2007年11月30日 星期五

香葉越式料理


星期日要同老公幫朋友做婚宴司儀,所以要扮靚靚呢~~


今日放工之後就去做facial,都成個月無去lu...之後就去置裝啦~~


之前都睇緊架啦,好貴呢....睇得上眼既都要成七百至九百,唔係好捨得買~~本來打算後著係去一間叫Recycle Theme既買,因為宜家做緊6折,為起一件五百鬆d都叫合理~本來都搵唔到架啦,點知後黎去左百利俾我見到間婚紗店做緊特價,每件$198咋....試左幾件終於都搵到件ok既,加埋條毛毛披肩都唔使三百,within budget,yeah(最重要係呢個11月吳家總開支o岩o岩無超出4位數,勁開心,成4個月無試過啦)


搞掂d衫就要去醫肚啦...近近地就去茹時推介既香葉越式料理啦(就係百利隔離)~~


手撕雞飯晚餐($52):


呢個係老公既,碟雞都幾大碟喎,肉質嫩滑,加埋辣味魚露醬汁,好味~~


檬要(蟹肉海鮮湯檬)晚餐($52):


海鮮當然係我食啦...有青口、蝦、蟹腳、蟹柳、鯪魚球、蜆肉,好豐富...不過最好味既都係個湯底,初初見到湯底咁紅,又有蕃茄,以為好濃味...點知又唔係咁濃喎,反而好鮮甜,係呢個檬要既精髓


椒鹽鮮魷($15):


呢個係是日特價,原價係$20~~味道一般啦,見佢特價先叫黎食下~~


晚餐包熱飲,仲有甜品紅豆沙送,賣相好似麻麻,不過都幾好味喎~~呢餐承惠$131,真係唔錯呢~~


(今日無帶相機,都係用手提影,所以d相既質素麻麻地呢)


2007年11月29日 星期四

鮮奶杏仁燉蛋白


呵呵,美麗又美味既甜品 - 鮮奶杏仁燉蛋白


星期一買左罐川貝杏仁露番屋企,呢幾日天氣轉冷沖熱杏霜飲已經覺得好好味~今晚仲用黎整左呢個甜品添


雖然我都知做杏仁甜品應該買南北杏番黎磨粉,不過我懶呢...粗粗地用住呢罐川貝杏仁露黎整,加埋鮮奶,蛋白拎去蒸就完成啦~


我仲用shooter杯盛起,加埋lemon balm小葉做裝飾,perfect...味道仲唔錯添喎~



 


 


1129的晚餐 ~ 臘腸蒸雞飯、蒜茸墨丸火腿絲炒白菜


今日終於覺得似番d冬天啦,天氣凍最想就係食暖笠笠既野...唔係打邊爐就係煲仔飯啦...因為之前買左榮華臘腸,所以都係整煲仔飯勒~~


不過都唔可以叫煲仔飯,因為今次用左新買既大砂鍋,叫大煲飯就差唔多


我用電飯煲煲先再移到砂鍋再煲架...好成功地有煲仔飯既飯焦呢...咁當然呢度既份量已經包埋聽日既2個便當啦~


另外整個蒜茸墨丸火腿絲炒白菜黎平衡下...廿蚊唔使食到飽晒



2007年11月28日 星期三

卡樂B芝士火鍋薯片 VS 珍珍三文魚壽司薯片


平時唔多食零食既我,琴日竟然係超市買左2包薯片喎~~


卡樂B芝士火鍋薯片:


呢個冬日限定版,上年都買過黎食架啦...今年終於登場,不過包裝轉左少少~~琴晚已經一邊食一邊睇戲呢,我同老公爭住食,睇完片頭就已經食晒lu~~


珍珍三文魚壽司薯片:


見到呢包味道幾特別就買埋lor,不過仲未食,唔知味道如何呢


傳統砂鍋


屋企一直都係得豬豬砂煲,不過佢實在太細啦...用黎炒野好多時都唔夠位,雖然d野炒完縮水既份量就o岩o岩好~~


琴日行經街市見到呢個超抵既大砂鍋...之前買既豬豬砂煲只係$17都已經覺得好抵~~點知今次見到呢個比豬豬砂煲仲平,只係$15咋


咁平唔買真係對唔住自己啦...於是今日食完飯就同老公去買個番屋企...真係開心勒


北京酒樓


琴晚煮意粉既時候,老公走入廚房話佢買波又中左幾百蚊喎...咁我就話點解唔早d講,咁我就唔使煮意粉可以出去食餐好啦~~其實我都係隨口講,點知老公今日放工打黎話出街食喎~~


凍凍地,本來打算去意粉屋食芝士火鍋既...不過行到去附近,我就醒起好耐無食既北京酒樓...好多次想去食都因為太多人食唔到,今日去到時間尚早,有位喎(佢呢度無細檯,2至3位都係要搭檯架)...結果就轉左食京菜勒


呢度出名食北京填鴨同涮羊肉....不過得我地兩個點食呢d野呢,但係可以叫另一樣經濟d既名菜 -- 山東燒雞


山東燒雞($68):係手撕既,大大隻,肉質嫩滑...加上佢既秘制醬汁,真係好味到停唔到口架


鮮肉鍋貼($40):無諗過一碟有咁多隻,熱辣辣,皮脆多汁,好味道~~


肉絲炒麪($32):味道雖然唔算好突出,不過勝在真係手拉麪黎架...條條都粗幼不一呢,口感一流~~


前菜:係花生同酸菜,老公好鐘意呢度d酸菜呢~~


高力豆沙:雖然只係微暖,不過係送既就無所謂啦~~


呢餐食左$178,不過非常飽又好味...仲比意粉屋既芝士火鍋抵食呢~~


《Casino Royale》(鐵金剛智破皇家賭場)


因為今期既電視劇無咩興趣,所以就睇碟啦~~


因為外表一點都不吸引既007,所以上映時都無諗住去戲院睇~~不過阿媽睇完推介俾我話好好睇喎...既然係咁,我心中就記住左呢套007,襯今次既免費租借服務就睇左佢啦


今集係講初出道既007,唔知係咪咁就搵個無咩007氣質既黎做主角...睇完套戲都覺得呢位007一d都唔型(雖然有某幾個鏡頭都ok既),而且亦無左個種風度翩翩既氣質~~


今次007無咩點用高科技產品,反而打到飛起,算係有d新鮮感....而且從來都無睇過幾乎會死,又成日被人發現仲會愛上女主角既007...呢個007形象都幾跳出框框呀...好在係話佢初出道,唔係實破壞晒007係大家心目中既形象~


雖然套戲成2個鐘,不過都無咩冷場,都算幾好睇既....但係我都係鐘意搵番個型d既黎做007


2007年11月27日 星期二

1128的晚餐 ~ 鮮茄冬菇雞肉意粉


今日買唔到餸喎,於是就拎廚房既物資黎煮啦


半包意粉、一包免治雞肉、半包鮮冬落、3隻小蕃茄....就係咁煮左呢個鮮茄冬菇雞肉意粉....無開茄膏,只係用茄汁做醬,係面灑d芝士粉....perfect


加多杯熱杏霜,今晚又搞點一餐勒~~



1127的早餐 ~ 韭菜豬肉水餃配熱杏霜


因為老公唔可以空肚食藥,琴晚就問我樓下有無麪包買...講真,老公住係呢度咁耐又點會唔知有無麪包買呀~~睇黎佢都係想我煮早餐過佢食先咁講~~結果久違了的早餐今早上演呢~


今朝就早左半個鐘起身,簡簡單單淥幾隻水餃同埋沖杯熱杏霜等佢暖下個胃lor~~咁我當然會煮埋自己個份啦....有早餐食人都真係精神d呢


不過睇黎聽日又會回復正常,匿係被窩內唔到最近一分鐘都唔起身....早餐都係煮唔切架啦


2007年11月26日 星期一

《跟蹤》(Eye in the sky)


今日老公在家休息,瞓得太多,所以就睇左之前向舊同事借既《跟蹤》~~


初初覺得呢個題材好似有d悶,拍跟蹤有咩故事呢...點知又幾好睇喎


加上有強勁既演員班底:任達華、梁家輝、邵美琪....位位好戲之人,連帶徐子珊都演出得唔錯~~


睇完《跟蹤》,我真係好懷疑究竟警隊入面係咪真係有個咁專業既狗仔隊部門...如果係其實都幾驚喎...真係好似套戲既英文名咁Eye in the sky,去到邊都可以有隻眼睇住你~~


呢套戲值得推介,唔怪之得拎左咁多獎啦~~



1127的晚餐 ~ 自家牛肉粥、冬菇白菜煲


哎,老公已經唔舒服左幾日,今日勸左佢好耐先肯請假睇醫生,而我又請假同佢去睇醫生啦~~醫生話係上呼吸道感染而且咀唇仲有皮膚敏感,宜家d病名真係專業,搞到好似好嚴重咁~~


同老公去左食澳洲牛奶公司既常餐做晏畫就要佢番去屋企繼續休息...呢d病都係要有充分休息先會好既....而我就決定煲粥做晚餐啦~~


知道老公唔鐘意淡而無味又無肉既白粥,不過上次靚太教話有病唔好食雞粥,所以我就去買左d牛柳絲整牛肉粥lor...我鐘意明火煲粥,粥底都煲得幾綿下架(米同水既比例係1:15)...唔錯唔錯...不過老公依然嫌味淡,不過病係要食淡d架啦~~


另外整個冬菇白菜煲等佢都有d菜食下啦...好味道呢~~


2007年11月25日 星期日

《蜘蛛俠3》(Spiderman 3)


前陣子上映的《蜘蛛俠3》終於睇到啦~~


黑色衫既蜘蛛俠其實都幾有型呀...不過內心卻開始變質...有時就係會被勝利沖昏頭腦架啦~~


今次電影放左唔少篇幅講每個角色既內心情感,結局就是你選擇那條路~~雖然都係老掉了牙的道理,不過都係有反省既意味~~算是為平時充滿英雄形象的蜘蛛俠加了多點人性弱點~~


2007年11月23日 星期五

烤Come


因為12月初又係CFA監考既日子,所以今晚我就要去會展聽briefing~~我見今日Canon Expo開幕而且免費入場就叫老公放工去行下,我聽完briefing落去搵佢時間就o岩o岩好勒~~


上次同老公行經灣仔謝斐道見到呢間新食店《烤Come》傳來陣陣食物香氣,所以老公就話今晚去試下~~


我地9點去到得我地一檯客咋喎,bar檯有幾位客人似乎係老闆既朋友,所以我地得到好殷勤既服務...因為我之前係屋企食左少少野先去會展,而且眼見價錢亦不算便宜,所以都只係叫左少少試下:


熱羅漢果茶($20):老公話佢喉嚨有少少痛所以想叫黎飲(但係又死都要去食烤串燒,激死),佢話唔錯喎~~


鹵水牛舌:服務員話係送既,不過我見埋單前菜收十蚊呢...不過仲有碟餐前涼菜(青瓜、蘿蔔、生菜)跟既...好在呢碟鹵水牛舌味道唔錯~~


蒜茸牛油燒扇貝(6隻/$48):扇貝好新鮮,蒜茸牛油亦沒有蓋過鮮味卻令扇貝味道提升,非常不俗


豬頸肉串($15):相比其他,呢味算係差左d,開首既豬頸肉燒得過火了,不過後段就好好多~~呢個跟沙爹醬~~


孜然羊柳串($16):用上鐵枝串起,熱辣辣....孜然粉味道也可以~


金菇牛肉卷串(2件/$22):最特別是其醬汁,味道很特別,令普通如我也懂煮的金菇牛肉卷變得非常美味呢


焦糖燉蛋:新張期免費送的呢,我見餐牌標價$12呢....味道也很好~~


整體黎講都唔錯呀,除了食物烤得不錯,最欣賞是每款串燒都配不同醬汁,就連佢預先提供既3款醬汁都派不上用場呢,不過以呢個價錢,份量算偏少,不便宜啊~~


今餐只係食左幾串野都要成$144呢...好在有焦糖燉蛋送,感覺抵D啦...佢俾左張有效一個月既9折卡我,如果各位有興趣就問我借黎用啦~~


《我在政府部門的日子》(Just Follow The Law)


呢套係今年年中上畫既戲,個時睇到預告片覺得好正,因為正正就係諷刺緊政府官僚制度下出現既工作情況(入紙申請、白紙黑字、申報、跟程序等等),我和老公睇完個trailer即刻相視而笑(係會心微笑個隻)~~


大家click下面條link睇下個trailer~


http://movie.sina.com.hk/cgi-bin/mv/movie/main.cgi?id=2224&tp=4&subaction=trailer


所以我都選左呢齣戲係我既免費租借名單之內,不過其實諷刺政府官僚既戲份都差唔多放晒入trailerlu…雖然套戲就係講新加坡,不過上司無料,下屬懶散,中層無奈唔多唔少都反映到所有政府既普遍特色(雖然當中一定有人材,不過整體既感覺都係咁上下啦)


原來故事既主線反而係一個中高層()同一個低層員工()係交通意外中對調左靈魂而引起既連串事件~


如果你係政府部門工作,我諗你應該會有興趣睇下呢套戲,ok~~


2007年11月22日 星期四

1122的晚餐 ~ 蕃茄脆皮芝士腸辛辣麪


琴晚留左半隻黑椒燒雞,今日就偷下懶啦~~


本來想買老公鐘意食既伊麪既,點知去左幾度都無得賣...結果嬲嬲地去左買辛辣麪~~不過落左蕃茄椰菜一齊煲個湯底,感覺健康d,而且味道都好似好味d喎~~


配埋燒雞一切食,非常飽肚~~


 


2007年11月21日 星期三

1121的晚餐 ~ 白菜包心牛丸粉絲煲、黑椒燒雞、火腿粒煎蛋


今日既晚餐好簡單,不過反而可以練習下斬雞刀法~~


白菜包心牛丸粉絲煲:


天氣涼涼地都係食d熱辣辣既煲開心d...有菜有肉有粉絲,易煮又好味~~


黑椒燒雞:


因為見到特價$15就有一隻,咁抵又點可以唔買呢~~不過就係成隻要自己斬...今餐食左半隻咋,仲有半隻可以聽日食~~我都算斬得幾靚架


火腿粒煎蛋:


兩味餸好似仲爭少少,最後決定簡簡單單整碟煎蛋~~老公坐底食飯時仲問我點解知佢今晚想食蛋喎...哈哈,呢d咪叫心有靈犀lor


今餐三十蚊都唔使添喎