐食晚飯,真係傻傻地,我地竟然等左差唔多一個鐘~

味道呢,其實我覺得同以前係紅磡既差唔多(不過我好耐無食,唔知後期有無差到),不過服務就好好多,而且好多服務生都係講台灣口音既普通話,唔怪之得叫直營店啦~

但係食物就好似貴左,而且份量少左....以前一籠小籠包有10隻,宜家先得6隻,已而好似細隻左添呢,好唔抵呀...d麪又細碗,總之就好細碟啦~

小籠包(6隻):都有水準架,係太細粒同太少~

素菜蒸餃(6隻):我一向都欣賞鼎泰豐既素菜蒸餃,因為素菜餡真係切得好細,但係味道唔錯架~

排骨湯麪:呢個老公食既,d排骨有少少黑椒味,味道ok,湯底都算清,不過份量就真係好少勒~

擔擔麫:呢個係我既,原來一d都唔辣,只係得麻醬味,所以我覺得唔係幾好食呢~

只係呢四樣野就承惠$180啦,講真其實都唔係幾飽,不過再叫又似乎唔係好抵...都係下次再去台灣食啦,台灣食始終係最好味既~

第一次廣華產檢

今日係第一次去廣華做產檢,因為老公太忙請唔到假,所以就搵左媽咪陪我去醫院~~

原來今日全部都係第一次做產檢既媽媽黎架,我9點10到達,唔算遲個批,但係就係最尾個幾個先走得,個時係1點半,足足搞左3個半鐘,不過都係等既時間比較多~~

今日又要抽血呀,不過今次抽右手,唔知係姑娘無上次威院既手勢好或者係右手抽血唔慣,我覺得今日比較痛,而且抽完左成日隻手都唔係好舒服,今晚沖涼時仲發現傷口附近瘀左添呀....唉,我平時好日都唔會抽次血,宜家成日都要抽血好討厭,姑娘話遲d週數仲有2次要抽血喎~~

因為上星期做oscar時已經照左超聲波,所以今日就無照勒,不過醫生都有聽心跳,媽媽都聽到,仲話好活躍同好健康,就連醫生都話好健康喎~~有件事一定要記低既就係醫生幫我檢查前問陪我黎既係咪我家姐,哈哈,醫生唔似講笑喎,問得好認真,我話係我媽咪黎架,醫生話你媽咪好後生喎,媽咪都聽到架,我諗佢一定好開心啦

今次產檢我被選入左廣華醫院獨有既助產士小組,入得呢個小組表示孕婦好健康,一切正常先可以入選架...好處係一條龍式服務,之後既所有產檢至生產都會係同一位助產士跟進,當然有需要既時候都會見醫生既,不過由助產士跟進就會親切好多,而且助產士會因應週數教導番孕婦注意事項,亦會教孕婦之後點照顧BB架...聽朋友講仲話由助產士接生既孕婦住既病房係番新既一邊,話好似私家醫院架喎,所以我都好開心可以入到助產士小組,連媽咪都話d姑娘好好人好親切呢~

可惜既係廣華俾唔到日子我照結構呀,唉,最尾個幾個先走得,d位一早就俾晒之前既孕婦啦,激氣呀,無位我就要出去私家照,貴好多架麻,想慳d都唔得~

跟住就去會合阿爸同細細妹去飲茶,好在細細妹今日都唔使番工,有佢陪住阿爸都無咁悶~~

Fish & Co.

聽完講座就去沙田行街街順便係沙田食埋晚飯....睇左一輪食肆名單之後就叫老公決定,最後佢竟然話去食魚喎~~佢話平時佢唔食魚搞到我好少機會食,吸收唔到魚既營養,所以今日就提議去食Fish & Co.~

老公叫左個new york炸魚薯條($79),呢味炸魚薯條加左芝士,味道唔錯而且好大塊,但係因為比較膩,所以其實一個人食好似太多,薯條就無咩特別...加$30可以配埋餐湯同餐飲架~

我就要左個烤時令魚配海鮮飯($77),不過d飯其實係無海鮮既,反而有d提子乾,味道ok啦...而個時令魚就食得出鮮味,連老公都話唔錯呢~~

餐湯係蕃茄雜菜湯,我就覺得稀左少少...另外我地叫左個麪包跟蒜茸牛油($9),餐飲老公要左杯活力可樂,其實即係可樂溝七喜,而我個杯就係百味果汁,其實就係熱情果汁溝七喜,味道都幾得意架~~

食佢主打既魚味道唔錯,環境亦幾舒服,我地坐係露天位,由天光食到天黑...用HSBC卡有9折,埋單$230,都唔算太貴~~

產前講座@仁安醫院

機緣巧合下,我在網上見到仁安醫院舉辦免費產前講座,主題係"如何迎接寶寶出世 - 順產,無痛分娩及剖腹生產"

於是就報左名去聽,老公當然一齊去聽啦~~

今次既講座令我知道得更多有關分娩既過程,好多疑問都得到解答,其實了解左就無咁驚...最重要係連老公都清楚知道過程如何,佢就咁聽都話覺得好痛喎,哈哈,佢要好好克服下,唔係點陪產呀

香港天文台

因為寶貝令我睡得不好,所以今天就算賴床還是9時多就起來了....於是老公和我去了大家樂食早餐...之後就周圍行,行經彌敦道見到天文台開放日既告示,於是我地就上左去參觀勒~~

話時話,我同老公都未去過天文台參觀,不過我知天文台都係一個古蹟黎既,外形果然好靚...而且處於山上有好多樹木,所以環境好舒服呢~

另外紀念大樓有個展廳,不過呢d咁科學既野我就唔係太大興趣....最開心就係可以扮下天氣報告員,影番幅相留念,好搞笑呢~~

吳家寶貝的威力

本來今天是我離家出走的日子~

本應此刻的我應該已在半空中~

本是一個為期17天的歐洲之旅~

最後的我卻帶著寶貝一起上班去~

寶貝啊~寶貝啊~你的威力何其大~

為了你,我.........

放棄了已訂的來回機票/內陸機票和其他雜費(總值6千多元)

放棄了不知還有沒有機會再實行的離家出走旅程

放棄了置身英國倫敦/意大利威尼斯、彿羅倫斯、比隡、羅馬、米蘭/荷蘭阿姆斯特丹一年一度的鬱金香花展

寶貝啊,實在我沒有怪責你的意思,不過我還是有點失落的情緒....

只是我希望你能健健康康的成長,快快樂樂的來吳家和我們見面,那麼以上的一切就不算是什麼了,一切放棄也都是值得的了~~

那我們就約定好,你不要賴皮啊~~

吳家吾居部落兩歲啦

哈哈,今日無意中記起原來今天是吳家吾居部落兩歲生日,第一篇網誌就是前年今日發表的了....沒想到寫下寫下就過了2個年頭,時間話短唔短,話長唔長~~

相信寫blog除了是興趣還成為了習慣,更喜愛得到各位既支持~

 

媽媽會

身份的轉變連帶搜尋優惠既項目都在變~~

昨天於威爾斯檢查完畢走到電梯大堂,有一個阿姐走近問我是不是準媽媽,入了媽媽會未,只要填寫姓名,地址和預產期就有贈品送了...當我填畢後,其他阿姐相繼走近問我是否介意照我剛才的資料填寫她們的表格,我當然不介意啦,而她們亦熟練地將手上的贈品給我...就這麼一下子就拿了一系列贈品回家了~~

是日參加的媽媽會分別有:

Nestle: 口水肩 + 媽媽奶試飲裝2包

Friso美素佳兒: 手巾仔

Abbott美國雅培: 孕婦高營養脫脂奶粉1包

MeadJohnson美贊臣會: BB手襪

Pampers: New Born尿片1片

Huggies: New Born尿片4片

Disney world of english: 26個字母表

原來有咁多唔同既媽媽會,真係唔講都唔知呢~

~吳太孕記~隆重登場

平時勤於寫blog既我自新年開始突然大幅減少,心水清既blog友應該可以從字裡行間發現到一些弦外之音....無錯,吳家吾居有喜呀~~

按傳統還是過了12週才向外公佈,今天已經過了12週....因此吳家吾居多了一個新網誌分類 - 吳太孕記~~

吳生為左祝賀我就以近期少女孕記Juno既海報製作了吳太孕記Yvonne既海報,哈哈,吳生邊有咁高,吳太邊有咁矮呀~~

其實我一早已經記下了前12週的懷孕點滴,不過今天才發佈

無驚無險OSCAR Test

因為上次私家覆診時預產期提早左一個星期,所以我就要打去威爾斯報告,姑娘之後將我做OSCAR Test既日子提早到今日,老公亦請了假陪伴~~

第一次去威爾斯,因為塞車,所以去到沙田就轉的士,好彩的士司機車到我去李嘉誠專科大樓,唔係仲要搵餐死....上到2樓要排隊登記,等待期間姑娘打黎問我到左未,我話排緊隊登記啦~~之後就去左見姑娘,姑娘解釋一下呢個OSCAR Test(早孕期一站式唐氏綜合症篩查)係咩...磅重之後就問下病歷...跟住就係抽血啦~~

好在姑娘手勢唔錯,只係第一下有少少痛,不過都抽左一枝血架~~之後去左照超聲波度BB頸皮,初時應該係由一位操普通話既實習女醫生幫我照,好似覺得好難照咁,係我個肚上面搞左好耐,終於主診醫生入黎照啦,BB超活躍,郁黎郁去,老公邊睇邊笑,繼上次私家醫生話阿B郁得好勁之外,連今次既醫院醫生照到中途都忍唔住話阿B郁得好厲害,好難追到佢喎....由此推論,阿B一定非常活潑,似足吳生啦~~

之後等出報告,姑娘話以300做分界,如果少於300既話就係高風險,要再作詳細檢查...如果高於300就係低風險~~最後既結果係1:13414,非常低風險...原來仲會驗埋低能既風險喎,結果係1:24012,絕對無問題啦....又過一關啦~~其他情況都一切正常,呢個OSCAR Test結果有90%準確,所以大家都好安心啦~~

雖然今次呢個檢查要千三蚊(我覺得好貴),不過呢d錢都係要使架啦~~之後仲同老公去美心飲茶,又係沙田買左2條孕婦褲,今日都叫有收獲啦~~

0306的晚餐 ~ 四餸一湯

今日老公又買左餸煮飯俾我食啦,雖然都係超簡單既食物,不過我都好欣賞~

瑞士雞翼:老公首次用瑞士汁煮雞翼,不過份量調較尚待改良,今次味道比較淡,唔算好入味~~

香草雞扒:老公知我要留飯盒,所以買左2塊俾我加餸~

冬菜蒸肉餅:老公好似好鐘意食肉餅,或者佢對整肉餅比較有信心,所以今餐又整勒~

蒜茸炒小棠菜:老公話既然係住家飯就煮碟菜俾我食喎~

其實仲有個湯架,係彿手瓜煲牛蒡,仲有粟米紅蘿蔔一齊煲,好清甜好好味呢,簡直係滿分

私家覆診

終於過了4星期來到私家覆診的日子,這4星期很漫長呢,常常都想念BB的情況,某天更夢見自己去照聲波見到BB大了很多呢~

本來今天是預約了中午時間見醫生的,不過醫生實在太多客人,突然之間要去接生,所以要將時間改遲到2點,怎料之後又再接到診所電話還要接生多一個,結果便要再改遲至4時~~老公本來請了早上半天假陪我覆診,順便看看BB的,現在改遲了害他浪費了半天假,和我吃完午餐就趕上班去了~~雖然如此,老公還是請了45分鐘補假早點放工趕來見BB一面,於是我將預約改到5時40分~~

折騰了半天終於可以見BB了,BB長大了不少,上次連1cm也不到,今天已經4.55cm了~~醫生說BB郁得很厲害呢,怪不得我的肚常常扯著痛了....而且手腳也已經成形,還見到BB向我們揮手呢,雙腳不停擺動,超級活躍,醫生說BB很健康,此刻的我實在放下心頭大石,因為前2天才得知原來姑奶也和我一樣有了BB,可是剛剛小產了,現在正在休養中,我和老公也覺得很可惜...很自然的我也擔心起來~~

現在沒有什麼比BB的健康來得重要,雖然我剛剛才嘔吐大作,不過希望12週後能舒服點~~醫生也照得很起勁,雖然通常要16週才能知道BB的性別,不過醫生今天就已經說有6成機會是囝囝,老公之後也說他一早就在畫面中看到BB兩腿之間的一點,在醫生說之前已經知道是囝囝了...哈哈,是嗎?我可一點也不察覺,只是留意著BB在揮手和郁動~~

醫生說照儀器推算,BB比上次計算時大了一星期,約11weeks2days(原是10weeks5days),那麼預產期又再更接近我們的結婚紀念日了~~

觀禮@中大崇基Chapel

我對自己大學一年級時參加的細O組別 - 雙魚組 - 特別有歸屬感,因為那是我入讀中大步入讀書生涯最快樂的日子的開始,我認識了不少師兄師姐和同學....雖然現在的組聚已經越來越少,不過我很高興大家在重要時刻一定記得雙魚組的我~~

今天是雙魚組輔導員Amanda的大日子,她除了是我的輔導員也是和我同一書院的,他的丈夫也是書院師兄,大學時就已經在拍拖,今天終於踏上紅地毯步入教堂...而他們選了中大的崇基教堂行婚禮很有意義啊~~

我成為了負責雙魚組的聯絡人,不過因為通知期短,因為懶也因為常常要休息,所以未能一一聯絡...最後只找了最愛錫我的雙魚組師兄Clement和組員Vivien一同出席觀禮~~因為也有一段時間無見,所以相約了一起午飯,果然是最愛錫我的師兄,每次都請我吃飯,哈哈...也可以坐順風車(讀大學時已經常常坐師兄的順風車,超令人羡慕的呢)

今次是我第一次來CC Chapel觀禮,很美啊....是中大才有的地靈人傑氣息...大十字架外是馬鞍山和吐露港的美景....有馬鞍山為盟,吐露港為誓(山盟海誓)加上十字架作證,真的是一個令人感動的婚禮,我很高興來中大見證師兄師姐的終生承諾,願他們一起開創新的一頁,更幸福的未來

Family Day@海洋公園

老公朋友的公司星期六花了四百萬元於海洋公園包了夜場供員工及員工親友入園遊玩~~

不只包入場費,還有免費穿梭巴士,晚餐飯盒,每人2枝汽水以及一客雪糕/甜筒....嚴格來說真的一毛錢也不用花~~如此員工福利也真不錯~~

朋友預了2張門票給我們,所以我們便相約5時多一起入園遊玩...我們應該大約2年前以生日優惠入場,2年多沒有來,很多地方在動工擴展呢~~

因為我不可以玩機動遊戲,今次純粹陪太子讀書~~不計乘搭纜車,唯一我有份參予的機動遊戲就是摩天輪~~

老公他們玩的遊戲也不算太多,只有越壙飛車,飛天鞦韆和過山車....不過也有去水母館,鯊魚館和海洋館...至於樂樂盈盈呢,因為太晚已經休息了~~

雖然玩的不算多,但轉眼就已經到晚上10時...由於那個餐盒味道和份量也不足,所以我們決定再去食宵夜,最後12時才回到家呢~~今天行了不少路,我的腰也罕有的覺得累啊,要快快上床休息呢~