到lunch time時間就可以放工啦,我同老公去左旺角既《盛八日式燒肉店》食晏呢
因為受到好友菇時既極力推介,又見到網上好多人推介,而且午膳既價錢俾晚飯時段抵好多,所以就決定做我既生日午餐地點勒~~
我地大約點半到達,當時只係有2檯客咋,而且有一檯都就黎走添,感覺好似包場咁~~我聽到後面個檯好似都係有人生日所以黎食飯呢~~午餐果然唔貴喎,有一人前($48),二人前($108 或 $128),仲有4人前($2xx)
我地要左$108個二人前午餐,有沙律菜 x 2、蛋花湯 x2、香草雞、鴨胸、牛舌、鹿兒島豚肉同埋和牛,仲有白飯 x 2呢~~待應仲教我地點樣燒添...肉質果然好唔錯喎,燒起黎好香呢~
我最鐘意食牛舌,有咬口得黎又唔會"un",點埋檸檬汁真係好正架~~推介推介
其他都好味道,鴨胸唔乾仲好juicy,豚肉可以燒到好香脆,牛肉亦見嫩滑,雞扒用香草醃到綠色好搞野~~份量剛好~~感覺上比韓式燒烤企理d添喎~~~
最搞野係我同老公食完走既時候見到我爸爸呀,佢同朋友去另一層食下午茶呢,真係o岩勒~~
隨著年紀愈來愈大,慶祝生日已經不會像年青時那麼著重,不過這卻是個很好的理由讓我大吃大喝
其實我真的沒有什麼禮物是很想要的,也不想老公勉強買些東西,所以老公話無買禮物我一點不開心也沒有,反而覺得沒有浪費金錢呢
老公同我都有半日補假,所以今日只係番上午咋~~如常工作既我去左搵其他秘書拎file,行番去間房既時候見暑期工同事跑出黎,佢見到我就同我講reception話有花送黎,叫我出去拎
...哈哈,個一刻我竟然O嘴喎,同事幫得拎住手上既file,我就出去收花
就係呢紮花令大家知道左我今日生日~~自結婚之後都無試過係公司收花啦(公司收花威d添架),所以好開心呀,有驚喜呢~~
我問老公佢幾時訂既,初初老公唔肯講~~跟住我問佢點解張卡既下款唔係寫老公,而係寫佢係教會用既名...跟住佢先話係托教會一個係九龍灣返工既姊妹幫佢訂既,佢同姊妹講話受到老婆既嚴密監視無時間去買禮物,所以搵佢幫手~~佢話明明叫個姊妹寫老公做下款架,點知寫左佢個名~~
哈哈,唔怪之得我會驚喜啦...因為我真係無預到佢有時間去訂花呀,原來係請槍~~
吳家既室內無線電話已經壞左好耐架啦(我諗都有年幾),不過因為屋企有部傳真機同埋自己既手提電話,所以根本就無迫切性去買個新既~~
之前老公申請左BEA既信用卡,去北海道之時順便簽夠換領迎新禮物既要求金額,所以星期六就去左換領呢個Panasonic室內無線電話勒
,都賣成$328架~~
好耐都無試過係屋企用室內無線電話啦,有d懷舊feel添
因為聽日同老公都請左晏畫假慶祝生日,所以唔使留飯盒,而且聽日全日都出街玩,所以今日就去買餸煮飯~~2個人就整兩味餸啦,咁我就決定整我想試好耐既菜式,琵琶豆腐勒
99上星期想買百福豆腐花食,點知買錯左蒸煮豆腐喎,佢又唔鐘意用黎煮餸就俾左我拎番屋企~~於是今日就係用左盒大既百福蒸煮豆腐加免治豬肉攪埋一齊整琵琶豆腐啦~~
由於琵琶豆腐製作煩複(又要釀係湯匙拎去蒸,成左整之後就卜生粉去煎,再煮個茨汁兜均先完成),所以另一味餸就整個容易既粉絲什錦煲(菜、金菇、牛丸、貢丸、墨魚丸同埋魚皮餃)~~
今次我打算整個黑椒汁,不過黑椒味真係唔多覺,哈哈,睇黎下次要重手d先得勒...另外口感同係街食既有少少距離,我相信係因為豆腐比例太少而引致既,所以下次要放少d豬肉先得
...不過個樣都睇得下,呃得下人架
今日其實唔算係生日飯,可以講係細細妹入伙酒或者細妹加薪飯,真係好多喜慶事
其實今日係細妹請客,因為佢加左人工呢~~而細細妹間屋已經裝修好,所以今日唱完卡拉ok之後就一齊上細細妹屋企,仲睇左林海峰既《踎低噴飯》添~~
晚餐去左一間叫表姐大廚既街坊食店,味道唔錯而且價錢超值:
明火例湯:係蘿蔔煲白菜豬踭,大家都覺得味道淡左少少,不過都ok~
脆皮風沙雞:我地要左半隻,真係皮脆肉嫩又入味,就連一向唔食雞既細細妹都肯食,仲添食呢~~
潮式煎蠔餅:用料充足,不過唔知點解無平時食開個種味道~
椒鹽鮮魷:好惹味,yummy~~
煎封倉魚:煎得好靚,唔錯唔錯~
蒜茸開邊蒸蝦:雖然只係用上細蝦,不過味道都ok~
脆皮炸大腸:我一向對炸大腸麻麻地,不過今次呢碟炸得好香脆,所以我都食左好多~~
白飯 x 4, 啤酒 x 2樽, 凍檸賓 x 3
今日呢餐飯只係$46x...人均消費都唔使$70,好抵呢~~
由於時間尚早,我地當然未可以check in啦,不過就放低晒行李...嘩,即刻一身鬆晒
跟住就搭番1051班巴士出番去小樽站,開始漫遊小樽勒
之前係札幌無去到出名既二條市場,所以諗住係小樽睇下佢個三角市場同埋中央市場,2個都係JR附近既~~但係我去到既時候發現三角市場好細,我明明見到三角市場幾個大字,但係只見幾間舖咋,仲要已經處於就黎收檔既情況,我諗11點對佢地黎講實在係太晏啦...結果行到尾見到呢條《船見坡》既街,我記得有旅遊書提及過,不過唔記得有咩特別,但係都影張相留念啦~~
過左馬路就見到中央市場,不過係門口望入去似乎大部份檔口已經收左,冷冷清清咁,所以就無入去勒~~之後轉左入一條有好多攤檔既街,有賣野食既,有賣玩具既,不過個樣係準備開檔,所以我地就無買黎食啦~~
行完呢條街就見到《小樽都通》既入口,佢就好似札幌既狸小路咁啦,兩旁都係商舖,不過賣既野就老土d,我仲見到個好大既煲、鑊、茶壺呀,好搞笑~~
唔知點樣,行下行下就去到《壽司屋通》,真係成條街都係壽司店架...見到好多旅遊書有介紹既壽司店添,不過諗住去出拔小路食午餐,所以就無係呢度食壽司勒~~
前年今日,婚禮籌備正進行得如火如荼
,其中一環就是要商談場地佈置~~想要什麼還是我自己最清楚,所以最後還是自己和設計師跟進~~
這副對聯麻,是我自己用僅有的文學修養創作的
加上我們的婚禮是在迎月日,那便用上屬於秋天的啡色來設計
我將它放在壁報板兩側,當賓客投票《我最喜愛的結婚照》時就會看見
其實我是十分喜愛這副對聯的,可是不知有多少賓客會留意得到
食完早餐就去搭JR啦,上面就係札幌-小樽既welcome pass(包一張可以係任搭JR札幌至小樽區域既車票同埋地鐵1日車票,共1500 yen),張地鐵車票琴日已經用左lu~~今日就用張JR車票勒
我地乘0913既JR,0958就到左小樽啦~~真係快勒~~
小樽站一出就見到中央巴士站,我地就係要坐13號往朝里川溫泉架巴士啦~~我check過1005有一班開出,入到去即刻問職員邊架o岩,職員好好咁指左俾我地知,但係我未買一日巴士劵喎.....職員唔知我想買一日巴士劵,只係同我地講落車俾錢都無問題...不過一日任坐既巴士劵一定要係呢個總站先有得買架,所以我又唔肯上車~~
好在終於俾我見到買票既櫃台,即刻去左買2張一日任坐巴士劵...其實班車要開出架啦,不過職員好好人叫司機等埋我地呀,唔係我地就要等半個鐘先有下一班呢~~
張巴士劵好可愛呀,真係巴士咁既形狀~~職員會擦去今日日期既數字,我好鐘意呢張巴士劵呀
超得意呢~~兩張一共1500 yen~~
呢架巴士係可以直接去到我今日book左既溫泉旅館 - 宏樂園 -
個站就係門口之麻,同搭的士一樣啦...咁當然呢個係大門口,仲要經過花園先入到去真係接待既地方~~
2007年6月22日, 星期五
琴晚番到酒店就苦惱緊點樣可以將戰利品pack好入背囊,幾經辛苦,將所有鞋盒都唔要之下,總算勉強pack好...另外再加每人一袋hand carry~~
原本諗住今朝又早車去小樽,不過後來改變主意,因為想瞓晏d~~所以決定搭0913班JR,今日終於可以食到東橫Inn免費提供既早餐啦~~
原來早餐好簡單,就係味噌湯同埋飯團...飯團有3款,味道都ok架...不過一早食唔落咁多飯,所以我都係食左1件咋~~
行完街街又係晚飯時間,我之前係東橫Inn拎左本好似電話簿咁厚既Hot Pepper(係本免費既coupon書黎架)~~芸芸食肆coupon之中,我睇中左串家物語既放題coupon,好似平左千幾yen架~~
我地入到去得番幾檯人咋,卡位下面係俾你用黎擺野架,所以雖然我地買到一袋二袋,但係放晒入去唔會阻住我地食野~~檯中間就係炸爐啦~~
我地2個人既任食放題折左只係4125 yen,為起每人只係$136左右~~仲要都幾多野食架~~凍櫃放滿唔同種類既串燒...另外仲有沙律、咖哩飯、冷麪、炒飯,軟雪糕.....好多好多呢,呢d野都好好食架~~
而且仲有好多醬汁俾你用黎點串燒食呢~~
要炸串燒好簡單,只要將串燒沾上炸粉及麫包糠就可以放入去炸架啦~~烤好可以放係旁邊隔油,仲有好多吸油紙可以吸走多出黎既油,所以油既程度都ok既
(為食就唔理得咁多架啦)
食完既竹簽就放入竹筒入面,我數過架,好似有三十幾四十枝呢~~
呢餐都算幾有特色,味道其實都唔差架,仲好好玩添...大家都可以考慮去試下~~
